1. قبرص جزيرة جميلة يحيط بها البحر من كل صوب ..


2. 7. ستاربكس كافيه.


3. 8. سبارو .. مطعم ايطالي.


4. 1. book of cyprus


5. 2. طيران البحرين .. الفنادق. http://www.bahrainair.com


6. 2. يانغوس للسياحة ( 99638548 ).


7. 3. الباصات داخل ليماسول ( 25355273 ).


8. وتاتي نيقوسيا بين لارنكا وليماسول من الاعلى بحسب الخريطة


9. لارنكا:


10. ليماسول:


11. طبعا الفنادق في ليماسول مستواها راقي جدا

السلام عليكم
سفرتي هذا الصيف كانت إلى قبرص .. ومن المعلوم ان قبرص انتقلت من دولة اوروبية عادية جزء منها اسيوي إلى دولة اوروبية ضمن الاتحاد الاوروبي من 1 يناير 2008م..
التاريخ : 16 اغسطس - 25 اغسطس 2008م ( الصيف )
اللغة : الانجليزية + اليونانية
العملة : اليورو ( يعادل 600 فلس بحريني / 6 ريالات سعودي )
الجو : اشبه بجو الخليج يميل الى الاعتدال من المغرب.
معلومات عامة :

قبرص جزيرة جميلة يحيط بها البحر من كل صوب ..

القليل من المطاعم فيها مطاعم اكلها حلال .. اغلبية الفاست فود ماهو حلال .. غير بعض المطاعم العربية.

• الاسعار غالية جدا والمشكلة ان كل مكان له سعر يعني لو رحت بتشتري بيبسي مثلا القوطي 330 مل .. تلاقيه بمكان بيورو ( 6 ريالات سعودية ) ومكان 3 و ممكن يوصل بالمطاعم لي 6 يورو يعني تقريبا 36 ريال سعودي.
• كل المطاعم المشهورة لقيناها اهناك واكلهم بعد حلو بس حاسب لانه ممكن يجي فيه خنزير لازم تخبرهم انك مسلم وانك ما تاكله ..

من المطاعم اللي شفتها ..
1. ماكدونلز. ( ارخص مطعم).
2. برجر كنغ.
3. كنتاكي .. وكثير غالي والاسعار معكوسة يعني التوستر اغلى شي عندهم.
4. بيتزا هت
5. فرايدز
6. هاكن دز .. الايسكريم.

7. ستاربكس كافيه.

8. سبارو .. مطعم ايطالي.

• الوقت في الصيف ما يفرق عن وقت البحرين والسعودية والكويت نفس التوقيت 3 + عن توقيت غرينيش.
• مستوى الفنادق .. طبعا الفنادق في الفترة اللي رحناها كانت جيدة جدا إلى ممتازة من فئة 4 نجوم وراح اعطيكم اسامي الفنادق لاحقا .. الاسعار تقريبا 50 دينار بحريني الليلة .. إلى 100 دينار بحريني عن طريق النت طبعا في موقعين ممتازين حجزنا عليهم بالكردت كارد..

1. book of cyprus

2. طيران البحرين .. الفنادق. http://www.bahrainair.com

• قبرص تحتاج فيزا .. واللي من البحرين يقدر ياخذها عن طريق القنصلية على طريق البديع بعد مطعم الجملة في شارع على اليمين تروح في كمباوند اهناك في مكتب القنصلية ياخذون على الشخص تقريبا 6 دينار ونص وتجهز خلال اسبوع.
• اجراءات السفر والمطار... سفرنا عن طريق طيران الخليج وكان فيه طيران الامارات وفيه الطيران القبرصي بعد الرحلة من البحرين تقريبا 3 ساعات .. وكانت ممتازة عن طريق طيران الخليج . وقيمة التذكرة على الدرجة السياحية 188 دينار بحريني من مطار البحرين الدولي لي مطار لارنكا. وافضل ان يكون المسافر قبل 3 ساعات من مطاره لي مطار لارنكا والعكس.
• الشعب مسالم وحبوب جدا جدا جدا والديرة أمان جدا .. ماعدا سواقين الباصات اللي داخل المدن واللي بين مدينة ومدينة.
• الحمامات كرمكم الله من غير ماي يعني لو تبي تتغسل لازم تدخل البانيو ..
• المواصلات:
• التاكسي غالي جدا جدا جدا .. يعني اقل مشوار ما يقل عن 10 يورو فانصحكم بالانتقال عبر التالي:

