1. من نافذة الغرفه ..


2. واغلبهم متصوفين ( يعني صوفين يعني تابعين المذهب الصوفي )


3. الله المستعاان ..


4. ياالله الله كريم ..


5. لاتصلح لشهر العسل !! ولاتصلح للفتيات .. ولا تصلح للأطفال ..

السلام عليكم ورحمة الله وبركاته
بخبركم عن رحلتنا الفنانه الى تايلند !! والتي بأذن الله تعالى "الاولى والأخيره "..
كانت الرحله علاجيه ولاكن جلبناها سياحيه من زود التوتر اللي صابنا ...
نحن كلنا 6 أشخاص .. الوالده الله يطول بعمرها .. خالتي العزيزه .. وثنتين من خواتي .. وأخويه ولي هو كان محرمنا في هذه السفره و (البودي قارد) ..
وكانت الرحله .. دبي ---> (بانكوك ----> شنغماي -----> بانكوك) -----> دبي
.
.
.
وصلنا الى مطار بانكوك ولقينا أحلى استقبال وخلصنا بسرعه وبدون مشاكل ..
المصيبه .. اول ماركبنا السياره .. استعجبت من منظر الشوارع !! وين عايشين هذيل !!
ما عرفنا نحن فوق الشارع ولا الشارع فوقنا !!
ولي خلاني أشمأز من هذه لبلاد .. ريحة لبلاد عجيبه غريبه يعني حاولنا انحلل مصدر الريحه ماعرفنا !!
.
.
.
المهم كنا حاجزين في فندق أسمه REMBRANDT TOWERS
والصراحه الفندق فناان وماعليه قصور .. الفندق منقسم الى قسمين شقق فندقيه و الغرف الفندقيه ..
ونحن سكنا ف الشقق الفندقيه .. والحمد الله كنا مرتاحين ..
كانت الشقه عباره عن صاله كبيره ومطبخ وغرفتين نوم وعزكم الله حماميين ..
(اللي ناوي يسكن في هذا الفندق يخبرني لاني أكتشفت سر خطير وبتستانسون عليه للفظوليين فقط )
الاستقبال ..
..
أتصدقون ان كان عندنا فطور كل يوم الصبح .. ولاكن منوه اللي بينش حق الريوق !! يالله ماعليه ( دفاعة بلا )
والله يخلي الوالده .. اللي عوضتنا عن ريوق الفندق .. طبعا كرتون شاي + كرتون حليب ابو قوس ونيدو + قوطي جبنة كرافت + ملاعق وصحون + قهوه .. يعني كان عندنا ريوقنا الخاص كل اليوم الصبح لول ...
بس للأسف نست قوطي الجاشع ( السمك المجفف ) لول
.
.
.

من نافذة الغرفه ..

