b_eisa
06-07-2022 - 01:45 am
هلا أخواني أخواتي,,,
بعد أسبوع راح أسافر لماليزيا لشهر العسل وخط سيري كالتالي,,
كوالا- لنكاوي - بينانج- الكاميرون- كوالا
حبيت أسافسر عن افضل الطرق للذهاب من بينانج الى الكاميرون وكم مدة الرحله.
يعني إذا بالباص أطلع على أي شركه؟؟؟
وإذا بالتاكسي من وين الاقي تآكسي مضمون لأني بصراحه ما ودي أغامر وأنا لوحدي مع إمرأه؟؟؟
ولكم جزيل الشكر
والله يوفقكم ويجعل حياتكم كلها عسل بعسل
ومبروك عليكم مقدماً
انا سافرت من بيننج إلى كاميرون وراح أعطيك رأيي
طالما إنك تتكلم عن الأمان والشيء المضمون فأنا أنصحك تروح بالباص
الباص أكثر أمان من التاكسي سواء من ناحية السواق أو السيارة
ولاتنسى ان السفر مع الجماعة أفضل من تكون لوحدك مع سواق
وخصوصاً إن الطريق فيه مسافة حوالي ساعة تحتاج لهدوء وسائق متزن
صحيح الاقدار بيد الله ولكن انت اعمل بالاسباب
ناهيك عن هذا كله الفرق الشاسع في التكلفة ما بين الباص والتاكسي
ولكن هذا كله راجع لك انت وحسب ميزانيتك ونظرتك للباص والتاكسي
بالنسبة لتذاكر السفر من بيننج لكاميرون ممكن تاخذها من مكاتب جنب مركز كومتار في بيننج
وهو مركز او عمارة معروفة في بيننغ وهي اطول عمارة في بيننغ
في اي مشوار لك لمركز كومتار وقف واقطع تذكرة باص من هناك
واكيد راعي التاكسي راح يدلك على الشركة الممتازة ( هذا لو كان فيه اكثر من شركة )
وافضل لك تقطع التذكرة اول ما توصل لبيننغ
اول ما توصل لمحطة كاميرون على طول اقطع تذكرة من نفس المحطة لكوالا
علشان ما تطلع من الفندق مخصوص تروح للمحطة وتقطع تذكرة في وقت ثاني
مدة الرحلة بالباص من بيننغ لكاميرون ست ساعات ونص
مدة الرحلة بالباص من كاميرون لكوالا اربع ساعات ونص
لو عندك اي سؤال لاتتردد قوله
ولاتحرمنا من شرف خدمتك