اهلين .. وسهلين .. للجميع ..
كيفكم .. ان شاء الله طيبين .. ؟
انا كتبت هالموقف اللي صارلي في ساحة لندن .. بس رجعت كتبته هنا .. عشان يشوفه أكبر عدد ممكن
من الأخوان والزملاء في المنتدى .. ويعرفون ان بعض التصرفات الحمقاء تودي في ستين داهية ..
وما اطول عليكم .. تفضلوا خذوا السالفه من طقطق الى سلام عليكم ..
صارتلي قصة .. اسكتوا بس .. والله عرفت لحظتها اني مادري ايش ابي من حياتي ..
كان هالموضوع يوم السبت اللي طاف قبل ثلاث أيام .. طبعاً انا جاي لندن بلحالي .. ومو من عادتي اني بعد
الساعه 12 بالليل أطلع ( يعني 2 صباحاً بتوقيت السعودية ) .. يعني خلاص طول النهار اكون طالع
يا أتمشى بروحي .. أو أتسوق مثلاً .. أو أسوي أي هوى في الدنيا .. وهنا في لندن لي ربع كثير بس
ما اقابلهم واجد .. لأني انا ما ابي .. يعني خلاص نشوف بعض في السعودية .. أما هنا كل واحد ينبسط
بطريقته .. بس مايمنع اني اذا بغيت التقي فيهم أروح اقابلهم بعض الأحيان .. وفعلاً صارت اني قابلتهم كم
مره في أكثر من مكان .. بس لقاءات عابره وماتكون فتره طويله .. يعني ساعه بالكثير اقعد معاهم وأمشي
عاد في يوم السبت سلمكم الله اتصلوا علي الشباب وقالوا ابراهيم شوف ترى احنا بكره مسافرين ونبيك
اليوم تقعد وتسهر معانا مو زي كل مره تقعد معانا نص ساعه او ساعه وتمشي .. عاد انا قلت لحظتها
بيني وبين نفسي( ياوجه استح ) دام ان البشر طلبوني خلاص يالله خليني اضغط على نفسي
شوي واسهر معاهم .. لأن رحلتهم كانت صباح اليوم الثاني ومايبون ينامون ويبون يقضّون الوقت بأي طريقه
لأنهم قرروا يروحون المطار ( مواصلين ) كعادة الشعب السعودي يعشق شي اسمه ( يواصل لليوم الثاني )
المهم ماعلينا .. قمت من النوم يوم السبت ولقيت اتصالات ومسجات منهم عاد انا خلاص فهمتها وقلت
اوكي .. انا بقضي يومي عادي زي كل مره .. واذا جاء بالليل الله يعيني بروحلهم .. المهم عاد قضيت يومي
المعتاد مابين تمشيات وتسوق .. الين جات الساعه 11 بالليل وتوجهت للأندرجراوند ( وسيلة النقل المفضّله
عندي وما استعمل غيرها بلندن ) ورحت للهوتيل .. ما أمداني أغيّر ملابسي وآخذلي شاور الا وواحد من
الشباب الحلوين ويدعى سلطان يدق علي .. قلت يالله نسيت اني لازم اطلع معاهم .. لحول .. طيب
ورديت على الجوال هلا سلطان حبيبي وينكم انا قاعد انتظر اتصال منكم ( ومنّاك لا انتظر اتصال ولاهم
يحزنون ) اصلاً كنت ناسي الموضوع .. قاللي احنا في البيكاديللي وننتظرك .. قلت أوكي .. والله وأغيّر وألبس
وآخذ معاي بطاقتي (oyster ) بطاقة الأندرجراوند والباص وتوجهت للاندرجراوند خط البيكاديللي ونزلت في
البيكاديللي سيركس .. ومشيت شوي قريب من التراكاديرو الا وأشوف سلطان وبدر والحلوين كلهم .. المهم
عاد تمشيت معاهم وقضينا وقت حلو بس عاد انا كان فيني نوم حدّه .. قعدت معاهم تقريباً للساعه 3
صباحاً .. وخلاص سلّمت عليهم على اساس انهم بيمشون مابقى على طيارتهم الا كم ساعه وكان الجو
ممطر ونسيت مظلتي ما اخذتها معاي :x1: والمطر ينزل وبغزارة واخوكم يتبلل وحالته حاله .. وقلت عناد مارح
أركب تاكسي وأخسر 5 او 10 باوند أو يمكن أقل شوي .. دام أن معاي بطاقة (oyster ) وأشحنها اسبوعياً
ماهمني تبللت او ماتبللت بركب الباص واللي يصير يصير .. المهم والمطر يزيد .. وانا من جد لاعت كبدي
بس ابي ارجع الفندق بأي طريقه .. وفي الأخير وقفت عند موقف الباص اللي في البيكاديللي وبصراحه
شوي لخبطني بس مافهمت وعاد وأنا فيني النوم .. يعني آخر حلاوة كان الوضع عاد المهم وصل باص
مادري كم رقمه بس لقيت مكتوب فوقه ( victoria ) .. سألت سواق الباص قلتله أبغى الباص المسائي اللي
يودي على هلبورن .. قال اركب معاي الى محطة فكتوريا ومناك خذ الباص حق هلبورن .. عاد ركبت مع الأخ
