السلام عليكم و رحمة الله
يا إخواني و أخواتي أنا عندي عدة إستفسارات مهمه و عاجله و السبب أن السفره ما بقى شي عليها مثل ما وضحت في العنوان ,,
السكن : راح يكون في شاتو فرونتيناك إن شاء الله بناء على عدة تقارير سابقه و مدح أغلب الأعضاء له و خصوصا العضو القدير " حدي مصر " في رحله سابقه له و كذلك عضو أمتعنا ب تقريره المصور اللي هو majed555 ,,
الأسئله :
أنا إنسان أعشق المشي في السفر ل أني أحب أكتشف و أعيش حياة مواطنين الدوله اللي رايح لها و متعه المشي الصراحه و عموما
انا حاط براسي إن الميترو راح أستخدمه ل ديزني و فرساي و بارك أستريكس فقط ل ذلك إستفساري هو :
من الشاتو أعتقد إنه سهل جدا أمشي ل : الشانز و طبعا قوس النصر و الكونكورد و اللوفر و حدائق التويلري و برج إيفل ,,
هل أقدر أمشي ل كنيسة نوتردام من الشاتو ؟ هل أقدر أمشي إلى الاديفانس و لا بعيد ؟ هل أقدر أمشي ل هضبة مونمارت ؟
أنا ما أعرف مسافاتهم من الفندق عشان كذا محتار .. !
ياليت تفيدوني و تقولون لي كل الأماكن السياحيه الجميله المعروفه اللي أقدر أجيها مشي ولو كانت بعيده ف ياليت تذكرون لي إسم أقرب محطه ل المكان البعيد هذا
# الحي اللاتيني وش إسمه بالفرنسي أو الإنجليزي ؟ يقولون إنه جميل و ممتع
# وش سالفة متحف الشمع اللي بالموت نسمع عنه في باريس .. !
الظاهر إنه مو فرع ل ( مدام توسود ) ل أنه مستحيل ما يكون له شعبيه عند البشر .. !
سؤالي ل اللي زار هذا المتحف : هل هو جميل و يستحق الزياره ولو كان كذلك ياليت موقعه و طريقة الوصول اليه
# ما أدري وش قصة الحدائق في باريس ل أنه نادرا نلقى عضو يحط تقرير عنها .. !
أنا أعتقد إن غابة بولونيا هي الأشهر و الأكبر و الأجمل مع إني ما شفتها و لكن بما أنها الأكبر و الأشهر ف طبيعي راح تكون الأروع !
هل هي الأفضل ؟ شخصيا زرت سابقا الهايد بارك و سحرتني الصراحه :wink:
دخلت اليوتيوب و لقيت العالم أغلبه يمدح حديقة ( لوكسمبورغ ) أعتقد إن إسمها كذا و إستغربت إنهم ما يذكرون بولونيا .. !
أفيدوني ب الحدايق يا جماعة الخير و قربها من الشاتو أو الشانز عموما
# شخصيا أعشق المتاحف و التاريخ
الناس أغلبهم ل اللوفر و أورسي و فارساي : هل توجد متاحف أخرى جميله ؟!
يعني مثلا متحف خاص ب السيارات الكلاسيك أو متحف حربي أو متحف سينما أو متحف أسلحه أو متحف شاي و غيرها
# سمعت إنه فيه حديقة حيوان في باريس صحيح ؟ و هل هي في سنتر المدينه و هل تستحق الزياره يعني هل فيها حيوانات أو طيور نادره مثلا أو مهدده ب الإنقراض و هل هي مرتبه و كذا يعني
# يقال إنه فيه سفاري في باريس بس إنه خارج المدينه صحيح ؟ ياليت اللي عنده معلومات يفيدنا
# فيه شغله مثل عالم البحار أو الأسماك أو الأكوا بارك مو متأكد من إسمها ,,
أعتقد إنها في ديزني لاند أو قبلها صح ؟!
هل هي كبيره أو لو فيه غيرها أفضل قولوا وين موقعها
# برجع ل نوتردام : كأني شفت في السابق من تقارير الأعضاء صور من فوق الكنيسه !
يعني أي واحد يقدر يصعد فوق و كيف الطريقه ؟
أكتفي حاليا ب هذي الأسئله ********> وش خليت
انا آسف على كثرة تساؤلاتي و راح أذكر غيرها لما نتفاعل مع الموضوع إن شاء الله
أحب التخطيط و التنظيم و الله المستعان ,,
الله يوفق الجميع و في إنتظاركم و مناقشتكم بإذن الله عز و جل