في كل صباح باكر في بانكوك ومع كل أشراقه نور .. أستيقظ من النوم .. ليس على صوت المنبه !! الا على صوت خالتي العزيزه وهي تنشد الاناشيد الاسلاميه .. وتقول بصوت عالي : (سألوني قالو كيف ما هذا الثبات وحولك فتن تهز الراسيات) .. وعقب شويه .. تنجلب الموجوه الى .. (الشب الأسمر جنني ياعيوني) .. ههه .. لاحول ولاقوه .. وعقب احاول اغمض عيوني شويه .. أسمع ... خا شو خا شو .. :36_1_50: (أختي تناخر=تشاخر ) .. يعني يابنت الحلال ياسفيرة دبي بتنشين من الرقاد غصبن عنج !! بس تدرون كان صباحنا له ذوق وطعم ...
.
.
.
المهم ...
اليوم الثاني : أصبحنا واصبح الملك لله .. تريقنا وعلى طول سرنا صوب الدختر ( المستشفى)
المهم الدختر ( المستشفى ) أسمه BUMRUNGRAD INTERNATIONAL
الصراحه المستشفى ماعليه زوود . كل اساليب التقنيات الحديثه والراحه موجوده عندهم
وعندهم ستار بوكس اذا كنت تبغي تكيف شويه على الصباح وتشرب لك كوفي ..
المهم الله يسلمكم في هذا المستشفى المميز .. يوفرون لكم مترجمين يساعدونكم على فهم رمسة الدخاتر ( الاطباء ) ..
واذا كنت ناوي تبات(تنام) في المستشفى لدواعي العمليات الجراحيه ( الله يعافي أمة محمد)
عندهم ألبوم خاص وتقدر تختار الغرفه اللي تباها واذا كنت تبغيها 5 انجوم او 4 انجوم او اذا كنت تبغيها مشتركه او بروحك .. ( شي طيب والله ) ..
وانتهى يومنا كله ف المستشفى ..!! وطبعا كنا انراجع بين فتره وفتره وهذه حالتنا لين ماردينا لبلاد ..
..
والحينه بخبرركم عن رحلاتنا السياحيه ومغامرتنا ..
وين سرنا وين سرنا هيه ذكرت .. الله يسلمكم كانت رحلتنا السياحيه الاولى الى مدينه الملاهي
(DREEM WORLD) .. كانت الصراحه شي عجيب جنها (كنها) دزني لاند اللي في باريس بس تقليد ..
المهم استناسنا وقظينا يوم كامل فيها .. بس هلكنا من الحر والرطوبه ..
نسيت اخبركم شو شفنا .. لول .. شفنا عرايس حلوين وطبعا رزينا ويهنا وتصورنا وياهم وصورناهم ..
الله يهنيهم ..
وهذا النموذج يدليك على مواقع دورات المياه ( عزكم الله )..
هذا صديقنا (نو ني ) المرشد السياحي والبودي قارد والحمالي .. بس الصراحه كان انسان فظييع ..
ما ابغي اتكلم عنه الله يستر عليه ..
.
.
رحلتنا الثانيه كانت الى (الروز جاردن ) حديقه متواضعه فيها عروض للفيله وعرض للعرس التقليدي القديم التايلندي وسوق شعبي ..
.
.
.
وطبعا في بانكوك ماقرينا مكان ... الا انتالي ( نحوط) من سوق لين سوق ويحليله الحمالي ماقصر ( أقصد اخويه العزيز ومحرمنا ) ... شي سوق متواضع اسمه ( سلوم نايت بازار ) سعاره رخيصه جدا وبضاعتهم جيده وجميله .. تنفع حق الصوغه ..
ونسيت اخبركم عن شارع العرب ولي فيه محل لبيع الاحذيه التقليد ( المندوس وبشيوتي ) وفيه محل فريده علي .. تعرفون شو فريده علي !! محل لبيع الماراكات العالميه التقليد .. وطبعا كل خلق الله متكودين في هذا المحل .. وما انصحكم بشراء الشنط لان الفرق واضح بين الاصلي والتقليد .. بس الاكسسوارات جميله جدا وماتنعرف انها تقليد ...
محل النعول ..
شنغماي ... طبعا سرنالها بالطياره التايلنديه .. وكانت نظيفه وجيده جدا .. وخدمه لا بأس بها .. وطبعا مدام ان مافيها تلفزيون يعني شو تسوي !!! حط راسك وانخمد ( أرقد) ...
شنغماي بلاد لابأس بها .. أنظف من بانكوك .. بلاد هاديه وتتميز بمناظرها الخلابه ...
رحلاتنا كانت .. الى أعلى قمة في تايلند .. والى معرض المجوهرات .. مصنع الحرير .. ورحله نهريه عن طريق القارب و الى مصنع المظلات الشمسه ..
أعلى قمه في تايلند ... درجة الحراره تصل الى 5 تحت الصفر !! شي جميل الصراحه ...
سبحان الله ..
معرض المجوهرات رخيص برخص التراب يعني ياعرايس ويابنات ويا حريم كل وحده تقبظ ولي أمرها وتسحبه وتدلع عليه على شان يشتريلها ...
ولي ابهرني في المعرض هذه الصوره الرائعه للقادة العرب والاجانب ..
وكان من بينهم الشيخ محمد بن زايد آل نهيان حفظه الله ورعاه ..
.
.
معرض الحرير .. انبهرت من هذا المخلوق العجيب(دودة القز) ... سبحان الخالق ...
وطبعا ماقدرت اصور داخل محل الحرير لانه ممنوع .. بس شو كان عجيب .. حتى مفارش السرير من حرير ..
.
.
معرض المظلات ...
الرسم على المظلات ..
صناعة المظلات ..
والرسم على الهواتف النقاله ..
الرحله النهريه ..
الصراحه لون النهر عجيب وغريب !! وهذا كان من احد المتطفلين اللي شقح (نط)على المركب وتعلق ..
.
.
ونحن نتمشى بالنهر مرينا على حديقة الحيوانات و شفنا عرض الثعابيين ..
.
.
نسيت اخبركم عن المسوس ... ههه طبعا اتعرفون شو يعني المسوس ( اللي تسوي المساج)
أنصحكم بعدم تجربة المساج التيالندي .. انفدع ظهري ( ما اعرف افسرها) وتجسحت ( وتكسحت) وصحت طشونه ..
طبعا تقدرون تطلبونها لين الفندق .. بس أتأكدو قبل اذا هي بنت ولا نص ونص ...
.
.
.
رجعنا الى بانكوك ... وطبعا بين مراجعة المستشفى والمواعيد .... وبين السوق .. واليوم اللي قبل الاخير
قلنا بنريح أعصابنا وبنسير سفاري ..
وكانت رحلتنا السياحيه الاخيره على هذه الارض ..
سبحان الله السبلان اللي عندهم جنهم أوادم .. يفهمون انت شو تقول ..سبحان الخالق
وهذا اخويه العزيز مع القرده الجميله !! لول
وما أروع الحيوانات السائبه مثل الغزلان والزرافه والنمور والفيله ..
.
.
.
.
الجانب المحزن لي تايلند :
عجب العجاب .. بلاد لايوجد فيها مسلم حقيقي !!!
بلاد يسودها الفساد و الجهل والفقر !! تدرون كم نسبة المسلمين في هذه البلاد 1% فقط !!

