بسم الله الرحمن الرحيم ..
اليوم , حابّة أعمل تقرير كامل مكمّل عن آخر سفرة لي أوروبية بالتفاصيل المملة
شفت أنا لمه كنت أجهّز للسفرة حاجتي للتقارير وأسئلتي ال ماتنتهي
ومن وقتها كنت عازمة أسوي تقرير كامل حتى أساعد غيري اللي حابّين يسافرون لأوروبا وماعندهم فكرة ولا سبق
وخاضوا التجربة
أوّل تقرير لي في عالمي النتّي :$ فبشويش عليّ :$
وإن شاءالله يحوز ع إعجابكم ,
طبعًا قسّمت الموضوع ع جزئين .. الجزء الأول هذا ويحتوي ع الإجراءات + تقرير .
والجزء الثاني عبارة عن تكملة للتقرير فقط ..
طبعًا الغرض من التقسيم هو حتى إني أعطي كل جزء حقه .. وحتى ما تملون من القراءة
خلّونا نبدأ التقرير .. بسم الله
أوّل خطوة كانت اختيار الوجهة , ع أي أساس إحنا اخترنا أوروبا
هل هي مناسبة لأسرتي ؟ هل هي مناسبة لميزانيتي ؟
هل الوجهة اللي أنا اخترتها فعلاً تحقق لي رغبتي من السفر أو لا ..
أكبر غلط يرتكبوه كثير من النّاس .. إنهم يختارون وجهتهم ع كلام النّاس ومديحهم لدولة معينة. أو ع حسب برنامج معين أو تقرير من النت ..
بقولكم مثال .. صديقتي راحت لشهر عسل .. وبحثت بالنت لقت الوصف الخيالي للمالديف! وبدون مبالغة كانوا يقولون تحسين إنك بالجنة
و ع أساس هالكلام عزموا هي وزوجها يطلعوا لها شهر عسل لمدة أسبوعين .. وهم يا أرض احفظي ما عليكي ! محد قدهم
وصلوا هناك انصدموا إنها مو زي ما توقعوا ! كان الملل قتلهم لدرجة كانت دبي ترانزيت يوقفون عندها .. قدموا رحلتهم أسبوع وجلسوا بدبي أسبوع !!
قالت لي الملل ذبحنا مافيه أسواق مافيه هيصة وهبال وخبّة ووناسة .. لا كل شيء هادئ وصامت ! جتنا تكّة ههه
الخطأ اللي سووه إنهم اعتمدوا ع تقارير النت ووصف الأعضاء اللي راحوا لها
طبعًا الأعضاء أكيد مامدحوها إلا هم مخططين الغرض من الرحلة ! استرخاء .. أو ذكرى زواج :$ أو أسباب أخرى .. لكن اللي صار مع صاحبتي إن الوضع ابدًا ما أعجبهم .. كونها ناسبت ناس كثيرين مو شرط تناسب غيرهم .
طبعًا صاحبتي نفسها قالت لي بعد زواجها بسنتين إنهم بيقضون ذكرى زواجهم الثانية هناك .. بس طبعًا 4 أيام للمالديف و 10 أيام لأي دولة جمبها
إن شاءالله وضحت لكم الفكرة .
نجي للخطوة الثانية .. بعد ما قررنا الوجهة .. وفق الكلام اللي فوق طبعً ما ننسى أهم شيء هو الطقس لأنه صراحة هو الأساس . فالطقس من أهم الأسباب لفشل أو نجاح السفرة
نجي عاد لمسار الرحلة .. عاد إذا وصلتوا لهالنقطة قولوا مرحبًا بالهواشات ههه
زوجي رغبته بالنمسا وألمانيا !
يبي مناظر طبيعية بالنمسا .. ومعارض سيارات وهالخرابيط بألمانيا
وأنا وش موقعي من الإعراب؟
أنا كانت رغبتي بباريس . وأمستردام .. وميلانو < وش بقى !
أو كانت رغبتي الثانية بريطانيا وأسبانيا ..
بعد ما كلٍ أدلى بدلوه .. توصلنا لقرار . اللي نبدا ننخل مخطط الرحلة ههه طبعًا تم رفض أسباينا وبريطانيا من قِبل زوجي . وتمادى شوي لحد ما وصل ع إيطاليا بحكم إنه هو اللي بيدفع فقال يحقلي أحذف شيئين!!!
