غريبه !
لم يرد أحد حتى الآن !!

وعليكم السلام ورحمة الله وبركاته ...
حياالله اخونا الباتشينو والمعذرة يا اخوي
العتب على النظر ياعم وماكان ودنا بمشاكل مع المافيا
الف الف مبروك اخونا الباتشينو ... وعقبالنا والعزوبية
نقول بسم الله ...لابد تحدد ايامك اول وعلى ضوئها تقسم ايامك
على المناطق .. ونعرفك راعي سفر وماتفوتك هالعلوم .
كوالا ... الخيول الذهبية ... وخذها مطلة على البحيرة .
ولو اطلعت على رحلات الاخوان الاتجاه المعاكس وعبادي
تقدر تأخذ فكرة عن الفندق ... وغالباً اللي يروحون ماليزيا
نوجههم في البداية اما للخيول الذهبية او صن واي لاقون .
اللي معاه اطفال نقول له صن واي لاقون واللي وده في هدوء
ورومانسية يأخذ بالخيول الذهبية .
اجل دام انها شهر عسل خلها الخيول الذهبية .
بعدها طيران تتجهون للنكاوي ... افخم الموجود بلنكاوي
اندمان وتانجونغ راهو ... واغلاهم ... مش دائماً شرط انه
ان غلي الفندق يكون هو الافضل ... صراحة اثنيهم فخمين
ولكن هل عندك استعداد في صرف 1000 وشوية لليلة ... وعندك
اللي اقل من مستواه بشوي وبنصف السعر ...صراحة وش تاخذ .
غالباً الخفيف على الجيب هو الخفيف على القلب ...
عندك منتجع جميل ورائع واكواخ على البحر ... ويكلفك الليلة
في حدود 600 ريال ... سعره جميل ومعقول وخدماته ممتازة
وكله على بعضه حلو وشيء تحسه فاشن
اللي هو لنكاوي لاقون ... وتقدر ترجع لصوره بموضوع رحلة
اخواننا الوطواط ولمسات والاتجاه المعاكس
نتجه لبينانغ وافضل لك الطيارة على الفيري خوف من الدوار...الخ .
افضل فندق في نظري راسا ساينغ شانغريلا ...وكثير يشاركوني
الرأي وكثير يفضلون هدوء موتيارا ولكن عيبه موقعه البعيد
عن السوق الليلي وشارع الحركة .
وبعدها ترجعوا لكوالا وتقدروا بالسيارة ولو لقيتم وقت
تباتون بكاميرون كان بها وان لا فأتجهوا للعاصمة .
بالعاصمة بغيتم شيء فخم اللي هو ماندرين اورينتال
وموقعه جميل جداً وجنب مركز رائع والمنطقة جميلة
ونظيفة وخذ غرفة مطلة على الحديقة وجنبك البرجين .
وان بغيت مباشرة على شارع العرب فلابد تختار فندق اخر .
وترى بين ماندرين وشارع العرب بالتاكسي 5 دقائق .
في رأيي انه لنكاوي وبينانغ نكهتم غير ...وعن نفسي
ارتاح اكثر بلنكاوي ... لكثرة الملايو المسلمين
وهدوئها ممتع وبينانغ حركية اكثر واغلب اهلها صينين .
الخلاصة ....
الخيول الذهبية .
لنكاوي لاقون .
راساساينغ شانغريلا .
ماندرين اورينتال .
لك تحياتي اخوي ونتمنى لكم شهر عسل سعيد
وتروحون وترجعون بالسلامة والسلام عليكم

اخوي العزيز ...... الشعيبي
سلمت اليد التي .. خطت تلك الكلمات ..
كتبت .. فاجدت .. وفي الوصف .. أبدعت ..
اخوي خبيرنا .. الغالي
إذن كوالا على :: الخيول الذهبيه ::
والغي ماريوت و ريجنت من بالي ؟
وفي رايك 12 ليلة كم اصرف معي :: دولار :: .. ؟
وسلمت يالغالي وجزاك الله خير ،،
ولا تهتم العصابة :: راضية :: عليك كل الرضى
اخوك :: الباتشينو ،،