واغلبهم متصوفين ( يعني صوفين يعني تابعين المذهب الصوفي )

الله المستعاان ..

موسى وما ادراكم من هو موسى .. أنسان فقير غني الدين والحلم والصبر .. أنسان تخرج من الثانويه العامه ولتحق الى الدراسات الاسلاميه في المملكه العربيه السعوديه ليحمل الى بلاده رسالة الاسلام الصحيحه !! وكافح وصبر .. ويوم رد بلاده الفقير مالقى حد يسمعه حتى اقرب الناس له وهم أهله اللي تخلو عنه .. وبكل وقاحه قالو له ربعه : !! شو فادتك الدراسه الاسلاميه !! انت بعدك فقير !!! ونحن درسنا في بلاد الغرب واصبحنا اغنياء !! ...
الصراحه اللي ناوي يسير شنغماي لازم يزور موسى ويسمع كلامه الثميين عن الاسلام والدين والعقيده الصحيحه .. ويعرف حقيقة المسلمين القله اللي عايشين في هذه البلاد !!

ياالله الله كريم ..

المهم موسى عنده محل أسمه (أبو الحسن) ..يبيع فيه عود كمبودي وعنبر ومسك وعطور وزيوت طبيعيه .. و ادويه شعبيه لجميع الامراض .. وصراف للعملات الخليجيه .. وعنده ايضا مغاسل لغسيل وكي الملابس .. ويزاه الله خير يحب يساعد الناس .. ونسيت اخبركم ان عنده مرشدين سياحين يرمسون بالعربي .. وعنده احدث انواع المواصلات المريحه ..
كانت اغلب طلعاتنا السياحيه من مكتب موسى .. والصراحه كانو على قمه من الذوق والصدق والامانه ..
يعني هو كله على بعضه شركه .. وهذا رقمه للي حاب يتواصل وياه 4731317 (01) بس قبل لاتنسون فتح الخط .. او على هذا الرقم .. 9122667 - 086
.
.
.
نصيحتي الاخيره وقبل ان أختم هذا الموضوع ..
تايلند لاتصلح للسياحه !! تايلند تصلح لأهلها فقط .. تصلح للشباب فقط ( حق الصياعه) وليست للعوائل ..
تايلند تصلع للعلاج فقط .. تصلح للتجاره فقط .. تصلح ليوم يومين فقط ..

لاتصلح لشهر العسل !! ولاتصلح للفتيات .. ولا تصلح للأطفال ..

فهناك منظار من الجهل والفقر والفساد لا استطيع نسيانها ولا أستطيع ان اكتبها لكي لا أخدش الحياء ..!!
ونسيت اخبركم انهم مايعرفون العربيه الا من رحم الله لا و المصيبه ان اغلبهم مايعرفون الانجليزي ..يعني اتعلم لغة الاشاره !! ولي يعرف انجليزي .. ياويل حالي عليه .. ماتعرف له شو يقول هو يرمس انجليزي ولا يدلع ...
ونصيحتي الاخيره .. أبحثوا عن الحلال .. واقصد فيه الأكل الحلال .. لان وايد من المطاعم اللتي لاتعتمد على الذبح الأسلامي في تايلند .. واحذروا من ماكدونالدز وكنتاكي وامثالهم .. لان ذبحهم ليس حلال وحتى البطاطس المقليه !! يقولنها بزيت الخنزير ( عزكم الله )
.
.
.
أستفدنا وايد من هذه الرحله ... وعرفنا معنى الانتماء الى الوطن !! عرفنا ان ماشي بلاد في هذه الدنيا تساوي بلادنا في الراحه والنظافه والمعيشه الرغده والثقافه والاسلام ...
وأول ماحلت الطياره على أرض بلادي الحبيبه .. شكرت الرحمن على النعمه اللي نحن فيها ..
.
.
.
تقبلو فائق مودتي وأحترامي ..
:smile125:
.
.
.