بسم الله الرحمن الرحيمأولاً احب اشكر من اهدانا بعد الله سبحانة وتعالى على الطر ق الصحيحة التي نحتاجها في غربتنا عن بلادنا والفضل يعود للإخوان المقيمين على هذا الموقع الرائع الذي صراحة مهد لنا الطريق والوسائل التي تفيدنا في سفرنا وترحالنا عبر مشاركات الإخوان الأعضاء :x1: الذين ساهموا مساهمه كبرى في مساعدة اشخاص كثيرين جزاكم الله الف خير وإلى الأفضل دوماً إنشاءالله
رحلتي الأولى من أصل أربع رحلات إلى بلاد العمة كانت رحلتي الأولى في شهر 9 /2001م كنت أعمل في شركة في مدينة الرياض ومن هنا بدأت قصة رحلتي الأولى ، في يوم من الأيام كنت في دوامي مثل أي يوم عادي جاني أتصال تقريبا بعد المغرب من صديق لي اطلقنا عليه لقب بعد كذا( وسواس اندونيسيا ) المهم يسلم علي واصل من أندونيسيا ماله يومين قالي وش رايك نهاية الشهر تسافر معي ، طبعاً ما أعطيته اهتمام لأن موضوع السفر ما كان في راسي أبدا في هذا اليوم حصلت لي مشكلة في الدوام وكرهت العمل لأبعد درجة وحلفت اني أخذ إجازة مستحقة لي من سنتين مدتها شهرين لأرتاح من أعباء السفر وكانت البدايه مع( وسواس أندونيسيا ) اتصلت عليه ورتبناها وماكان عندي اي فكرة عن بلاد العمة بس اللي قال عليه الوسواس وتفاجأت بعد كذا إنه بيروح معانا اربع أشخاص يعني صرنا ستة لا وأزيدكم من الشعر بيت واحد منهم مقعد الله يشفيه رايح معنا بالكرسي المدولب ،:112: صراحة الله يذكرهم بالخير أول ما عرفت هذا الخبر تضايقت ولكن تغيرت وجهة نظري بالكامل
يوم السفر رحلتنا على خطوط جارودا اقلعت الطائرة والإبتسامة مرسومة على وجهي ومتمسك بالكرسي وبخوي اللي قاعد يمي لا تلوموني أول مره أركب طيارة لا وبعد 9 ساعات وكل ماتغفى عين فكرة سقوط الطائرة اللي نشوفها بالأفلام الأمريكية تفتح عيوني ثاني مره الحمدالله وصلنا بسلامة وانا ابدا مركب دينمو برقبتي في مطار جاكرتا أطالع يمين يسار مندهش
اخذنا سيارتين ورحنا أول ثلاث أيام في جاكرتا في فندق ثلاث نجوم إسمه (alia matraman ) طبعا هذاك الوقت كانت الثلاث نجوم بمعنى خمس نجوم ولكن لكل ساعة قدرها اليوم يا أخوان كان 150.000 روبية بس بس لا ومزودين علينا بعد ، استحلينا الفندق ستة غرف تقسمت على أكثر من دور طبعاً وبعدها رحنا الجبل وجلسنا فيه أربع أيام وهنا ظهرت حقيقة صاحبي المقعد تصقون يا اخوان انه لو ما كان معنا في الرحلة ما ادري وش كان راح يصير فينا وش أقول خفة دم ، مرح كل الصفات الي تحبها تكون في خويك بس الزين ما يكمل والكامل الله .
رحنا سفاري حديقة الحيوانات و حديقة الزهور والشلالات بس بصراحة أعذروني من جانب الصور لأن الرحلة كانت قديمة الي شقق الصور بعد ما تزوج واللي ضيعها من ضمنهم انا، الأيام تنسي بس وين وين وين مستحيل ثم مستحيل تنسى بلاد العمة ياأخوان نصيحة من أخوكم (( قبل ما تفكر تحجز لسفرك الأول إلى بلاد العمة كن أكيدااًاًُ إنك راح ترجعلها ولو طال الزمن لأني عمري ماشفت إدمان مثل إدمان بلاد العمة ولكن إدمان حلو المذاق وطيب الرؤية ))))
أعذروني على إطالتي لكم ولكن أريد أن أساهم ولو بقليل في موقعكم الرائع هذا وإنشالله سوف أروي لكم عن رحلاتي التي كانت في 2002 و2004 و أخر مره قبل رمضان هذا العام 2005 مرفق بالصور بإذن الله وتقبلوا تحياتي ،،،،،،،، وإلى لقاء قريب بإذن الله