ياهلا والله بأخوي الباتشينو
والله يبشرك بالخير وترى سرقة الحمولة الاسبوع اللي
فات ماكان لي يد فيها وترى وراها آل كابوني
وقعت كبار الاجرام في بعض ومحشوم اخوي
تسلم العين اللي قرت والايادي اللي ردت ياغالي
اها ... كان نيتك اول ماريوت او ريجنت ... ممتاز .
اجل لازم اوضح لك الصورة اكثر ... ترى الخيول الذهبية
مش في قلب العاصمة مثل ماريوت وريجنت .. وبين الخيول
وقلب العاصمة 25 دقيقة تقريباً وحسب الزحام ...ولكن ماريوت
وريجنت فتراهم في قلب العاصمة وعلى شارعنا المزعوم
شارع العرب (بوكيت بينتانغ) ..
وش رايك ..
الخيول الذهبية 2 ليلة .
لنكاوي لاقون 3 ليالي .
راساساينغ 3 ليالي .
ماندرين اورينتال او ماريوت باقي المدة ...وتخلي منها
طلعة يوم لجنتنغ ...مدينة الملاهي والترفيه .
الخيول الذهبية مثل محطة يختاروها اغلب اهل شهر العسل
لاجل تبقى في الذاكرة اجمل الذكريات ... هاديء وجميل
وكأنك في مدينة متكاملة ...تخلي الليلة الاولى راحة من عناء
السفر وتعبه واليوم الثاني تماشي بها وبالمنطقة
المحيطة وتوسعون على قلوبكم واتمنى تتطلع على مشاركات
الاخوان لاجل تعرف التماشي والروحات والجيات
لنكاوي ومعروفة .
بينانغ ما اعتقد عليها استفهام .
كوالا ... هذه الايام عاد لابد تاخذها في قلب العاصمة
لاجل التسوق وتماشي العاصمة ...وافخم فندق بالعاصمة
وجنبك اروع سوق بماليزيا سوريا klcc والحديقة
الجميلة والحفلات والبرجين جنبكم ومنطقة راقية جداً
اللي هو فندق ماندرين اورينتال ..فندق معلم موظفيه
انه اي نزيل بالفندق يعتبر هو النزيل الوحيد بالفندق
شوف وين وصلت العالم وسعره ممتاز ومعقول
في حدود 420 ريال لليلة ...وخذها مطلة على الحديقة .
وان بغيت ماريوت او ريجنت تراها قريبة من المنطقة ولكن
على شارع بوكيت بينتانغ اللي هو شارع التسوق والحركة
وبينهم 5 دقائق بالتاكسي ... وترى اثنينهم حلوين
ولكن ان خيرتني بين ماريوت وريجنت راح اختار بلاتردد
ماريوت ....وان خيرتني بين ماندرين وماريوت راح اختار
ماندرين .
وماريوت ب370 ريال وريجنت ب360 ريال .. وترى اسعاري
مش اسعار مكتب وممكن تزيد او تنقص واعطيك هي مثل ما اخذتها
واتوقع صرفية يومية لشخصين في شهر عسل اكل وتماشي
ومواصلات يومية وتذاكر 500 ريال كافية .
يعني خذ 2000 دولار وان شاء الله تكفيك وتلقى فائض
عام الخير بأذن الله والله يعيد ايام الطفرة
وخذها دولارات واصرف جزء منها اول ماتوصل المطار
والباقي شيلها وكل ما احتجتم اصرفوا اللي يكفيكم ولا تشيلوها
كل يوم معاكم وين مارحتم لك سفرات وتراك اخبر مني
اتمنى لكم شهر عسل سعيد ومبارك عليكم اخوي
وتروحون وترجعون لنا بالسلامة والسلام عليكم

