1. بعد التحية,,,

بعد التحية,,,

شوف اخوي بما ان مدة سفرك قصيره فا لا تبني امل انك راح اتشوف تايلند كلها انا اعطيك هالجدول و اعتقد انه الافضل بالنسبه حقك ودة سفرك و الجدول يغطي تقريبا المدن المهمه في تايلند حق الي يسافر لها لأول مره...والجدول يقول :
أولا: اول ما توصل مطار الارض الذهبية في بانكوك تاخذ اول طياره رايحه بوكيت واذا ما حصلت تاخذلك تكسي وعلى طول على بتايا .
اذا حصلت طياره رايحه بوكت جدولك كل الآتي : اربع ايام في بوكت على انك تسكن بقرب الباتونق بيش و انصحك بفندق Duangjitt Resort وهذا الويب سايت عشان اتشوفه و تطمن : http://www.hotelthailand.com/phuket/duangjitt/index.html
ثانيا: تاخذ طياره وتروح على بتايا عن طريق بانكوك اي ويز .. ما قلتلي ليش على بانكوك اير ويز ؟؟ لأن طيران بانكوك اير ويز يروح بتايا عن طريق ترانزيت في جزيره ساموي ... طبعا انته تقدر تاخذلك ليله في الجزيره وتكمل من اليوم التالي على بتايا واذا وصلت جزيره ساموي انصحك انك تسكن في نطقه اسمها Chaweng beach و بالسايت الي معطيك اياه فوق في الكثير من الفنادق في ساموي تقدر تشوف الفندق الي يعجبك عشان اذا وصلت بالسلامه تقدر تسكن فيه
ثالثا: الوصول الى بتايا معشوقة الجماهير بالسلامه ... راحت خمس ايام وباقي سبعه والي راح تقعدهم في بتايا راح يكونون خمسه ايام بالتمام والكمال ... ونصيحتي لك انك تسكن بالقرب من البحر ايضا نفس حال بوكت وفي بتايا فنادق كثير بس انا افضل الفنادق بالنسبه لي وهم : A1 , Mark-land , Best Beach villa , hard rock , والنادق الثلاثه الاولي موقعهم ممتاز جدا وكل شي يمك من مجمعات ومحلات تجاريه و وسائل ترفيهيه و وصيدليات ومغاسل ملابس وعلى فكره كل الفنادق هذيل على البحر مباشره يعني غرفكم راح تصير sea view ... هذيل الفنادق كلهم في ساوث بتايا ومنطقة العرب في نورث بتايا بس لا يغرك نورث وساوث تري مشي 20 دقيقه الا انه واصل واذا بالموتور ساكل تاكسي ما تاخذ منك 5 دقايق ...وتقدر اتشوف الفنادق المذكوره اعلاه بالويب سايت .
رابعا: بعد ما تستمتع في ربوع بتايا وراح من ايامك عشره بقالك يومين هاليومين انشالله راح اتقظيهم في بانكوك للتسوق فقط لا غير لأنه يومين ما يكفون للتسوق بس مدة الرحله ما تسمح .. طبعا انت راح تروح بانكوك عن طريق تاكسي تاخذه من بتايا طبعا سعر التاكسي ما يزيد عن الالف و خمسمية بات و اقل بعد طبعا المجمعات عديده منها : طوكيو او MBK و زين و سيام لاقون والعديد العديد ....
سامحني اخوي اذا كان في كلامي اغلاط املائيه لأني والله مستعجل وبروح الدوام بس ما حبيت اخليك بدون لا ارد عليك .....
و انشالله تروح وترجع بالسلامه ولا تنسانه بصور الرحله وخصوصا بتايا ....
ملاحظه: بالنسبه حق الكاميرا تقدر تشتريمن الديوتي فري في مطار بانكوك بس لا تاخذ الا سوني دام انه ما يفرق معاك السعر و سلامتك يالغالي .