1. مابي اطول عليكم السالفه ياجماعة الخير ,,

بسم الله الرحمن الرحيم .
أسعد الله صباحكم / مسائكم بكل خير .. تحياتي للمبدعين والمبدعات اعضاء المنتدى جميعا بلا استثناء وفي جميع البوابات ,, ودعواتي للطلاب والطالبات بالتوفيق في امتحاناتهم النهائيه شدو حيلكم

مابي اطول عليكم السالفه ياجماعة الخير ,,

الكل سمع بافتتاح احدث مول واعتقد اكبر مول في المملكة اللي هو الرياض جالري لما يتمتع لكن للأسف انه تكون صيانه المول سيئة لهدرجه هذي اللي ماتوقعتها ولا جت في بالي ابد ابد .
يعني هذا والسوق توه مابعد اكتملت محلاته كلها وأمس يوم اروحه له انا واهلي يعني مايعتبر وقت ذروه ولا شي الجمعة والسبت اختبارات والمول خفيف مره مافيه زحمه , اجل لو اكتمل تشغيل المول كله والناس ازدحمت وش بيصير بتصير مصيبه ؟
الي صار لي انا واهلي ركبنا الاصانصير بننزل من الدور الثاني للارضي ومعنا واحد وزوجته المهم شوي وتونا نازلين الا يوقف الاصانصير ذيك التوقيفه اللي حسينا كانه طاح في الارض من شدة الخبطه اللي خبطها وشوي اكتشفنا اننا معلقين بين الادوار !! الاصانصير وقف لاهو راضي ينزل ولا يطلع والازارير حقته ماتشتغل بس الجرس والجرس ماحد يسمعنا السكيرورتي نايمين وللاسف مافيه رقم صيانه ولا تلفون جوا الاصانصير ولا شي حتى الاصانصير بكبره مادري وش شركته ذا التعبانه ماهو من الشركات المعروفه عالميا شكلها ارخص شركه قدمت عرض ورست عليها المناقصه " اهم شي الفلوس ارواح الناس عادي ويتخرعون بعد عادي " قال الرجال قسم بالله وهذا كلامه قال مهوب اول مره يوقف قد وقف عليه هو قبل يعني الاصانصير سوابق ماشاء الله ؟؟ قعدنا نأشر للناس اللي في المطعم عساهم يشوفونا او يلمحونا والحمد لله شافنا واحد الله يجزاه خير وطار يركض للسيكورتي يخبرهم ! طيب ممكن افهم وش فايده الجرس اللي فيه ؟
لاجرس ينفع ولا رقم تلفون ولا اي شي يعني لو السوق فاضي ابلش بلحالك وتعلق في السماء !! بس ربي رحمنا ان الاصانصير قزاز من ورا ..
تخيلوا والله قعدنا مده لين بعدين نزل شوي مادري وش نزلوه ماادري نزل كذا بلحاله الاصانصير حتى ازراره مااشتغلت هو بس فتح للدور اللي تحت علطول انحشنا وحتى نزلته كانت جدا سئيه ومتعبه بس اشوى ان المروحه كانت شغاله ولا كان بلاوي بس ربك رحيم ماينسى عبده .
ملاحظاتي بشكل عام / 1- السوق جيد ولكن فيه مساحات كثيره وكبيره غير مستغله فاضيه ياليتهم حطوا ملاهي كبيره مغلقه لان السوق يساعد عشان مساحته كبيره مره .او يحطون مسارح للعروض ولا سينما للاطفال .
2- يا مسؤلين صيانه السوق والاصانصيرات بشكل عام ياتشيلون اصنصيراتكم التعبانه ولا شوفوا لكم شركه معروفه عالميا واذا مانتوا مغيرينها على الاقل حطوا تلفون مساعده للطوارئ _ ترى ارواح الناس ماهي لعبه _ والسوق مابعد جته زحمه الصيف ورمضان والاعياد !! الله يستر على الجميع بس .
3-السوق مو مرتب يعني مثلا الجهه هذي الملابس الجاهزه والجهه اليسار ملابس الاطفال وهكذا لا ابد حوسه .
4- فيه شي عجبني في رد سي مول جده عجبتني حركه القطار اللي يمشيك في سوق رد سي مول ياليتها تكون موجوده لان السوق كبير وياليت بعد لو يسمحون بتواجد الاكشاك والكوفي شوبات عشان شوي تعطي جماليه وروعه للسوق لان فيه كوفي شوب بس مساحه الجلوس المخصصه لها صغيره جدا ؟
هذي ملاحظاتي وارائي عن السوق تمنياتي للجميع بقضاء اوقات سعيده وممتعه دائما وابدا .
محبكم أبو نور