1. داخل المدينة الواحدة عن طريق الباصات وهي توديك من مكان لي ثاني بيورو ونص .. تقريبا دينار بحريني. (رايح بس) وهي متوفرة بشكل كبير ومكيفة وتقريبا يمر باص كل 20 - 30 دقيقة عند كل محطة.
2. من مدينة لي مدينة .. في عندهم شي اسمه ( ترفل اكسبرس ) يودي الشخص من مدينة لي مدينة تقريبا من 11 يورو إلى 20 يورو .. وهو سعر جدا ممتاز ويعتبر باص مرسيدس مكيف لي 8 ركاب وتقدر تتصل فيهم ويجون يودونك من المكان اللي انته فيه لي وين ماتبي بالضبط لي المدينة اللي تبيها والمكان اللي فيها بالضبط وهي خدمة ممتازة جدا.

• اللي يحب سياحة التسوق ما افضل انه يروح .. لانه قبرص تصلح للي يبي يسافر من اجل النقاهة والتمتع في البحر وبرك السباحة المفتوحة والكافيهات الجميلة جدا جدا جدا .. شوفو جم مرة حطيت جدا .. روعة ووفيها سوق مب مافيها بس مافيها مجمعات. واللي يحب التراث بعد حلوة قبرص للتراث.
• الاجازة الاسبوعية : السبت والاحد .. طبعا المحلات عندهم معظهما مسكر يومي السبت والاحد ولو ان المطاعم والكافيات مفتوحة لي غاية 1 او 2 بالصبح وتفتح 8 الصبح
• أرقام الاتصال للفائدة..

1. ترفل اكسبرس للتنقل بين المدن ( 77777474 ).

2. يانغوس للسياحة ( 99638548 ).

3. الباصات داخل ليماسول ( 25355273 ).

• الشبكة للهاتف الجوال: افضل اسخدام شبكة cypvoda لانها الافضل حقيقة علما بان هناك فوادفون وareeba.
• فيه خرايط موجودة في المحلات الي موجودة لكل مدينة فيها معظم المحلات المشهورة.
• المدن:

طبعا نصيحة للي يبي يروح قبرص لازم يتنقل فيها مايقعد مكان واحد
المدن التي تستحق الزيارة.
ترتيب المدن ( بحسب الترتيب في الخريطة )
ايه نابا لارنكا ( المطار ) ليماسول بافوس...

وتاتي نيقوسيا بين لارنكا وليماسول من الاعلى بحسب الخريطة

لارنكا:

يومين او 3 ايام .. جميلة جدا يفضل السكن بالقرب من الكورنيش .. انا سكنت في فندق 4 نجوم اسمه sunhall hotel واحد من اشهر الفنادق .. فيه نوعين من الغرف اما غرفة فندق او شقة وحقيقة الشقة كبيرة جدا .. بس الفندق قديم شوي .. انا سكنت يومين في لارنكا يوم الوصول ويوم قبل المغادرة بس صراحة تستحق اكثر من يومين. الكورنيش يهبل وفيه مباشرة سوق وراه وقدامه بحر .. وكافيهات ومطاعم جميلة وبارات.

ليماسول:

تستحق 4 ايام .. طبعا مدينة جميلة وعلى فكرة المدن كلها تتشابه.. يعني شارع على البحر والفنادق مطلة والجهة الثانية المطاعم والمحلات التجارية والكافيهات اللي تجنن.
ممكن في ليماسول تزور سوق شعبي فيه محلات حلوة بس غالية كلها صناعة قبرصية يدوية.وفيها بركة سباحة للالعاب مثل جنة دلمون المفقودة في البحرين اسمها (فاسوري) اللي هي تحتوي على العاب مائية جميلة ومسلية تستحق يوم كامل ( من 10 الصباح لي 6 المغرب ).

