n00n92
05-12-2022 - 09:43 pm
السلام عليكم
حجزنا رحلتنا في منتصف شهر ماي ان شاءالله
والحمدالله خلصت الفيزا على خير
مدة الرحلة 10 ايام وكلها بلندن
نوعا ما احس اني توهقت لما قريت الاماكن السياحية في لندن
اغلبها متاحف
وانا وزوجي مو لم متاحف مرة
وش بنسوي بهالعشر ايام
وانا حامل واحس صعبه اطلع برا لندن كثير
وش رايكم محتاره
رشحولي الله يعافيكم اقرب وافضل منطقتين برا لندن تسوى العنوه لها
وبعد الله يعافيكم تكتبون اماكن سياحية غير المتاحف
والتنقل تنصحون بالباص والا الاندر قراوند؟
مابقى شئ على السفره ولا بعد جهزت برنامجنا هناك
انتظركم الله يفرج عليكم
الله يسهل امر رحلتكم و حملك
لندن فيها كل شي و انا اخوك
عندك :
1- لندن اي
2- مدام توسو ( متحف الشمع ) روعه عبارة عن شخصيات معروفة .
3- حديقة الهايد بارك
4- حديقة ريجنت بارك
5- شارع الاكسفورد فيه محل اسمه بريمارك , بريمارك زي الهرم عندنا بالرياض
بس كل منتجاتهم عالية الجودة و رخيص مره , و بما ان النونو قريب و يطلع على الدنيا الله يسهل امره , بتلقين له ملابس ياما و حلوة , اتوقع ب 100 باوند بتاخذين نص المحل .
6- كمان على شارع الاكسفورد فيه مركز سلفردج هذا مركز فخم و ماركات فخمه , اصلا من تدخلينه تحسين انك طفرتي
7- منطقة البيكادلي , فيها ام اند امز مخدات الاطفال حقتهم حلوه و فيه ملابس اطفال و في نفس الشارع محلات كثيرة
8- اما اذا تبين ماركات عالمية بأسعار مخفضة عندك قرية بيستر فيلج , بالقطار نص ساعه الى 40 دقيقة , تطلعون لها من محطة مارليبون و عند التذاكر تطلبون تذاكر بيستر فيلج مع الباص
يوصلكم القطار لين القرية و بعدين تركبون باص خمس دقيقتين للسوق , برادا و فيندي و دي اند جي و شانيل و غيره كثير تخفيضات توصل الى 40% و 60% , افضل يوم تروحون لقرية التخفيضات هو يوم الثلاثاء , لأن البضايع تجي يوم الاثنين المساء , و العالم تنكب على القرية يوم الثلاثاء , يوم الاربعاء تروحين تلقين المحلات فاضية .
9- التنقل بالباص بالنسبة للحامل افضل و اسهل , لأن المترو بتنزلين درج و تطلعين درج لين تطلع عيونك
اول ما توصلون روحوا اقرب محطة مترو للسكن , و اطلبوا بطاقة اويستر لونها ازرق , اطلبوا مدة اسبوع , و كل ما تركبون باص تحطونها على جهاز و تركبون .
وش بعد وش بعد وش بعد
ادخلي تقارير الاعضاء و بتلقين كل شي يسرك
و شوفي تقريري
و اي خدمة تحتاجينها انا ما اعرفك و لا تعرفيني