نشر في سوريا

يوم وقفة عيد الفطر في الشام من يوميات شامي

شامي مبندق

24-07-2022 - 04:49 am

المهم ... سأتكلم الآن بالعامية لأنها أريح لي وأقرب لقلبي ....

السلام عليكم .... أخوكم الشامي معكم بالموضوع الثاني في هذه البوابة الراقية المميزة ... أوصل هذا الموضوع لمحبي الشام لما يحمله من صور وجولة لذيذة مشوقة .... أعجبتني أنا أبن الشام ... فما بال عشاق الشام .... أما بالنسبة للذين لايعرفون الشام أتمنى أن يعطهم هذا الموضوع بعض الشرح البسيط ... وننتظر زيارتكم لتشاهدوا الشام على وجهها الحقيقي ... أما الذين لايحبون الشام فلا تعليق

المهم ... سأتكلم الآن بالعامية لأنها أريح لي وأقرب لقلبي ....

الموضوع بيحكي عن ساعة ونص قضيتها يوم الوقفة بسوق الميدان ( سوق شعبي شهير بالشام ) وكانت يوم الجمعة بوقت متأخر يعني شي الساعة 11.30 المسا ... وكان في عالم كتير .. وكأنالدنية نهار ..... المهم فات صهري بالسيارة لجوات الشارع مشان يفرجي ولاد أختي الزينة ومحلات الحلو والألعاب ... وكانت العجقة مو طبيعية لدرجة أني اضطريت أنزل من أول السوق وقضي مشواري مشي وأنا عمبصور ... ومبسوط كتير ... الجو حلو .... الناس محترمة .... حسيت حالي بباب الحارة .... أهل الشام الأصيلين .... وصورت مشاهد عن الحلو والمحلات اللي بالميدان .... والشوكولا اللي كانت معروضة .... والزينة اللي مزينة المحلات ... وكمان محلات الأكل الطيب اللي بتشتهر فيها الميدان ...
يالله نسمي بالله ونشوف بالصور مع التعليقات المناسبة ... وبتمنى تعيشوا الجو ... ولو ما عشتوه ممكن تعيشوه بالعيد الجاي ( العيد الكبير / عيد الأضحى ) ..... يالله بدينا :
صورة من أول الشارع ... شارع الحلو والأكل الطيب
هي الصورة لمحلات داوود الشهيرة وهي صورة للعلبة اللي بيبيعوا فيها الحلو ... وصورة تانية للمحل
بعدين انتقلت لمحل تاني ... بس للأسف ما أقدرت حط التقرير بأسرع وقت لهيك في محلات ما قدرت اتذكر أسمائها ... واللي متذكروا رح خبركون عنو أكيد
هي محل تاني واجهتو عجبتني ....
طبعا المحلات بتحاول تعرض الحلو بطريقة مميزة مشان تغريك لتشتري .... بس مو كل الحلو بيتاكل .. يعني مو كل اللي حط صواني بيقول أنا حلواني
بس وللحق في محلات بتعرض عليك قطعة للدواقة ... يعني واثقة من حالها
وهي الناطف ... وهو ... صراحة مابعرف شو ... هاهاها .... بس مخفوق أبيض حلو وخفيف بينضاف للمعمول ... يعني متل القطر مع القطايف
معليش بكتفي لليوم بهل التقرير لأني واعد بيت حماي نروح نتعشا بمطعم قرطاج ... ولازم روح .... بشوفكم بالعدد القادم ... هاهاه
سلام يا كرام

التعليقات (7)

المهندس الأول

24-07-2022 - 07:29 am

يعطيك ألف عافية
تقرير رائع
ككاتبه

الذيب الشمالي

24-07-2022 - 08:30 am

(( مسائكم ياسمين دمشقي ))
الحلو ما بيجيب إلا حلو والحلويات إجت بوقتها
وتقرير حلو عن الحلويات وما فيه أحلى من الحلو :x1:
ومشان نشبع كتر لنا من صور الحلا يا حلو
يعطيك العافية وتسلم يمينك
تحياتي
ذيب الشمال
أبو قصي

14بدر14

24-07-2022 - 10:32 am

تسلم على التقرير الرائع

&البرواز&

24-07-2022 - 11:33 am

يعطيك العافيه على الصور

شامي مبندق

24-07-2022 - 12:34 pm

السلام عليكم يا أحلى أعضاء ... شكرا للردود الحلوة ... ومنتظر ردود البقية ....
هلق رجعت من المطعم ( مطعم قرطاج ) ... وصراحة كتير انبسطنا .... صحيح الأكل أجى شوي بارد لأنو الطقس صار شبه شتوي واضطرينا ناكول بالمطعم الصيفي للعجقة الكتيرة بالإضافة لأنون ما فتحوا القسم الشتوي لسع ... المهم رجعت لضيف شوية صور وندردش شوي عن زيارتي يوم الوقفة ....
هي صورة لمحل عارض شوية غراض للإستخدام بالعيد ... مشان الضيافة يعني ... كاسات فناجين أبريق وصحون ... الخ ....يعني شوية غراض على كيف الكيف وأسعار كتير مناسبة ورخيصة ... سواء خليجي أو سوري أو صيني
وهي صورة للحلو وهو عمبينصف على الصواني ... شي بيشهي عن جد
وهي حلويات مصري أخوان ... صورة للوحة الإسمية وصور للمحل
وكمان صوري لحلويات سرحان... اللوحة الإسمية ... والواجهة والعلب اللي بينحط فيها الحلو ... طبعا في محلات بتتميز بالعلب اللي بتحط فيها الحلو ... بتكون حلوة ومرتبة ... وناس كلاسيكية بالعلب ... يعني علب عادية مو مزخرفة ... وناس بتحط علب الحلو بعد ما تعبي فيها الحلو بكياس خيش أو قماش كتير مرتبة وحلوة ... يعني حسب المحل
وبنلتقي بالعدد القادم

بلا_عنوان

24-07-2022 - 01:35 pm

بيض الله ويهك على هالزين ويعطيك الصحه والعافيه

أشرفـ

24-07-2022 - 03:37 pm

الحمدلله انك منزل الموضوع بشوال ولا كنا رحنا فيها
الله يحفظك وين ماكنت ويسلم ايديك لاتحرمنا جديدك يا بطل الشام

سوريا المسافرون العرب

يوم وقفة عيد الفطر في الشام من يوميات شامي

المهم ... سأتكلم الآن بالعامية لأنها أريح لي وأقرب لقلبي ....