الله يسهل لك
لا تخافين الاعضاء بيساعدونك .
رحله موفقه

السلام عليكم اختي وحياج الله.
بالنسبة للطيران .. ممكن تحجزين من عدة خطوط طيران والأفضل اكيد تحجزين عن طريق النت وكذلك يمكنك حجز المقاعد ونوع الأكل من الحين .. وبتحصلين على خصم كبير.
وكل ما تأخرتي بيزيد عليج المبلغ.
بمراجعة رحلات يوم 5 اغسطس ،، الأفضل تتركين فترة 3 ساعات على الأقل بين رحلة الوصول والمغادرة لكيب تاون.
لذلك انصحك تاخذين رحلة الساعة 12 ظهرا حسب ما انا مأشرة لج في الصورة
وحاليا السعر المخفظ متوفر وبعد فترة بيخلص .. فالشخص بيكلفج بس 559 راند بس يعني تقريبا 300 درهم وشوي.
اذا تأخرتي في الحجز فبتروحين للتذكرة الأعلى وهي 945 راند ، اي تقريبا 500 درهم .
طبعا فيه فرق بينهم ان الارخض ما تقدرين تسترجعين الفلوس عند الالغاء مثل التذكرة الأغلى.
بالنسبة للعودة .. ما ادري هل انتي بتقعدين 15 يوم في كيب تاون فقط ولا ناوية تنتقلين مدن اخرى.
انا انصحك بشدة بالتنقل للتغيير.
اذا كنت تاوية ما تغييرين المدينة..
فعندج خياراين
الأول تاخذين رحلة الساعة 5:45 او 6 الفجر .. وبتوصلين الساعة 8 الصبح .. اي فقط ساعتين بين الوصول ورحلة الاتحاد .. فالوقت ضيق بعض الشيء ..ولاحظي ان سعر التذكرة المتوفرة غالية 2000 وشوية راند.
والحل الثاني وانا اشوفه افضل انج توصلين جوهانسبرج يوم قبل اي يوم 19 اغسطس وتباتين في جوهانسبرج .
منها تستريحون للسفر ثاني يوم ومنه ما تطلعون مبجر وايد من الفندق لانكم بتكونون قريبين من المطار.
رحلة السفر بين جوهانسبرج وكيب تاون في 5 اغسطس 2008

رحلة العودة من كيب تاون إلى جوهانسبرج في 20 اغسطس 2008

وأنا حاضرة لاي سؤال .. وياريت تقرأين تقريري .. وبتستفيدين ان شاء الله لسفرتك.
وعندك كذلك تقارير الاخوة والاخوات في المنتدى راح يفيدونج كثيرا.
تمنياتي لك بالتوفيق
إماراتية.نت

تسلمين إخت حكاية طفوله...
إماراتيه نت جزاك الله خير على ردج الي ريحني وايد و عطاني فكره و بالنسبه لتقارير الإخوه أنا من المتابعين المنتظمين...و خذت من خبراتهم...تسلمين إختي

تبي نصيحتي
حلاة السفر بترتيب الاشياء الرئيسيه
من خلال الخبره اقول لك
جهز اول يوم وصولك فقط

تسلم أبو عبدلله...على الرد بس ما فهمت قصدك؟
بصراحه أنا مش ناويه أيلس في جوهانسبيرغ...أريد ع طول أروح كيب تاون بس الظاهر قصدك أحجز للرجعه من هناك صح؟ يعني أرتب كل أوضاعي يوم أوصل؟....أنا كل ما أقول لزوجي عن الموضوع يحتشر لأنه يريد كل شي يكون منظم وفي إنتظاره أكيد....

نور العيون
أنا أييد الاخ ابو عبدالله .. ان خط الرجعة ممكن تحجزين له من هناك .. المهم تحجزين السفر والعودة للاتحاد
والطيران الداخلي مو مشكلة.
بس حتى في الطيران الداخلي حطي في بالج تحجزين اسبوع بالكثير قبل العودة حتى تحصلين التذاكر الرخيصة.
الحجز للخطوط الداخلي مرن جدا وعندك خطوط كثيرة ممكن تحجزين عن طريقهم . والمثال الي وضعته لج هو لخطوط الجنوب افريقيا.
ان لما سافرت حجزت الذهاب والعودة لجوهانسبرج .. ولكني ما استخدمت العودة .. لاني ذهبت إلى منطقة جورج .. ومن اهناك رجعت جوهانسبرج. فدفعت خط العوة على الفاضي من كيب تاون إلى جوهانسبرج.
جنوب افريقيا مرنة جدا .. وممكن تحجزين مثلا فنادق بالنت لأول اسبوع .. وعقب وانتي اهناك تحجزين للاسبوع الياي خلال اول اسبوع تحسبا لاي تغيير في مخططات الرحلة.
إماراتية.نت

تسلمين إخت إماراتيه بصراحه أنا خذت بنصيحت أبوعبدالله بحجز التذكره من هناك مع أني كنت أعتقد أنه في صعوبه بس زين يوم قلتو لي إرتحت...

شكرا اختي بنت اماراتيه على التوضيح