- بسم الله الرحمن الرحيم
بسم الله الرحمن الرحيم
بما ان هذا اول موضوع لي بعرفكم بنفسي انا شاب سعودي وسيم اقل شي بعين امي وزوجتي الله يخليهم لي وطبعاً بناتي العزيزات وابلغ من العمر 29 سنه من عام 2006 وانا عمري 29 ماتغير عندي ثلاث بنات 9 و 7 وطبعاً القعده 3 اللي قاعده لي في الطلعه والدخله * المهم مالكم بالطويله الموضوع ومافيه ان الاخوات بالكنترول يبون دزني لاند وطبعاً اللي ماتعرفونه ان سبب التسميه في الاصل دزني وادزك بما انها ملاهي بس عاد مع عوامل التعريه تغير الاسم
وانا هنا ابي الفزعه لاقتراحاتكم انا كنت ناوي قبل رمضان وتم التأجيل الى بعد العيد الذهاب في 5 سبتمبر والعوده في 16 ان شاء الله
الرياض - باريس - الرياض والله ياهي غاليه لاني حاجز متأخر فوق العشرين الف تذاكر
بالنسبه للسكن عندنا سكن دايم في اللا ديفانس بس عاد عليكم بالجدول انا ناوي اخلي البنات يحللون دزني وادزك بخليهم يكرهونها من كثر ما بوديهم لها وتراهم اول مره يطبون اوربا كلها هاه وش رايكم وش السوات
افراد الرحله
محاكيكم
تاج راسي زوجتي العزيزه
بنتي البكر 9 سنوات
الوسطى 7 سنوات
القعده 3 سنوات
المواصلات
المترو والقطار اذا ناوين تخلوني اطلع من باريس
نيتي السابقه
اطلع انترلاكن لمده اربعه ايام من 9-13 سبتمر بس مابعد صملت احسها مشوار رايح جاي مع ذا البنات علماً باني قد حجزت بفندق فيكتوريا بانترلاكن بس عادي يرجعون فلوسي بدون مايخصمون علي شي
امنية البنات
دزني وادزك + يلعبون بالثلج
امنية حرمنا المصون
تبي تشوف جبال خضراء وانهار وطبيعه تخقق
امنيتي انا
انهم ينبسطون ويستانسون ويسفهلون
الميزانيه مفتوحه خاصه ان السكن موجود في باريس ببلاش يعني اتمنى محطتي الاخيره كل يوم شقتنا
ماعندي جواب لسوالك بس حبيت ارد و ادعيلك الله يوفقك يارب ويسخرلك زوجتك وبناتك الحلوات مثل ماتدور سعادتهم