1- الافضل ان تجعل زيارتك فى اول الموسم الصيفى او اخره بسبب الزحام الشديد فى كل المزارات هتلاقى طوابير تنهكك وبتضيع اليوم ، وكمان الجو الحار اللى فاجأنى كتير كنت اعتقد ان جوها معتدل واخف من جونا فى الصيف
2 ان كنت هتستخدم المواصلات فالافضل السكن فى تقسيم وان كنت هتستخدم سيارة فالافضل السكن بمنطقة مسجد السلطان احمد الرائعة خاصة ان كنت تحب الهدوء لان تقسيم ليلا فيها مناظر استغفر الله العظيم
3- ان تجمع بين زيارة السلطان احمد وايا صوفيا لانهم قريبين جدا وبعدها تجلس للراحة فى احد المقاهى الجميلة للراحة والتى تطل على ساحة السلطان احمد ثم تكمل الجولة الى توب كابى اللى فى رأيى كل جزء فيه يستحق الوقوف عنده ولا يفوتك القاعة اللى فيها مقتنيات الانبياء والرسول عليه الصلاة والسلام (فوق الوصف) تجعلك تبكى
وتوب كابى يقع خلف ايا صوفيا شمال الباب بعد اما تخلص الجولة فى ايا صوفيا
ومتنساش زجاجة المياة قبل ماتدخل توب كابى لانه كبير جدا ومتعب بس يستاهل
4- الجمع بين جولة البسفور وقصر دولمة لانه قريب منه يمين مرفأ بواخر الجولة
5- بالنسبة للتسوقلينا احنا الستات ( وطبعا الرجالة هيدعوا علية دلوقتى ) فعليكم بمنطقة عثمان به محلات فخمة واسعار رخيصة فبعد زيارة الاسواق الشعبية وجدنا عثمان به افضل خصوصا وقت التنزيلات
وبالنسبة للتونيكات التركية الانيقة فلن تجدوها فى تقسيم ولا فى عثمان به هتلاقوها فى الاسواق اللى عند محطة امينونو وتحديدا بعد اما تنزلوا من المترو هتنزلوا السلم هتلاقوا محلات شعبية تحت الارض امشى يمين لان شمال بتطلع ع الميناء اللى عندها قوارب بيع ساندوتشات السمك(لاتفوته ) المهم امشى يمين اطلع السلم هتلاقوهم فى المحلات اللى وراء السوق المصرى المنطقة كلها بصراحة تحفة وهتلاقوا هناك شنط فرست كوبى
6- ماتفصلوش مع الاتراك قول الرقم معجبهوش سيبه وامشى هو بيرجع ينادى عليكم الشعب التركى شعب خدوم لكن خلقه ضيق جدا مش بيحب الرغى الكتير ونصيحة اسألوا مرة واتنين لو تايهين لاننا تهنا مرتين بسببهم فاللغة مشكلة حقيقية ولا انجليزى ولا حتى لغة الاشارة
7- بالنسبة للاكل ففى مطعم تحفة بمعنى الكلمة هو فى اول شارع استقلال على الشمال وانت جاى من تقسيم هو مش فخم بس روعة انا وجوزى ادمناه محاشى وكفتة وشيش طاووق وكباب وضانى وفريك جوعت واللهى بس مش فاكرة اسمه لازم تجربوه ياجماعة
8- لازم تزوروا البورصة قريبة من اسطنبول بس التلفريك هناك قديم وزحمة لو جربت التلفريك فى دول اخرى فمن الافضل الطلوع للجبل بالسيارة او الباص اما سوق الحرير لايفوتكم التونيكات هناك خرافة
9- الباص اللى بيروح لمينى تورك او تركيا الصغرى فهو من الموقف اللى فى تقسيم ورقمه 54ht-36t
0-واخيرا امانة ماتنسوش الايس كريم
ويارب اكون افدتكم
ويارب تنبسطوا زى ما احنا انبسطنا