وتوجهنا لمحطة فكتوريا وطوّل مره .. (وقلت بيني وبين نفسي لو انك ماخذ تاكسي ومشتري راحتك
كان أحسن من المرمطه اللي انت فيها) .. المهم وصلنا محطة فكتوريا الساعه 4 الفجر قعد يمشي فينا
تقريباً نص ساعه لأنه كل شوي يوقف .. وانزل محطة فكتوريا والقى عشرين باص واقف يمكن .. وأسأل وين
اللي يودي هلبورن قالوا باص رقم N8 .. قلت الله الله الله عليكم ياحلوين الحين عاد يهون التعب أهم شي
اني سويت اللي براسي وحلّلت بطاقة (oyster ) اللي عندي وركبت فيها باص أول مره ومادفعت في
التاكسي ولا ( pence ) .. وأركب باص هلبورن وسألته كم المده الين نوصل قال 40 دقيقه .. قلت بيني
وبين نفسي مو مشكله عادي يهون كل شي أهم شي سويت اللي براسي ( والله واختارلي أطلق وأحلى
مكان في الباص وأبسّط فيه ومدّدت رجولي ) وتحرك الباص متوجه لعدة أماكن ومن ضمنها هلبورن .. المهم
عاد وأنا قايل لكم فيني نوم العالم كله .. وأخوكم في الله اللي هو أنا مادري اشلون ماقدرت اقاوم النعاس
ونمت !! .. وما ألقى نفسي الا يجي السواق يقومني ويقول ان الكل لازم ينزل هذي آخر محطه .. ومادري
والله وين نزلنا بس محطه بعيده مره وقمت مفزوع وقلتله انا ابغى هلبورن قال يابو الشباب
هلبورن عديناها من زمان والحين الباص هذي آخر محطه له وبيوقّف نص ساعه بعدين بيرجع على نفس
اللاين .. وأنا مو تحطمت .. مو ندبت حظي:112: الا ابغى اشوف الحين أنا وين .. وايش وضعي وكيف ارجع
الفندق لو ادفع 100 باوند (وقلت بيني وبين نفسي لو انك دافع 10 او 5 باوند من جهة البيكاديللي
وتركت عنك الحركات اللي مالها داعي وكان 10 دقايق وانت في الهوتيل كان أبرك لك ) المهم .. وأناظر
ساعتي الا وهي الساعه 5 وربع .. وأدوّر تاكسي .. من هنا .. من هناك .. ياناس .. دخيل الله .. والله ولا
حولي أحد .. عاد وفيني النوم وحالتي حاله ومعتفس مع الصدمة الأليمة والواقع المر اللي انا فيه .. وقلت
ياولد مالك الا تمشي على رجلك الين ربي يفرجها عليك ويرسلّك تاكسي او اي ابن حلال يوقف لك ( اما اي
ابن حلال يوقف لك وفي لندن وفي هالوقت ايه هيّن ) .. المهم وأدقها كعّابي مشيت ستريت لايمين ولايسار
تقريباً ثلث ساعه لا ومشي سريع نفس الانجليز عشان محد يفكر يخطفني او شي من هالقبيل .. عشان
أي أحد يمر من جنبي وله نية خبيثه يقول لا هذا فاهم البلد كويس عشان كذا مشيته سريعه وبكل ثقه
عاد بعد 20 دقيقه مشي لقيت محل مكتوب عليه ميني كاب اربع وعشرين ساعه وماتبون تشوفون
ايش قد تشققت من الفرحه لما شفت هاللوحه والمحل مفتوح وأدخل المحل وقلت ابي سياره
توديني لمنطقة هلبورن في الهوتيل الفلاني .. قال اوكي ادفع 23 باوند والحين توصلك سياره .. قلتله ليش
3باوند ( برضوو رجعت اتفلسف في موضوع الفلوس ) قال لأن هلبورن بعيده مرره ترى انت في آخر الدنيا ..
المهم عاد قلتله هذي 25 باوند .. وال 2 باوند هذي هديه مني لك ..
عاد والله ركبت في السياره وعيني مبقّقه وفاتحها عدل ولانمت ولانعست ولادقيقه .. وراكب في السيت
الخلفي بكل أدب واحترام وزي الألف مافيه ولاحركه ولاهمس ..
المهم وماصدّقت على الله اني اوصل وأشوف الفندق .. وفعلاً وصلت الفندق وعمّت الفرحه ارجاء البلاد
وقمت ارقص من الفرحه ( مع اني ما احب ارقص ) ..
وبس من دخّلت الكرت في باب الغرفه وفتح الباب وهاتك يارقص وانبساط وكأني سويت انجاز .. ( مادريت
اني قاعد ارقص وانبسط على خيبتي ) .. لأني لو متصرف بشكل سليم كان ركبت تاكسي من جهة
البيكاديللي من أول ماشفت محطة الأندرجراوند مقفله .. بس عاد اللقافه وماتسوي وماتنتجه من آثار ..
وقالوها ( ياغريب خلّك أديب ) ..
وبس ياحبايبي .. وأدري اني طولت عليكم مره .. بس والله ماحبيت اني افوّت اي لقطة عليكم من الفلم
الأكشن بدون ماتشوفونها وتعلقون عليها ..
وأترك لكم التعليق في اللي صار لأخوكم العبد الفقير الى الله ..
برهوم