- حجزي ليه انلغى ومن اللي الغاه ؟؟؟؟؟؟
السلام عليكم
اليوم الاربعاء 11/2/2009 كانت الرحلة على الخطوط السعودية الى جاكرتا
كان الحجز من المكتب السياحي مؤكد ولما قدمت التذاكر والجوازات للموظف قالي ان الحجز ملغى:112: الحقيقة انصدمت لأني جاي من الشرقية بالسيارة مع الجو الحلو
المهم غير بدل منا منا قالي ملغى على طول كلمت المكتب قالي الكلام غير صحيح الحجز عندي مؤكد
هاه يالموظف قالي للأسف وتعال ناظر الشاشة والطيارة فل يبي يقنعني رجعت كلمت المكتب قام يحلف لي ان الحجز من عنده تمام وانها سالفة موظفين خطوط وعطاني رقم الحجز والتذاكر للتاكيد
وانا جالس احوس مع هذا وهذا طلع خويي تكانه وعلى طول كلم مكتب الخطوط السعودية
هاه يالمكتب فيه حجز قالو له الشباب موجود كم مقعد قال اثنين وتم الحجز
السؤال اللي يطرح نفسه
حجزي ليه انلغى ومن اللي الغاه ؟؟؟؟؟؟
المهم الحمد لله تم الاقلاع والهبوط بسلام في مطار جاكرتا الدولي الساعة العاشرة والنصف صباح يوم الخميس بتوقيت المحلي .
اسغرق الوقت حدود الساعتين من النزول وحتى الخروج من المطار لان النية كانت مبيته اننا نواصل الرحلة الي جزيرة بالي وحاولنا اننا نحصل حجز على أي خطوط داخلية لكن للاسف كانت الرحلات اما فل او غالية بحكم الموعد لانه بنفس اليوم.
فقررنا اننا نروح للجبل كم يوم واخرنا بالي ثلاث ايام
طلعنا برا المطار واستقبلتنا جاكرتا بالامطار الغزيرة وحصلنا سواق يودينا للجبل اسمه ديفيد وكان مسيحي (طبعا ما اكتشفنا الشيء هذا الا متاخرين بعد ما ركبنا معه لانه كان يتكلم عربي بقوة).
وصلنا الجبل متاخرين لكن حجز الفلة كان قد تم باجراء الاتصالات مع صاحبة الفلل السيدة مايانغ في مدينة الزهور
( Kota bunga )
رقم جوال السيدة مايانغ موجود بالمنتدى وهذا هو (006281912000618)
وبعد الوصول عرضت علينا فله 3 غرف نوم وحنا 2 فطلبا غرفتين والحمد لله جهزت لنا الفلة وكان سعرها 600000 واخذناها ب400000 روبية وكانت الفلة جميلة ونظيفة بحكم انها داخل مجمع سكني.
بعد ما اطمانينا على السكن جاء دور الاكل فرحنا و اخذنا ذاك التيس ب300000 روبية (4 شهور فقط) مع السواق المسيحي .
ونسقنا مع السيدة السواق والحقيقة جهزت لنا سواق ممتاز اسمه سفيان ابو فهمي(006281398415908) سواق مسلم وسيارة ملك (تويوتا 1996 على ما اذكر) غير مدخن يعرف الجبل لانه من سكان الجبل. واتفقنا السعر على حسب المشوار لكن ما يتعدى 400000 باليوم.
هذا هو ابو فهمي و سيارته.
ظبطنا العشاء
تعشينا وخمدنا بدري لاننا رايحين فيها .
يوم الجمعه ظبطنا ذاك الفطور كبدة تيس البارح على الصاج تحبها قلوبكم.
وكان لنا اول المشاوير وكان الى حديقة سفاري من الساعة العاشرة صباحا الى الساعة الخامسة مساءا تخللها عروض الفيلة وعروض الكابوي المضحكة حقيقة.
يوم السبت قمنا بزيارة حديقة الزهور واخذنا فيها جولة بحدود الثلاث ساعات
بعدها توجهنا الى الشلالات حيث تسنا لنا زيارة الشلال الصغير والمتوسط اما الثالث الكبير فلم نستطع لبعد المسافة (تقريبا ساعتين مشي)
لكن جلسنا عند البحيرة اللي عند الشلالات الحقيقة كانت روعه وظبطنا براد الشاي لاننا كنا جايبين معنا عدة الشاهي والسواق سفيان جايب معه الغاز وعدته.
