1. رحلاتي أغلبها لشنزن, وأمر على قوانزو فقط للفرجة والتسوق!


2. جربت صرف الفلوس بأكثر من طريقة

السلام عليكم ورحمة الله وبركاته
هدفي من الموضوع هذا هو إني أعرف أحسن طريقة صرف من الريال للرمنبي, والعكس أيضاً من الرمنبي للريال
أنا من سكان الظهران, وأسافر عن طريق البحرين-هونق كونق, وأزور شنزن وقوانزو حتى الآن فقط!
بالأسفل, شرح بسيط لرحلاتي وتجاربي المالية للي رايق ووده يضحك علي شوي ويتعلم معاي (بإمكانكم تطنيش الكلام اللي تحت والتوجه للرد مباشرة جزاكم الله خير)!
هذي تقريباً رابع مرة لي بروح فيها الصين إن شاء الله

رحلاتي أغلبها لشنزن, وأمر على قوانزو فقط للفرجة والتسوق!

جربت صرف الفلوس بأكثر من طريقة

أول مرة كانت بغشامة, أني أخذت معاي ريالات وصرفتها بمطار هونق كونق وصرفتها مرة ثانية لما وصلت الصين من الصرافين اللي بالشوارع ف بالعربي اتشرشحت من كل جهة وكنت راضي لاني مادري وأكملها لكم بعد؟ الكاش أخذت شوي وكنت أسحب من الصرافات كل شوي ههه, أكملها لكم بعد؟ كنت عادي أصرف من الصرافات اللي ماتطلع إلا 1500 وماني حريص أدور الصرافات اللي ب 3000 ههه, أكمل لكم بعد؟؟ ماتوقع خلاص, وصلت قمة التبذير بأول رحلة, بس كانت وناسة لانها كانت إستكشافية, حتى الظاهر أول مرة مارحت قوانزو أبد, شنزن ومالحقت ورجعت!!
والصرف للريال طبعاً ماضطريت أصرف شي لاني بعزقت فلوسي كلها هناك ورجعت معاي خردة بسيطة..
المرة الثانية, كانت مع إثنين من أصحابي والحمدلله كان معاي إثنين, لأن القرارات كانت تطلع بعد تفكير ثلاثة أشخاص, وكل واحد يبحث في جهة ف كانت أحسن من التجربة الأولى اللي رحت فيها بلحالي.
هالمرة أخذنا فلوسنا كاش كلها (تعلمت من درس الصرافات فقط ههه) ف أخذناها كاش ريال سعودي كلها وصرفنا جزء منها بسيط في هونق كونق حق التكسي وهالأمور, وجزء كبير في شنزن من الصرافين اللي بالشوارع (وصلخونا صلخ بس ماكنا ندري) وجزء كبير ثاني لما رحنا قوانزو عند مطعم السدة (ماكنا ندري عنه وعن أسعاره الحلوة). ف كان أحسن سعر صرف هو اللي بمطعم السدة, من الريال للرمنبي مباشرة. لكن فيه شخص هناك بالمطعم سعودي جزاه الله خير قال لي, إصرف فلوسك دولارات بالسعودية, ولما تجي هنا إصرفها رمنبي تطلع عليك أرخص. (هزئني بشويش هو, كأنه قال لي غبي بس بطريقة مؤدبة جزاه الله خير)
ولما رجعت طبعاً صرفت من عند العمودي للصرافة بمدينة الخبر ولا سألته عن سعر الصرف, مباشرة من الرمنبي للريال! وإنصلخت طبعاً بس صلخ الحبيب ولا صلخ الغريب.
المرة الثالثة طبعاً أنا صرت أذكى وتعلمت درسين, صرفت فلوسي من البنك دولارات واخذتها معاي, وصرفت شوي بهونق كونق, والباقي بمطعم السدة, وبالرجعة صرفت بعض فلوسي دولارات, وبالسعودية صرفت عند العمودي دولارات ورمنبي لريال. كانت قرارات أذكى بس أحس إن فيه شي أذكى من كذا ماني عارف له.
طبعاً اللي ماعجبني برحلتي الثالثة, حاجتين:
1- سعر البنك للدولار(بنك سامبا)
2- سعر العمودي للرمنبي
اللي كان أحسن شي طبعاً هو العمودي من الدولار للريال, سعره ممتاز جداً
وسعر مطعم السدة من الدولار للرمنبي..
أحتاج إقتراحاتكم بخصوص العمليتين التالية:
1- صرف فلوسي اللي بجيبي حالياً من الريال للرمنبي,, هل اصرف دولار واحول رمنبي من السدة بعدين؟ ولا أخذ ريال مباشرة وأحول للسدة لاني نسيت سعره للريال صراحة ف ماقدرت أقارن
2- بعد ما أخلص, صرف فلوسي من الرمنبي للريال
هل على طول رمنبي لريال, أو رمنبي دولار ريال ؟
إذا أحد عنده خلفية عن أسعار أي عملية صرف حالياً اليومين هذي مع الأسعار الجديدة ياليت يشاركنا فيها
يعني مثلاً
1- صرفت عند السدة من دولار لريال كان سعر الصرف كذا كذا
2- صرفت من عند فلان للصرافة من كذا لكذا وكان السعر كذا..
شاكر لكم تعاونكم
مهند العتيبي