Jadeed
30-09-2022 - 03:32 pm
تقوم الاستعدادات على قدم وساق بالتجهيز للقيام برحله بريه الى ديرتنا الغاليه مملكه البحرين
المده باذن الله ستكون من 5 الى 7 ايام
السكن :
باذن الله في اليت سبا والا حواليه
الهدف من الزياره :
الترفيه
البرنامج :
اليوم الاول ( واصل حدي ومالي خلق احد يكلمني - كل الامور بيد ام العيال هي اللي تتكفل في هالامور )
اليوم الثاني :
مصبح العيال من صباح الله خير لتناول الريوق ، شرط الخبز ايراني والشاي بقلاصات ومايهمني شنو محتويات الريوق بس لابد من الجبن الابيض .
بعد الريوق بآخذ العيال الى محميه العرين واللي اتوقع بنخلص حوالي الثانيه ظهرا.
بعد المحميه نتجه الى مطعم ايراني ويكون اما اللي في العالي او اللي على البحر .
بعد الغدا ... لابد من القيلوله ... قليلا.
حوالي المغرب .... نتجه باذن الله الى العالي للعب الاولاد .. ثم الى الكورنيش للاستراحه واللعب مع العيال كوره والا طرحي
حوالي الساعه العاشره ... لابد لنا ان نلتزم بمقر الاقامه.
اليوم الثالث :
يخصص - بعد الريوق وافضل موقع على البحر - نفتر بالسياره لاكتشاف كل ماهو جديد في شوارع البحرين الغاليه ... ثم الغدا في مجمع السيف يتمشون العيال لقضاء حاجياتهم من المشتريات.
قبل المغرب ... القيلوله وبعد الصلاه الخروج الى سوق المحرق علشان العيال يتمشون وانا اقعد عند احد المحلات واطالعهم من بعيد ..
اليوم الرابع :
بعد الريوق الخفيف.... طبعا الى ********> جنه ديلمون .
وعلى مايخلصون العيال ( متى ما ملوا ) نتجه الى البيت .. وبعد المغرب نطلع انا وام العيال علشان هي تتسوق بسوق المنامه القديم.
اليوم الخامس :
اذا حصلو العيال مني ريوق يكون خير وبركه .. بعدها الى تاجير لنج ويكون بعد صلاه العصر وحتى مغيب الشمس .. يمكن ايحوشنا شويه حداق .. واللي نصيده ام العيال لازم تطبخه لغدا ثاني يوم.
واذا الامور طيبه قعدنا اليوم الثاني والا الغدا بيصير في الكويت .
والا بالليل نروح منتزه عين عذاري .. ونقضي طول الليل هناك .. وحتى العشا بعد هناك
في اليوم السادس - اذا قعدنا - فاخليه للتجول بين الاسوقه والمولات بهدف التشري والهدايا ( هين ).
في اليوم السابع وبعد الريوق باذن الله بمر احد المصانع واخذ حلوى من شويطر وماي لقاح ( لزوم الدوانيه )
وان شاء الله بمطلع اليوم الثامن نكون في الكويت ان الله اراد.
شرايكم في هذا البرنامج السريع ... واللي عنده اي مقترحات ... لايبخل عليناترى كله منكم شوقتوني للبحرين والمواقع اللي حطيتها كلها منكم،
ما شاء الله عليك
بالتوفيق ان شاء الله
بس لا تنسو شوربت الروبيان ما تتفوت الحارة
من مرمريز
بس ما عندهم شي طيب غير الشوربة
لان اخترب مش زي اول