وجاء دوري وحذفت النمسا .. وبعد مشاورات ومجادلات طلعنا بمسار يرضينا جميعًا حمدلله ..
وكانت الدول كالتالي /
ألمانيا – سويسرا – فرنسا – هولندا .
بعد ما حددنا المسار وفق لرغباتنا + ترتيبها وقربها من بعض نجي لأهم نقطة اللي هي حجز الطيران .. نحدد شركة الطيران اللي حابينها + نقارن بالأسعار ..
تم اختيار الذهاب بالخطوط الإماراتية
الرياض – دبي – فرانكفورت .
والعودة من الخطوط السعودية فرانكفورت – الرياض .
أهم شيء احرصوا إن العودة ما تصير ترانزيت
و ع أساسه ضبطنا خطة السفر كالتالي :
فرانكفورت / زيورخ / باريس /أمستردام/فرانكفورت
الخطوة الثالثة حجز موعد بالسفارة للفيزا .. الخيارات ممكن تخلي مكتب يسويها لك وممكن مكتب يسويها لك ومستعجل بعد : )
كلمت مكتب الصرح قالنا فيزا عادية 500 رس .
طبعًا قبل السفر تقريبًا ب25 يوم .
ونسييت الموضوع :eq-31: يوم بقى 17 يوم رجعت كلمتهم ثاني فيزا مستعجلة 1000 طبعًا بيحاولون يعجلون فيها لنا ! ومافيه شيء يضمن .
قلت أتصل عليكم أأكد بعدين !
كلمتهم بعد يومين قالوا السعر 1200 غير شامل سعر موعد ال في آي بي !
سألت الأعضاء هنا جزاهم ربي كل خير وقالوا مررة تو متش
وتوكلت ع ربي وحجزت موعد في آي بي في السفارة الألمانية لي ولزوجي وكان بعد يومين حصلت .
وهذا موقعهم /
كود:
http://de.vfsglobal.sa.com/howtoapply.aspx
طبعًا بعد ما حجزت الموعد بديت أجهز الأوراق .. جواز ساري المفعول حتى 4 أشهر + صورتين له + صورتين لكل
شخص 3.5 في 4.5 . تعريف من العمل باللغة الإنجليزية + تأمين طبي +كشف حساب بنكي من البنك + حجوزات أوتيلات
وطيران. هذي أهم الأشياء ..
طبعًا تطبعون من موقعهم 3 أشياء /
تعبئة الأبلكيشن لكل شخص وموقّع.
طباعة المادة رقم 55 موقّعة.
طباعة المادة 54 موقّعة .
وكلهم تحصلونهم بموقعهم
طبعًا إذا حجزتوا الموعد يطلع لكم تأكيد مهم اطبعوه وخذوه معكم .
قبل الموعد بنص ساعة رحنا للمركز الموحد بأم الحمام وهذا الكروكي
وهذا شكل المركز من برا ..
فيه قدامه مجمع اسمه
Dove plaza
ممكن يسهّل عليكم الوصف ..
تدخلون وترقون فوق .. وقدامكم فيه كاونتر تقدمون له الحجز وتاخذون رقم .. وسوالي مشكلة لأن مامعي الريفرنس نمبر تبع الحجز! طبعًا يقدر يشيك ع رقم الجواز لكن مرمطنا بالبداية بعدين شيّك ودخلنا .
بتلقون صالة كبيرة فيها السفارة السنغافورية والهندية أظنّ .. أنتم ادخلوا من عند الكافيه فيه ممر امشوا من عنده واللوحات بتعلمكم مكان السفارة الألمانية
إذا دخلتوا تلاقون صالتين .. صالة للفي آي بي .. مسكرة وصالة مفتوحة ..
موعدنا كان في اي بي فدخلنا الغرفة ( اول غرفة بتجي ع يمينك إذا دخلت جناح السفارة ) اجلس ويطلع لك رقمك بالشاشة اللي خذيته من الكاونتر . قدّم أوراقك ..
طبعًا الفي اي بي أكثر مرونة ممكن لو نسيت اوراقكم هم يعطونك ويساعدونكم
بتعبئتها بعد ..
إذا خلصتوا تجلسون ع المكتب اللي جمبه مخصص للبصمة .. تبصمون وتطلعون .
