:smile002:
ترددت في كتابة تقرير سفري للنمسا ، لكن لما قعدت اشوف صور
الرحلة
قررت اني أكتب تقرير مدعم بالصور حتى يكون
مذكرة أرجع لها كلما شدني
الحنين الى النمسا وبنفس الوقت ممكن يكون
مرجع او دليل للسائح العربي
المسافر للأراضي النمساوية.
التخطيط للسفر كان من شهر 4 تقريبا وحجزنا على
الخطوط الجوية القطرية
( 2 كبار و 3 أطفال ورضيعة) على الدرجة السياحية ب15 ألف ريال قطري
تقريبا.
اما بالنسبة للسكن فحجزنا شقة في قرية كابرون عن طريق النت والشقة
رشحتها لنا العضوة ( ابتسامة مشرقة ) الله يجزيها الخير. لقينا شاغر من
تاريخ 15 حتى 25 جولاي وحجزنا ودفعنا المقدم ، لكن بعدين حسينا ان10
ايام غير كافية، فطلب مني زوجي ادور على شقة ثانية من تاريخ 10 حتى 15
من جولاي . ، طبعا راح أتكلم عن الشقق أكثر في المرات الجاية.

• اليوم الأول 10 / 7 :

موعد رحلتنا كان على الساعة 2 الفجر، ركبنا الطيارة وكنا حاجزين المقعد
الأول على أساس أن عندنا رضيعة ومثل ما تعرفون ان الرضيع يكون له
سرير ، للأسف لما صعدنا الطيارة كانت جاية ترانزيت تفاجئنا ان كراسينا
بالخلف!!! كلم زوجي المضيفة وقالت انها ما تقدر تسوي شي طالما نحنا على
الأرض!! طبعا زوجي ما سكت وقلب الطيارة على راسهم وقال لهم: كيف
توعدونا من شهور نقعد في المقاعد الأمامية والحين تخلونا نقعد بالخلف؟؟؟
المهم بعد دقيقة جات المضيفة وقالت فضّيت لكم كرسيين في الصف الأول
ورضينا وطارت فينا الطيارة.
المدة الزمنية من دوحة الى ميونخ 6 ساعات تقريبا....نام الجميع الا انا كنت
على اعصابي اخاف تصحا الصغيرة في اي وقت!! طبعا قدموا لنا وجبتين
الوجبة الاولى كانت وجبة خفيفة والوجبة الثانية كانت وجبة الفطور.
وتقييمي العام للخدمة والوجبة 8 من 10 .
الساعة 8 الصبح بتوقيت الدوحة و 7 بتوقيت ميونخ وصلنا ، وكانت
الاجراءات سهالات وما في اي عقد .
المطار على شكل مبنيين بعد ما خلصنا من ختم الجوازات انتقلنا للمبنى الثاني
ورحنا ندور على مكتب Europecar الي حجزنا من عندهم سيارتنا...
هذي صورة سيارتنا، عائلية ووسيعة وكنا نعبي فيها ديزل. سعر ايجارها
لمدة 15 يوم تقريبا من 7 – 8 آلاف ريال قطري.

قعدنا بالسيارة نبرمج ال GPS الي جبناه معانا من قطر ، لكن مع الوقت
اكتشفنا ان الGPS الي بالسيارة نفسها أفضل وأحسن.
وبعد ما برمجنا الجهاز مشينا وتوكلنا على الله والمسافة كانت 3
ساعات تقريبا
من المطار الى الشقة. وفي الطرق عيالي كانوا يحنون :
جوعانين !!
مساكين من التعب وقفنا عند سوبرماركت Spar وشرينا ماي
وتصبيرة

وهالصورة من الطريق ....تصبيرة مني لكم

وبعد 3 ساعات من المطار وصلنا الى قرية كابرون وهي تبعد 10 دقائق عن زلامسي...
فأهلا وسهلا بكم في كابرون :36_1_39: