بسم الله الرحمن الرحيم
اللهم صل على الحبيب واله الطيبين الطاهرين واصحابه والتابعين
مساء الخير
بالنسية لاستخراج الفيزا
بصراحه انا جيت من برى الرياض ورحت لمكانهم القديم بالسليمانيه في عمارة الصفوة بوابة 2 مقابل السدحان
الا واحد الاشخاص من الجنسية الهندية عند الباب يقول لي فيزا قلت ايوه على بالي انه شغال معاهم بالسفارة
الا يقول لي 480 ريال وانا اصلحها لك ماتسوى علي جاي مشوار قلت لا ابغي السفارة قال بام الحمام في هايبر بنده
واخوكم يالله يدل المملكة والفيصليه بالرياض وخذ مشاوير واروح للسفارة على بالي انها تخلص بسرعه الا يقولي السيكورتي اللي ببوابة السفارة لا روح لشركة الاعتماد مافيه الا ذا الحل طبعا شركة الاعتماد في ام الحمام قبل مقبرة ام الحمام في هايبر بنده بس مافيه شي يدل على المكتب لالوحات ولا شي واروح هناك الا ومجموعه من الهنود يخلصون لك الاوراق قبل تدخل السفارة من مكاتب انا رحت لمكتب مقابل هايبر بنده وصلحه لي مقابل 80 ريال على انها ماتسوى بصراحه لكن مافيه وقت اني اجلس اصلحها واللغة يالله بالخير
طبعا المطلوب:
1- تعبئة ورقتين ببيانات تحصلها بموقعهم علي النت او من السفارة او اي مكتب
2- صورتين شخصيه
3- صورة لبطاقة الاحوال
4- صورة لحجز الطائرة باللغة الانجليزيه
5- صورة من حجز الفنادق في الهند
طبعا لهم وقت من بعد الظهر الى الساعه الثانية ظهرا راحه
بعد الساعة 2 اخذت رقم وقدمت الاوراق ودفعت لهم 238 ريال واخذت منهم وصل وبعد اربعه ايام ان شاء الله استلمه على طريقهم مب لازم نفس الشخص يستلمه على حسب كلام السيكورتي اللي كان بالمكتب
الحجز بالطائرة الحمد لله حصلت سعر زين من الخطوط القطرية ب1517 بموقعم
خط الرحلة الرياض - الدوحه - ترافندرام
الاياب ترافندرام - الدوحه - الرياض
بالنسبة للتوقف بالدوحه لايتجاوز الساعه بالذهاب والاياب
انا رايح لوحدي للعلاج واسال الله ان يكللها بالعافية ان شاء الله والشفاء اولا واخيرا من الشافي الله سبحانه وتعالى
ادري ان كثرت الكلام لكن المقصد اني اوضح لكم المطلوب وتقبلو تحياتي