اخوي الحبيب عجزت اقرا اسمك لاعربي ولا انقليزي لكن صاحب الموضوع
المهم يقولون العين ما تعلى على الحاجب انا الحين مستحي اتكلم بحضرت مولانا وعمنا وحبيبنا الشعيبي افندي باشا
لكن الحق حق
اولا في كوالا في فندق اتوقع افخم فندق في كوالا ومن افخم الفنادق في ماليزيا ويمكن يجي بقربه او درجة ثانية ماندرين اورينتال
المهم هذا فندق ذا ويستين
ماله داعي اقعد اشرح لكن تراه شي وبتدعيلي
وهو جنب ماريوت الجدار بالجدار ومقابل ريجنت
وسعره حلو مش غالي
ومن عجايب الصدف اني سكنت بالفيصلية روزوود والمملكة فور سيزونزقبل اسافر لماليزيا ثم رجعت وسكنت الفيصلية
تدري بدون سابق نقاش اني انا واهلي حقرنا لفيصلية والمملكة لما دخلنا عقب ذا ويستن
مع اعلم ان ليلة الفيصلية والمملكة بالف خمسمية اذا ما فيه عروض
اما في لنكاوي فانحاش من فندق الظواطير شيراتون لنكاوي
صح الفندق حلو وفخم وهادي بس به عيب شنيع
الفندق اكواخ وبعيد كل البعد عن اللوبي والمطعم والمسبح واي شي تبيه في الفندق لازم تطلب السيارة تجيك وانتظر على ما تجيك تشيلك وتوديك ولاتقدر تمشي للبعد وكل الغرف على الجبل يعني تملخ رجلينك لو حاولت تمشي
المهم احلا منه بدرجتين شيراتون بردانا وبدون ظواطير وقلق وخوف نفسي
اما بينانج فعلى قولة حبيبي الشعيبي رساسينج وان شاء الله ما تشوف المايوهات اللي شفتها
معلش الحين مستعجل وراجعك بعدين

السلام عليكم ورحمة الله وبركاته :
يا مرحبا ومليون هلا ... باحلى وارق خبير لتايلند الباتشينو حنا كلنا تحت امرك وخدمتك واجبه ولكن ؟؟؟ لا يفتى ومالك بالمدينة مادام الشعيبي سبقنا وش خليت عز الله انك حطيت ايدك على الجرح ...........
سفره سعيده باذن الله ومبروك مقدماً

اخوي العزيز .. خبيرنا الغالي .. الشعيبي
بصراحه مو عارف ايش اقولك .. إلا إنك اخجلتني بهالمعلومات الرائعة ..
ريحتني الله يريحيك .. قول :: آمين ..
الفنادق كلها حلوه ودائماً نجد سؤال محير قليلاً للخبراء (( محبين السفر )) لو مكانك وين بتسكن ؟
بالفعل ريحتني وحددت الفنادق اللي خلاص ابصم لها من الآن وبدون اي تردد
وخبرك عارف شهر عسل ومدته قصيره فماودك انك تجرب اي فندق ويطلع (( نكبه ))
تسلم يالغالي ..
أهديك هذي الصورة من تصويري الخاص . .

الله لا يحرمنا منك ..

اخوي تأبط سهماً ...
مايهم وشو (( ندائي )) الحين ..
أهم شي معلوماتك الطيبة ..
تسلم لي يالطيب الغالي ..
ذكرتني بفندق ( بلو مارين ) في جزيرة بوكيت هذا الصيف والله انه طلع نكبة النكب بصحيح ..
نفس الموضوع .. إذا بغينا نلطع من غرفتنا لا بد من الاتصال باللاستقبال حتى يبعث لنا سيارة ( تك تك ) خاصة بالفندق لنقلنا من الغرفه إلى الاستقبال أو إلى بوابة الخروج من الفندق ياسلام
ماقعدنا فيه الا ليلة وحده وغيرت على طول شاطئ ( باتونغ ) التعيس المزدحم الصاخب .. إلى شاطئ هادئ رائع رومانسي (( كاتا )) ..
قول معاي بالعربي :: آل با ت ش ي ن و

حيالله الغلا .. البسمة الحرة ..
جزاك الله خير يالغالي ، احرجتني بهالاستقبال الطيب ..
الله يبارك فيك يالغالي ..
وبالفعل اخونا الغالي (( الشعيبي )) ماقصر جزاه الله عنا كل خير
مدنا بكل ما احتاج من معلومات وماراح يقصر في اي سؤال او استفسار ..
وهذا هو هدف المنتدى تبادل المعلومات الحقيقية الطازجه والتي تتم عن طريق (( محبين السفر )) ..
الله يوفقنا وياك ..
الباتشينو ،،