السلام عليكم ورحمة الله تعالى وبركاته
اشحالكم شخباركم
قوا اشلونكم ((ههه هلي اعرفه بالكويتي))
يالله ان شاء الله بزوركم وبتعلم كلامكم الحلو..
المهم اخواني
انا حبيت اعيد عندكم هل سنه
قلت ثالث يوم العيد بشل قشي انا والمدام وبنطير للكويت وبنجرب العيد بالكويت كيف لانه دوم اشوفهم بالاعياد ماشاء الله احتفالات و مهرجانات و مسابقات فحبيت احضر..
المهم الحينه بغيت منكم استفسارات
بأذن الله الواحد الاحد ع الساعه 10ونص 11ونص 12 ونص ها بهل احدود بتوصل طيارتي للكويت بيصادف يوم الاحد يعني ثالث يوم العيد
فبغيت اول ماوصل المطار ابغي احجز لي احد انواع هل سيارات (اكس 6 او اكس5 اول رنج اسبورت او مرسيدس)
فممكن تعطوني رقم مكتب الاقي فيه هل سيارات ويقدر يوفرها لي بالمطار يعني استلمها من المطار واسلمها للمطار..((انا شفت موضوع ان في مكاتب بالمطار بس للاسف ماحصلت عندهم السيارات اللي ابغيها)) يمكن فيه بس مالقيت واذا في بالمطار مكتب عندهم نفس السيارات اللي ابغيها ياريت تعطوني رقم المكتب مع فتح الخط او تنصحوني بمكتب زين وعنده سيارات مضبوطه
ثاني شي بغيت اسم فندق محترم و مميز وخدماته راقيه ويكون بمنطقة حولي او السالميه ((بتقولون ليش هل منطقتين لانه عني افداكم بحولي يزاه الله خير واحد من ربعي حجز لي اول يوم تذكره لمسرحيه قالي حلوه وبتعجبك فقلت باخذ فندق قريبه من حولي_ وبالسالميه ناس يقربون حق قوم ابوي بروح ازورهم))
وسؤال السالميه وحولي بعيده عن بعض وله قريبه من بعض..((كم المسافه بينهم))
نفس بوظبي ودبي وله اقل
وثالث شي واهم شي
ابا جي تنصحوني بالاماكن اللي ازورها بالكويت وقت الاعيااد
من يوم الاحد لين الثلاثاء
وبكون شاكر لكم وايد وكلكم على قلبي
((واذا احتجت شي راح اتواصل وياكم_ حد قال لكم تعطوني ويه))
وبنتظار ردودكم
السموحه منكم لو فيه اي ازعاج
وربي يحفظكم ومع الف سلامه
خويكم ذيب الغربيه