هلا أخوي
كل شي تمام بس عندي ملاحظات :
السياره الأيجار في طرابزون لمدة اربعة ايام سعرها مبالغ فيه اذا كنت ستقودها بنفسك
لأن السيارات الصغيره سعرها في اليوم يبدأ من 160 ريال وحتى 220 تقودها بنفسك
والمني باص او الفان ب 350 ريال في اليوم تقودها بنفسك
وكل السيارات داخل فيها تأمين شامل حتى الأطارات والزجاج الأمامي والخلفي
وتطلب من الموظف يسجل لك موضوع الزجاج على الورقه وتقوم بمعاينة السياره من اي خدش
أما اذا كنت تقصد سياره ايجار بسائق فالسعر معقول
حيث ان سعرها يبدأ من 450 الى 560 في اليوم
بالنسبه للوقود اذا كانت السياره ديزل أوتوماتيك يكفيها 240 ريال اربعة ايام
تمشي فيها حوالي400 الى 500 كيلو
بالنسبه لتذاكر اسطنبول طرابزون اسطنبول
يفضل الحجز المسبق ارخص لك بكثير .. تغير زمان اول على الأقل هاليومين
الاسعار تفرق 40 في الميه من خلال الأون لاين مدفوع مسبقا .
ال 5000 ريال أنشالله تكفي
بس حاول اذا رحت أي مطعم فخم تطلب الفاتوره قبل الأكل وفي وقت الطلب
ولو طبقت الطريقه على كل المطاعم أفضل ومطابقتها مع المنيو .. واللا توهقت في مطاعم ما تخاف الله وتصكك بفاتوره 850 ريال لشخصين في وجبة عشاء او غداء
موفقين انشالله .

جزاك الله خير ياقيصر
بالنسبه للسياره انا انوي سياره صغيره بدون سائق ديزل طبعا
والمبلغ اللي حاط في بالي انه مايتجاوز ال90 ليره في اليوم وكل ماقل كل ماكان افضل اعتمادا على المكاسره طبعا فقلت
0ليره =188 ريال تقريبا في 4 ايام = 750 تقريبا واكيد التأمين 1000 ريال
فوضعت هذه الميزانيه وسوف احاول ان يقل المبلغ اليومي
ودام الفرق 40 بالميه اليوم احجز طيران بس اطلع الفيزا اللي اكلتها الصرافه البارح تهئ تهئ اشوا انها صرافة بنك والا رحت فيها
اما العشاء ياصل يمكن 850 ريال ابوك يالولد
يازين التونه من بقالة امين احمل منها وادرعي ياأم هشام ( قطاوه مو زوجين)
نخلي المطاعم للرياض سياحتنا هنا كلها مطاعم في مطاعم والله ماتدري من الحامل الرجال والا زوجته كلهم كروش بس الحرمه 9 شهور وتنتهي بس الرجال مدري متى ينتهي ههه
شطحت ياخوك من ال850
الله يكتب اجرك

هلا أخوي
بالنسبه للسياره
سعرها ب 90 ليره شامله التأمين
ما فيه شي انك تأمن بمبلغ 1000 ريال ل 4 أيام .
أما بالنسبه لأنكم تاخذون معلبات ( لا وأنا أخوك ما وصلت أنشالله لذالدرجه وأدري أنك تمزح )
لكن لو حبيت تطبخ أحيانا خصوصا في طرابزون وأوزنجول لهدف سعة الصدر وفللة الحجاج
وليس توفيرا للمال .. فالأجواء حلوه ولها طابع مميز وبالأمكان تاخذ معك فقط 2 كيلو رز من الرياض
ومن هناك في أوزنجول تستطيع تستأجر دبة غاز من السوبر ماركت على مدخل البحيره قرب المسجد
بسعر 25 ليره وتضع تأمين وتسترجع التأمين عند ترجيعه للمحل .. أما في اسطنبول ما يحتاج تطبخ
اللا نادرا وللناس اللي بتجلس فتره طويله والسكن في شقق وليس فنادق
أنا لما قلت لك سالفة ال 850 ريال للوجبه
كان هدفي يكون الشخص حريص فقط
ولا أعمم طبعا على كل المطاعم بهذا التصرف المشين والأستغلالي
فدائما تاكل في وجبات المولات والمطاعم السريعه الشخص ب12 الى 17 ليره
والمطاعم الشعبيه 15 الى 20 ليره
والفخمه تبدأ 50 الى 120 ليره
هذه الأسعار للشخص الواحد ومعقوله جدا
خصوصا لو خذنا في الأعتبار أنك في مره من المرات حبيت تاكل في مطعم راقي
ويكون لك فيه ذكرى حلوه ما يمنع تاكلون نفرين ب 160 ليره .
خلاصة الكلام وانا أخوك بعض المسافرين يروحون على عماها ويدفعون بدون ما يحسبون ميزانيتهم في اليوم
والسبب أنهم مبسوطين وما يبون يسببون أي أزعاج في الرحله
واللي يسوي كذا عادة تكون المفروض ميزانيته مفتوحه .
لكن اللي ميزانيته مغلقه
يحسب معدل صرفيته ويعرف وين يضع نقوده .
أطلت عليك للأيضاح
والله من وراء القصد .

ان شاء الله الاخوة يفيدوك

قيصر العرب المسافرون
دائما ياقيصر اجاباتك وافيه كافيه شامله استفدت منك كثيرا اضاعف لك الشكر ولك مني الدعوات بالتوفيق والسداد

وش دعوى وأنا اخوك ما سويت شي
والشكر موصول لك أيضا
فلولا أستفسارك لما طرح هالموضوع اللذي قد يستفيد منه البعض وقد يستفيد الكثير
اذا كانت الناس قلوبها عند بعض .. ونقلت مثل هذه النصائح حتى لو شفويا
للذي لا يستطيع مواصلة التواصل الاجتماعي الذكي
وهاؤلاء هم من يحتاجون لتلك المعلومه اكثر من غيرهم
اشكرك على لباقتك .