السلام عليكم ورحمة الله وبركاتة
عدنا والعود احمد .. من رحلتنا الصيفيه الشتويه 2010
بصراحه اصعب ماعندي اكتب موضوع او تقرير او تعبير وخاصه البدايه
لكن بحاول ابسطها على قد ما اقدر وتكون على قدي ..
في البدايه بشكر كل من كتب موضوع او رد على استفسار عضو لان في كل حرف كان لي استفاده ومعلومه
اضيفها لمعلوماتي السابقه .. جزاكم الله خيراً وشكراً لكم جميعاً وماكان نجاح وتوفيق سفرتنا من الله وثم انتو ..
ورحم الله فقيدتانا قلوب مسافره و احلى كيميائيه رحمهما الله بواسع رحمته
تقرر السفر تاريخ 2 وتم اجراءات الحجز عن طريق مكتب سياحي ( اكبر غلطه ) ماكان بالمستوى المطلوب ولا بالخدمه
وحجزهم كان مش ولا بد ! والاخ كان حاط اسماءنا في الويتنق لست من شهر 2 لشهر 6 واحنا دافعين في شهر 3 !!
وماسلمنا فوتشرات الحجز الا قبل السفر بأسبوع ونص وماكان مكلم مكتب الطيران يحجزون لنا في فندق المطار على
حسابهم الا بعد ما قلنا له وكان كل كلامه انتو روحو وبتلقون كل شي جاهز ولو لا متابعتنا له وتاكدينا عليه ما اعتقد كنا
بنسافر .. لذلك انصح الكل يبتعد عن المكاتب السياحيه ويسوي كل شي بنفسه ..
و واحد من افضل مواقع حجز الشقق في استراليا ومن تجربه الاعضاء
Stayz Holiday
http://www.stayz.com.au/
الموقع عباره عن اصحاب الشقق او مكاتب العقارات لتأجير الشقق يبون يأجرون شققهم وعارضينها بالصور و
اسعارهم جدا معقوله وارخص من المكاتب وموقع بوكينق انا كنت ناويه احجز منه لكن للاسف ما لقيت
شقق بنفس البرج او الطابق .. وعن طريق الموقع ترسل لهم بياناتك وعدد الاشخاص والايام والايميل
وهم راح يردون عليكم بالايميل او تتصلون فيهم مع مراعاه فرق التوقيت بينا وبينهم و بعضهم راح يقولك انا بتصل عليك
وبتفاهم معاكم في الوقت اللي يعجبكم وانصح الجميع قراءه تعلقيات واراء الناس في الشقه و عدم ارسال اكثر من 500$
كضمان والاتفاق معاهم باقي المبلغ عند الوصول ..
تم اعتماد قولد كوست المدينه الوحيده في استراليا ولمده 14 ليله ... شفناها اكثر مدينه تناسب مختلف الاذواق
والفئات العمرية وتنوع الرحلات فيها ..
والسكن في سيركل اون كافيل
http://www.mantracircleoncavill.com.au/
حجزنا شقتين وكلهم Tow bedroom ocean spa apartment
احنا كنا رقم 1 الشقه لاباس فيها لا كبيره ولا صغيره اما الشقه الثانيه كانت رقم 5
اوسع ماشاء الله كبر شقتنا مرتين وكان فتح الباب عن طريق بطاقه عكسنا بمفتاح ..
انصح الجميع اللي حاب بشقه واسعه تكون نهايتها 1165 2255 وهكذا ...
الفندق امان والسيكيورتي 24 ساعه - ماتدخل المبنى الا ببطاقه والمسبح ايضاً
الشقه مجهزه بكل شيء من ادوات الطبخ ..
عيبهم فقط صوت الازعاج و اللي من النوع اللي يبرد بسرعه ترى لحافهم عباره عن شرشف لا يسمن ولا يغني عن جوع
خطوط الطيران ثاني تجربه لنا لسفر على التايلنديه لاستراليا وفي تطور ملحوظ في الطائرات
تم وضع شاشه ترفيه لكل مسافر على جميع الدرجات وفيه اجدد الافلام يعني ماشي ملل
عيبهم فقط في اكلهم الله يعز النعمه .. هالرحله ماكلت ولا وجبه منهم مجرد ماي و عصير < جزازه رقم 1
http://www.coachtrans.com.au/default.aspx
المواصلات من المطار والى كان عن طريق coachtrans australia طبعا هذا مش خاص يعتبر شتل المطار
احنا استغربنا من هالشي خاصه ان كنا معتقدين مثل السفره السابقه بيكون لنا باص خاص والسواق ينتظرنا
وماسك لوحه فيها اسم لكن صار العكس وقعدنا ساعه تقريبا نتنظر الباص وكنا مسافرين 11 ساعه وماوصلنا الا
الساعه 2ونص بالليل الفندق الباص والخدمه ابدا ماعليها لكن اللي ماعنده مشكله يتأخر بالوصول ويوصل
ناس قبلهم يقدر يحجز من مكتبهم الموجود في المطار ...
وفي باصات مواصلات كثيره منها والسعر جدا مقارب مافي فرق يذكر ..
http://www.con-x-ion.com/
عام 2008م كانت لاوند تتعامل معاهم
و holiday tours حاولت القى موقعهم لكن للاسف مالقيت اي شي
وهذي الشركه تتعامل معاها لاوند حالياً
( معامله الشعب )
حبيت اختم بدايه موضوع وانا اتكلم عن معامله الشعب لان في فئه كبيره وكثيره يهمها معامله الشعب لهم في سفرهم
لان هالشي ينعكس بشكل ايجابي او سلبي للمسافر ويخليه يكون فكره عن الدوله .. طبعا انا بتكلم عن تجربتي للمره
الثانيه لي معاهم ..
الشعب جداً حبوب وخدوم يحاول يساعدك بشتى الطرق يبتسم لك اذا شفته واذا سألته بيمشي معاك حتى يوصلك المكان
اللي سألت عنه .. وكذلك يسلمون عليك ( السلام عليكم ) بلغه مكسره ومره قاعدين على الكراسي مر علينا
اللي يشتغل في الاكوداك وقبلها بنفس اليوم مرينا عليه نسأله عن مكان وهو مار وشافنا قال لنا ( مع السلامه)
ماصار لنا اي موقف يضيق الخلق وحمدلله او حد تعرض لنا كنا نمشي للساعه 12 و1 وكلنا بنات ونمر قدام بارات لانها منتشره في كل مكان وحمدلله الله الحافظ وقولد كوست تعتبر من أأمن المدن في استراليا وماعندهم الا قسمين في السيرفيرس براديس والساوث بورت والشرطه اللي عندهم منتدبين من شرطه برزبن و الكيمرات موجوده في كل زاويه ...
في نهايه بدايه تقريري بعض الصور
وانتظروني قريباً جداً