طبعا الفنادق في ليماسول مستواها راقي جدا

احنا سكنا بفندق 4 نجوم لكنه افضل من 5 نجوم عندنا اسمه مديرتانين هوتيل.. وفيه الفور سيزون يمنا كان جميل جدا والميرديان بس غالي شوي. واتلاس. ولوندا جميل وموقعه جميل جدا..
ايضا من ليماسول ممكن زيارة نيقوسيا وهي تكلف رايح جاي بالترفل اكسبرس 22 يورو ... وبصراحة سوقها جميل جدا ماركات حلوة للحريم والرجال ( دبنهامز علما بانه موجود في ليماسول ، نكست ، زارا ، واسواق حلوة ماذكر اساميها. ومن خلال نيقوسيا ممكن تروح متحف روسي جميل في نهاية شارع السوق الدخول ب5 يورو .. فيه صور الشخصيات الكارتونية والافلام مثل متحف الشمع يستحق الدخول.. وبعده مباشرة لو كان معك جوازك تقدر تعبر الحدود بين قبرص اليونانية اللي احنه فيها وقبرص التركية .. علما بان الحدود تضحك احنا عن نفسنا عبرنا وماندري ان هاذي حدود.
ايضا من خلال ليماسول ممكن زيارة جبال ترادوس الروعة بصراحة .. احنا رحنا هاذي الرحلة الجميلة معا شركة اسمها يانغوس في لاند روفر ووصلنا لاعلى قمة في قبرص وشفنا شلالات جميلة جدا وباردة ومايها حلو .. وقطفنا انواع من الفواكة والخضروات اللي لا يمكن اتشوفها في دول الخليج. وتغدينا واحد من اجمل الاكل اللي كلته بحياتي في مطعم جميل واكله روعة. هاذي الرحلة تكلف للشخص 100 يورو للشركة 14 يورو للغدا طبعا لازم تخبرهم انك مسلم عشان يعطونك دجاج او سمك .. وتمتد من 9 الصبح لي حد 4 ونص العصر. بس فعلا جميلة .. كما يوديك سوق شعبي وقرى جميلة تشوف فيها عواجيز يشتغلون اعمال يدوية.
بصراحة انصح اللي يروح انه يصرف على هاذي الرحلة لانها روعة ويشحن الكاميرا من الزين لانه راح يصور كثير.
هاذي بالنسبة لي ليماسول.. البحر جميل جدا جدا جدا نظيف مافي لا حصى ولا وسخ .. وبارد جدا وجميل للسباحة.
ايه نابا: تستحق يومين اسمها مدينة الشباب وفيها حديقة ملاهي جميلة بسيطة بس العابها حلوة في وسط ايانابا .. وفيها مدينة مائية اخرى بس كبيرة جدا اسمها waterworld وهي الاكبر في الشرق الاوسط .. وفيها محلات حلوة وفيها كافيهات جميلة جدا في وسط الفوضى بس نصيحة ( ايه نابا عبارة عن شارع طويل وفي نهاية الشارع على اليمين كورنيش وعلى اليسار محلات .. لغاية الوصول لي منطقة خاصة بالبارات احذر منها لانها مخيفة اشبه بافلام المجرمين في امريكا " انصح بعدم الذهاب لها" )
فندقنا كان راقي بس عيبه بعيد عن المناطق الحيوية .. يعني تقدر تقول مسافة 4 كيلو بس جميل جدا وكبير جدا وكان غالي الليلة 107 دينار بحريني اسمه اولمبيك لاغون ريستور وبركة السباحة فيه اتجنن حقيقة
بافوس : تستحق يومين رغم اني مازرتها بس اسجل لكم شهادة صاحب لي تشبه لارنكا وفيها مطار اخر بعد بس ماعندنا طيران يعتمد عليه يعني كلهم مطار لارنكا.
بالنسبة للتنقل من مدينة لي مدينة ترى ماياخذ ووقت كلها نص ساعة بالكثير.
هذا كل ماعندي .. اقدر اكتب بالتفاصيل بس المشكلة ماعرف انزل الصور لو حد يعلمني في الردود اكون شاكر له ..
وانا جاهز لكل الاسئلة ..