.. بعد أسبوعين تقريبًا أرسلوا لنا نستلم الجوازات . التكلفة كاملة لي ولزوجي 1200 شاملة تأمين وفيزا وموعد في آي بي .
بعدها أكدنا الحجوزات .
حجزنا سيارة من موقع
كود:
http://www.traveljigsaw.com.au/
تعاملهم كان مرة بيرفكت
الشركة كانت وسيطة بيننا وبين شركات التأجير .. استأجرنا السيارة الأولى كان بواسطة شركة سكست وغيرنا السيارة ..
بعدها اخترنا ثانية وكانت الشركة ثرفتي . ( أعتقد كذا اسمها )
بدايةً .. شوفوا الفيديو : )
كود:
https://www.youtube.com/watch?feature=player_detailpage&v=g3JTL63F7yk
الرحلة كانت مررة متعبة انتظار 5 ساعات بدبي اع متنا تعب
أعلنوا ع الرحلة لفرانكفورت ورحنا للبوابة واستغرربت إني أنا وزوجي العرب الوحيدين!!! الباقين كلهم أوروبيين !
وصعدنا الطيارة وأقلعت أخيرًا وسحبتها نومة لحد مابقى إلا شوي ع الهبوط
الشيء الجميل بالطيران فيه نظام الترفيه أفلام ومسلسلات خيالية يعني صدق صدق ما تحسون بالوقت !
تعامل المضيفات بيرفكت .. لدرجة إنهم موزعين مقاعدهم كل مضيفة تجلس مقابلة لمجموعة ركاب . وبس تناظرينهم يجونك يركضون
Do you need something ?
مع ابتسامة ..
وتظل السلبية الوحيدة إن الرحلة مو دايركت .
وصلنا مطار فرانكفورت بالسلامة
واحنا طالعين من الطيارة داخلين للمطار وقفنا موظف من بين كلل الركاب احنا وأسمر أعتقد ألماني لأنه ما تكلم إنجلش .
طلب منا يشوف جوازاتنا ! بعدين سألنا عن الوجهه بالضبط؟ وكم يوم جالسين؟
ومشّانا .. مو عنصريين لكن ابدا مو فرندلي
بعدها ع المكتب للختم ولا سألني أو شيء بس أعطيته الجواز وختمه وطلعت ..
طبعًا بعد استلام الشنط تطلعون .. أعتقد كان التفتيش ع الشنط تحت ممكن ؟ لأنهم ما فتشوا أبدًا ..
طلعنا ورحنا نستلم السيارة .. طبعًا مكاتب التأجير كثيرة دورنا ولقينا مكتب ثرفتي .. وانطلقنا له .
كان فيه موظفة لما جيناها أشرت لنا يعني بعدوا !وقفنا انصدمنا حنا ههه بعدين عمتي نادتنا مرة ثانية !
وارتكبنا خطأ احنا !! إننا كتبنا موعد ال بك أب ع توقيت السعودية!!
وكان أسلوبها أبد مو كويس اشرت ع الوقت بصفحة الحجز قالت انتم كاتبين هذا الوقت انتظروا لحد ما تجي الساعة 15 .
طيب وشلون بقى 3 ساعات بغيت أصيح تعبانة ومرهقة قاللها زوجي طيب احسبوا سعر هالثلاث ساعات من سعر استئجار السيارة ! انهبلت هي لا تستلمونها 15 مثل ما أنتم كاتبين
جلسنا بكراسي الانتظار ساعة ونص .. بعدين خلاص صدق طفشت . ألقيت نظرة ع المكتب لقيت الموظفة خلص دوامها وجاء موظف .
قلت أجرب حظي ممكن تصير جت السيارة بدل المرمطة ..
ورحت له وعادي بدا بالإجاراءات من جوازات وكردت كارد إلخ ..
وخلصنا واستلمنا الورقة وطلعنا فوق عند الباركنق تبع الشركة .. ولقينا سيارتنا وعطانا الموظف المفتاح
وهذي صور للسيارة
وخلصت من التفاصيل أخيرا ههه
الحين ببدا بالصور مع تعليقات بسيطة
(((( الموضوع نزلته في الإقلاع قبل فترة ))))
فضلاً لا أمرًا عدم الرد حتى الانتهاء من الموضوع ليكون مكتمل .