بعد ما رجعنا حجزنا لنا حجز طيران على خطوط
Loin air
يوم الاحد بسعر 180 دولار ذهاب وعودة لشخصين الساعة الواحدة ظهرا .
يوم الاحد تم التوجه الى مطار جاكرتا بدري بحكم بعد المسافة والاجازة الاسبوعية عشان الزحمة
والحمد لله وصلنا وقصينا البوردنق ثم توجهنا الى مكتب كاها الموجود داخل المطار (مع العلم انه يوجد مكتبين لكاها واحد بالدولية وواحد بالداخلية) وحجزنا في فندق جراند اساتانا راما في منطقة كوتا
Grand istana rama hotel
شوف حلاوة الاستقبال
بحفظ الله وصلنا مطار بالي الدولي
(يوجد ساعة فارق توقيت بين جاكرتا وبالي) وكان التنسيق مسبق مع السائق محمد يوسنان(الاسم ورقم الهاتف موجود في المنتدى(########))
ثم توجهنا الى منطقة المطاعم للماكولات البحرية وكان الجو غائم وما ان بدانا العشاء حتى نزل المطر وبغزارة وكان الجو جميل جدا.
يوم الاثنين توجهنا مبكرا الى منطقة نوسادوا وشواطئها الجميلة.
تم فيها ممارسة الالعاب المائية وزيارة حديقة الحيوانات على احد الجزر المجاورة واخذ قسط من الراحة وشرب العصائر الطبيعية
بعدها عرض علينا السواق برنامج للجولة داخل سفينة وتناول العشاء وكان سعرها 40 دولار لمدة 3 ساعات داخل البحر لكن للاسف الحقيقة الرحلة ما كانت جيدة لانها كانت مخصصة للاجانب.
يوم الثلاثاء كان البرنامج روعه للغاية لاننا استمتعنا بالتجديف داخل النهر لمسافة 10 كيلومتر لمدة ساعتين
ثم توجهنا الى مزرعة القهوة والكاكاو حيث احتسينا القهوة والكاكاو بانواعهما وتسوقنا داخل سوقها (كان غالي شوي بس يستاهل).
ثم توجهنا بعد ذلك الى البركان والمياه الحارة وعالجنا بعض امراض العظام والمفاصل.
يوم الاربعاء كانت رحلة العودة الى الجبل حيث كان في اسقبالنا ابو فهمي ومعه العزبة (العزبة كانت معه لاننا ما قدرنا ناخذها معنا فاشار علينا اننا نخليها معه لحين عودتنا):8888:
وعلى طول على سوق الغنم :115كلها حوشين) اخذنا ذاك التيس ب300000 روبية وتعشينا عليه.
يوم الخميس دقينا ذيك الحميسة المظبوطة
توجهنا الى مطعم على بحيرة واخذنا جوله بالتجديف اليدوي (ثلاثة شباب يجدفون)
بعدها توجهنا الى مكتب كاها الموجود بالجبل لنحجز اخر ليلة في جاكرتا وتم الحجز في فندق استون اتريوم لقربه من المجمع (رغبة منا في التسوق اخر يوم) وكان الحجز لليلة واحد غرفة لشخصين ب53 دولار.
يوم الجمعة كان يوم التسوق بالجبل لانه فيه محلين كبيرين شوي والحقيقة كان عندهم تنزيلات كبيرة واشياء حلوة ورخيصة.
يوم السبت توجهنا الى جاكرتا وتحديدا فندق الاتريوم ودعنا صاحبنا ابو فهمي واخذنا الغرفة وكانت الغرفة والخدمات ممتازة
بعدها رحنا تسوقنا بالمجمع ثم رجعنا للفندق وجلسنا بالبهو انترنت وسوالف وشاهي لين جت حزت النوم.
قمنا بدري افطرنا وتوجهنا للمطار بالتاكسي بالعداد وكلف 100800 روبية ورسم الطرق علينا سلمنا عفشنا وكما استقبلنا بالامطار ودعنا بها.
حبيت ان التقرير يكون بسيط في طرحه لكي يسهل على المطلع استيعابه والعذر والسموحه عن أي خطا .
وللمرة الثانية اشكر كل من ساعدنا على انجاح رحلتنا واسف على التاخير .
تقرير ممتع وجميل استمتعت بالمتابعة معك.
ملاحظة: حجم الصور كبير جداً