1. .. Audi A3 convertible


2. وهنا بدأت الطامه .. !!


3. وقلتلها جربي احين .. جربت وضبطت وطلعت لي الفاتوره ب 600 يورو !!!!!

السلام عليكم ورحمه الله وبركاته
أحببت ان اكتب التجربه التي مريت بها في فتره شهر العسل هذا الصيف اللذي تم على خير .. الا في موضوع تأجير السياره
قبل السفر ب 15 يوم اكملت الحجز لسياره
BMW 1 series convertible ( لازم ندلع المدام بسياره حلوه وكشف شهر عسل ومسوي فيه اني بطل )
المهم وصلنا مطار ميونخ بالسلامه ورحت لمكتب الشركه ف المطار وكنت مجهز كل الاوراق من الدوحه ف ملف لجل ماضيع واتلخبط ( جواز + رخصه قطريه + رخصه دوليه ... الخ )
المهم اول صدمه قالت لي ماعندنا البي ام دبليو الكشف ممكن نعطيك سياره ثانيه .. ياريت قالت مرسدس ولا قالت بي ام حجم اكبر ولا شي عدل قالت بنعطيك فولكس واقن البيتل ( هاذي المخنفسه ) وقالت لي هذي من نفس الفئه ومانقدر نضمنها لك .. قتلها ماراح اخذها وانا جدامي طريق جبلي وهذي السياره ماتشل عفشي وماتصرفني ..
المهم يمين يسار يمين يسار ماوافقت ع البيتل وطلعت لي :

.. Audi A3 convertible

المهم وافقت على مضمض وانا اللي معشم المره بالبي ام دبلو .. وقالت لي الموظفه 10 دقايق بس طال عمرك نخلص غسيل السياره وتستلمها ..
والله يالربع اني جلست ساعه وربع انا والحرمه ف كوفي قريب من المكتب وحالتنا تكسر الخاطر من التعب واحنا ننطر السياره وكل ربع ساعه اجيها اقولها وين السياره تقولي جايه جايه .. وهم يتغامزون ويطالعون بنظره جدا جدا حقيره وانا ماسك اعصابي
( اولا قدام المره اني الطيب وطالع فيها .. وثانيا اعرف اذا صارخت الوضع يقلب ضدي )
قالت لي عطني الفيزا ولا الماستر كارد عشان نخلص .. قلتلها ليش الفيزا انا دافع كلشي من الدوحه ومخلص وهذا رقم الحجز .. قالت لي بس نحجز مبلغ بسيط ..

وهنا بدأت الطامه .. !!

قالت لي ماتشتغل البطاقه .. كيف ماتشتغل وانا اللي رايح لشهر عسل ومعبي البطاقه فل ..حاولت وحاولت وماضبطت .. رحت ادور لي ف المطار على نت لجل اشبك وادخل على حسابي وازيد فيه المبلغ .. وفعلا أنا وحرمتي الله يقويها نجر ف هالشنط ف الجاري يمين ويسار لين ماحصلت النت وزدت ف الحساب رصيد ورجعت لهم .. اول ماقربت بدأت نظراتهم الخبيثه يعلها البط ..

وقلتلها جربي احين .. جربت وضبطت وطلعت لي الفاتوره ب 600 يورو !!!!!

قلتلها وش حق هذا ال 600 قالت لي انت تاخذ السياره من ميونخ وترجعها ف ايطاليا .. قلتلها صحيح بس انا دافع المبلغ بالكامل وهذي الفاتوره ووصل المبلغ اللي اندفع .. قالت لا المفروض مبلغ التوصيل تدفعه عندنا ..
على طول طلبت المسؤوول اللي طلع ف الغرفه ويعرف عن السالفه .. اخبث واحقر منها بألف مره !!
قالت هذا خطأ والمفروض الموظف ف بلادك مايخليك تدفع قيمه التوصيل اللي هي Drop off charges
والمفروض تدفعها هنا .. قلتلها ادفعها هنا و لاهناك ولا عند اهلك .. انا دفعتها .. رفع صوته وقاللي احنا خلاص خصمنا المبلغ منك .. واذا بغيته لما ترجع بلادج روح المكتب وهم بيعوضونك .. طبعا انا عرفت انه السالفه نحاسه .. فقلت بلاها من شهر عسل .. وبلاها من تميلح واني الحنون قدام المره .. وبديت بالشد مع المسؤول وانها مشكله داخليه بينهم انا مالي خص فيها .. المهم اتصلت ع المكتب واحمد ربي اني مسجل رقم الرجال اللي تعاملت معاه ف مكتب الدوحه .. تفاهموا وعرف المسؤول انه الرجال على خطأ .. وقالي خلاص بندفعك بس 300 يورو وراح ترجع لحسابك بعد 15 يوم ومبلغ ال 600 يور رفع السماعه وكلم البنك وقالهم ردوه .. استانست وفرحت وخذت السياره وانا رايح على مدينه Tegernsee
وصلت الفندق وعيننا من الله خير بعد كل هالمشاكل وريحنا شويات وقلنا نمشى ف السياره يوم شغلت السياره انا جايب معي جهاز النافيقيشن لانه مطور وفيه خصائص اكثر من جهاز السياره .. طبعا البطاريه فضت من الجهاز وانا جايمن المطار للفندق .. وجيت اشبك على شاحن السياره مايشتغل يمين يسار .. جربت الجهاز على سياره واحد صاف عند الفندق اشتغل .. عرفت انه شاحن السياره فيه بلا وخلل ( السياره كانت جديده وماشيه 900 كيلو تخيلوا ) ومايشتغل ومافيها الا مدخل شاحن واحد وانا فعلا ما اعرف الا على هذا النافيقيشن اللي عندي واستخدم عده اشياء للشاحن مثل الايبود وشاحن الجوال وشاحن النافيقيشن ..
اتصلت عليهم وانا فعلا واصل حدي .. قالوا لي بكل وقاحه ماعندنا نفس السياره .. اذا تبي بنعطيك فولكس واقن .. قلتلهم زين تجون تبدلون لي السياره .. قالت لي لا انت تجيبها مره ثانيه المطار قلتلها بس انا اول مره اسوق وما ادل والنافيقيشن مافيه شاحن .. قالت لي وبكل وقاحه وربي شاهد ( والله وقف اي محطه بنزين وخلي واحد يعلمك كيف توصل لنا ) .. دبرتها ورجعت المطار .. وبدلت بسياره نفسها بالضبط عقب هوشه ثانيه ما ابي اوجع راسكم فيها .. كل هذا ومرتي معي واحنا ف اول يوم شهر عسل ..
رجعت الفندق وع طول ع النت اشيك حسابي .. واكتشف الصدمه الثالثه .. انهم حاجزين على 600 يورو + 300 يورو .. وكذب على المسؤوول وحجز على المبلغين !!
رجعت الدوحه وطبعا وصلت الموضوع فوق للبنك .. والبنك ماقصر معاي ووقف بظهري .. وتفاهم معهم ورجعوا لي المبلغ ناقص 200 ريال ..
وهذي بكل بساطه نتيجه واحد لسانه طويل وباله أطول .. كيف لو واحد ماله بارض ولا باله مب طويل .. ماراح ينصبون عليه عيال الحرام ؟
ربي ييسر لكم كل خير .. ويبعدكم عن هالشركه اللي ماراح اتعامل معها ابدا !!