بعد تخطيط وأخذ نصائح الأحبة في هذا المنتدى قررت أنا وأحد الزملاء زيارة ألمانيا والنمسا في شهر سبتمبر القادم
المهم اتفقنا نطلع الشنقن من السفارة الألمانية ، ودخلت على موقعهم ونزلت النماذج والطلبات و كل ما يتعلق بإصدار الفيزا .
وأتوكل على الله اليوم الصباح ومرتز عند السفارة من الساعة 8.30 ، وجيت عند الي ياخذ الأسماء على الباب وأتفاجأ أنه يقول خلاص ما فيه تقديم على فيزه هنا في السفارة رح لمكتب إصدار الفيزا الموحد في طريق الملك فهد .... تحطيم
المهم ونتوكل على الله ونروح للمكتب ويوم طلعنا للدور الخامس ألا الدنيا ظلام دامس ، وأقابل حارس الأمن وقال ما نقتح إلا الساعة 10 ... تحطيم من جد
وأرجع لهم 10:30 واشوى فاتحين بس بصراحه ميتين يالله يتحركون فيه أربع موظفين فقط على الكاونترات . وهم يقومون بفلترة الأوراق وبعدين عرضها على السفارة وبرسوم : 90 ريال لكل طلب !!
المفاجأة أنه قال لازم مقابلة في السفارة ، قلت ياخي أنا العام مطلع شنقن من السفارة الألمانية وعن طريق السفارة ، قال أيه النظام ألحين إذا كنت مطلع شنقن مرتين وأكثر نقدر نطلعها لك بدون مقابلة أو سبق وكان عندك فيزة شنقن من ألمانيا مدتها سنة ... قلت الشكوى لله مقابلة مقابلة وعطونا موعد على يوم الثلاثاء الجاي.
الغريب أنه قال لازم ترجع لنا بكرة عشان تاخذ الجواز والطلب حقك وتروح فيها للمقابلة في السفارة !!! قلت أجل أنتم وش دوركم ؟؟ ليش ماخذين 90 ريال ؟؟؟ عشان دبست الصور في الطلبات ؟؟؟
ما رد علي وقال هذا النظام ... أمحق
باختصار الطلبات تغيرت عندهم وصارت أسهل ، المطلوب :
1. تعبأة طلبين موقعه من صاحب الطلب .
2. صورتين شخصية حديثة .
3. تعريف من العمل .
4. التأمين الصحي .
5. إثبات حجز السكن .
6. صورة من الجواز .
7. نموذجين جديدة فيها تعهدات مدري وشي ما قريتها المهم تحتاج توقيع .
فقط فقط فقط .... يعني بدون تذاكر سفر ولا كشف حساب .
وهذي صورة من قوقل إيرث توضح موقع المكتب ، الدور الخامس
دوامهم من 10 الصباح إلى 4 العصر
بالتوفيق للجميع وصيام مقبول إن شاء الله