وبعد العودة من السوق وبعد أن أمضينا قرابة 50 دقيقة في السوق وساعة كاملة في التاكسي مع العلم أن السوق قريب من الفندق على نفس الشارع ولكن هذا في أوله وذاك في آخره بس ولله الزحمة .
القوى منهكة والتاكسي زود الناقص يعني من الطيارة إلى زحمة الشوارع يالله قال إيش قال إجازة وصلت الفندق واتجهت إلى الاستقبال لآخذ المفتاح واجهتني موظفة الاستقبال بابتسامة مرسومة على محياها ابتسامة غير متكلفة ولا مصطنعة إنها طبيعة ذاك الشعب المضياف . الحقيقة أنها ردت إلي نشاطي نعم إن الابتسامة سحر خصوصاً إذا جاءت من وجه حسن أخذت المفتاح وكنت أتمنى لو أنها لم تجده .
المهم صعدت إلى الغرفة وأنا أحمل أكياس هيرو الثقيلة بيبسي و توست وجبن وماء ومناديل وبعض المأكولات الخفيفة للحاجة شيبس وكت كات وعلوك وغيره جلست اطلع عفشهم اللي في الثلاجة وحطيت عفشي مكانه أيه الحين جاء دور السمسونايت الي وزنها يزيد على 30 كيلو فتحت الشنطة ولبست القميص ورتبت ملابسي وأخرجت العطور وماكينة الحلاقة والمسجل وشاحن الجوال وفرشاة الشعر والجزمات "وأنتم بكرامة" ولوازم التجميل " حشا مب رايح إجازة هذا رايح يعرس ":;)
رتبت العفش وحطيت راسي أباخذ غفوة الساعة تقريبا السادسة مساءً أنا غمضت عيني مادريت إلا الباب يطق واحد يقول : " هاوس كبينق هاوس كبينق " غربلك الله - يوم غمضت عيني- الله لا يبارك بك طبعا الغرفة نظيفة بس ما أدري وش جايبه شكله يبي يبلغ طلعت وعطيته المقسوم وقلت ضف وجهك لا أشوفك إلا بكرا مثل هالوقت طلعت لي كتاب قلت ابقرا حتى يجيني النوم وبدا الشيطان يلعب بي يودين يسار وأوديه يمين وأنا وأياه مادريت إلا وأنا نايم وما صحيت إلا الساعة العاشرة ليلاً يا ولد نم إلى الصبح تقلب يمين يسار فوق تحت ماش النوم طار . الشيطان يقولي قم ياحمار صل المغرب والعشاء قم توض وصل " أنا عارف إن ماقصده الصلاة " المهم قمت وصليت المغرب والعشاء رجعت أبنام مافيه فايدة طار النوم . قلت ابنزل تحت ابشوف العالم الي رايح والي جاي أبشوف الزحمة والعالم الحية أذكر يوم أدخل العصر والبهو مليان عالم . يوم نزلت الساعة 11 ياولد ما فيه أحد العالم وين راحت معقوله نامت الخلق !!!!!!!!؟؟؟؟؟؟؟
قلت ابطلع شوي برا الفندق أشوف الزحمة على بالي في الرياض العالم حتى الساعة 3. الشارع فاضي كل ثلاث دقايق يمر تاكسي طافية اللمبة الي فوق ويمشي مليون . يا ترى اللي في هالتاكسي وين رايحين ؟؟؟؟؟ غريبة وين العالم - صار إنقلاب بالبلد وأنا نايم - والله كل شي جائز وش أسوي ؟؟؟؟؟؟ وين أروح ؟؟؟ ما فيه أحد؟؟ قلت أبروح أقلب التلفزيون يمكن فيه شي يصلح لي وأنا راجع حصلت اثنين يلعبون شطرنج أيه لبعك هذي ياولد جلست اتفرج عليهم والله الربع صارو صحبة ويعطوني سيجارة طعمها حلو يحطون بالدخان سكر أنا ما أدخن بس مجاملة جت الساعة 1 تقريبا مليت منهم رحت اتفرج على التلفزيون ماش مابراسي تلفزيون التلفزيون لاحق عليه بالسعودية والشيطان يقولي فيه أحد يجي من السعودية تسع ساعات بالطيارة علشان يتفرج على فيلم والله حمار !!!!!!!!!!!!!!!!
وش السوات ضاق صدري مرة طفشت وجاء الفرج حصلت خويي اللي تعرفت عليه بالطيارة توه صاحي من النوم حالق الدقن ولابس كأنه يوم ميلادة يقولي وينك إنت وجهك جالس ساعة أدور عليك .
خير إن شاء الله وش فيه ؟
إلبس بسرعة يالله خل نطلع .
وين تطلع مافيه ولا محل برا فاتح العالم كله نايم تحسبك في الرياض إنت .
جلس يضحك ثم قال : أمش أبوديك لمكان يحبه قلبك مليان سعوديين !!!!!!! بس هاه لا أوصيك إكشخ ترى المكان مهم جداً .
وين بياخذني ها المهبول ؟؟؟؟؟؟؟؟؟؟؟؟؟؟؟؟؟؟؟؟ الله أعلم .
الباقي مشفر .