:smile002:
في البداية احمد الله سبحانه وتعالي أنه يسر لنا سفرنا والتي مرت علينا ولله الحمد من دون مشاكل تذكر تنغص علينا رحلتنا
ثم اشكر أعضاء بوابة العرب المسافرون كافه , من أصغرهم إلى أكبرهم على جهودهم ومساعدتهم لنا في كل تفاصيل الرحلة .
ثم بشكل خاص إلى كل من أبو ريان أخر الفرسان و العضوان السحاب ولمسات لأني استفدت منهم استفادة مباشرة من رحلاتهم السابقة ..
ولا انسي اخوي رجل شرقي لاني طبعت موضوعه الرائع واخذته معي كذلك مشرفنا الأخ خالد وحدي مصر ..
نرجع للرحلة
أولاً : التخطيط للرحلة ..
بدء التخطيط للرحلة من أكثر من سنة كنا نفكر أين نقضي فيه إجازة السنة وكنا نفكر في شي مميز وغير كل المرات , طبعاً نبي دولة ما يكون فيها حر ولا رطوبة .
وخصوصاً أنها المرة الأولى اللي أُوكل لي كل شي بدأً من اختيار الدولة والتخطيط للرحلة (بس الميزانية ما علي منها :109
قعدت افرفر بالمنتدى لحد ماطحت على بوابة النمسا
ومن موضوع لموضوع حسيت إن الديرة غير وان السفر لها مو صعب , لما وجدت من تفاصيل دقيقة من أعضاء البوابة ..
وقلت بس هذي بوابتي لأوروبا وفعلاً الدولة تحسسك انك عارفها ومن زمان.
بعدها حطيتها أول الخيارات لهذي السنة (بيني وبينكم كانت أول وأخر خيار )
بعدها روقت على مواضيع الأعضاء ودونت عندي كل شي مهم عنها وعن أسعار التذاكر .
عرضت الموضوع على رفيق دربي بس قالي أخاف نتوهق هناك اذا هم لغتهم ألمانية ..قلت وشلون تقول الكلام نتوهق وأنت مع العرب المسافرون لا وألف لا ..
بعدين قلت لازم استنفر كل الجهود لان أي واحد يجرب شي جديد بياخذ فكرة من المرة الأولى ..خفت على غفلة نكره أوروبا.
بعد الاتفاق على دولة النمسا
بديت اسأل عن افضل خطوط طيران من حيث الخدمة والسعر بيني وبينكم فرحت يوم شفت اعلان الخطوط السعودية بعد فتح خط للنمسا بس يافرحة ماتمت قتلوا فرحتي في عقر دارها بسعرهم المبالغ فيه
واخترنا خطوط الطيران والفنادق وكان كل شي تمام بس كنا نستنا قرار الإجازة :112::112:.
وقدر الله وما شاء فعل تأجلت الرحلة من شهر 8 الى شهر 10
بعدها اخذت رست ..بس والله ما صبرت كنت كل يوم ادخل المنتدى تقولون ادمان
وقررنا ان الرحلة تكون من يوم15/10 الى 30/10 اكتوبر
قبل رمضان بيومين .
هنا انتهى دوري وبدا دور الهازبند مع مكتب السفر لاستخراج الفيزة
طلبوا منا :
1-تأمين سفر وكان بسعر 465 ريال شخصين
2-كشف حساب لمدة 6 شهور
3-صورة مكشوف الرأس (للرجال فقط)
4-تعريف من العمل ..وهم من قام بترجمته للغة الانجليزية
كلفة استخراج الفيزا رسوم السفارة 620ريال للجوازين و200 ريال لمكتب السفر
5-حجز فنادق مؤكدة .. (وكنا حجزنا في السي فيلا والكراون بلازا ولي ماريوت واوتيل بوسي)
6-وحجزطيران مؤكد .(.وكنا ناوين على القطرية بس للأسف ماكان موعد طيرانها يناسبنا .)
حجزنا على الإماراتية وكان سعر التذكرة 2640ريال للشخص الواحد
وسلمنا الجوازات للمكتب . وقالو لنا بعد 12 يوم كلمونا ..وفعلاً 13 رمضان قالو تعالو خوذو الجوازات
الاستعداد للسفر
بعد ماتعيدنا وخلص العيد الله يعيدة علينا وعليكم .
بدينا نرتب شنطنا ومثل ما قالو الأعضاء الله يجزاهم خير لازم تكون الشنط الحجم الصغير وفعلاً هذا ماركزت عليه
صورة لحجم الشنطة

وحطيت الاشياء المهمة
وكان مفيد جداً للترجمة وأيضاً لوقت الصلاة واتجاة القبلة

ورفيقة دربي في حلي وترحالي

وصيدليتي المصغرة

وأهم شي بالرحلة..واهم الاماكن السياحية بالنمسا

نقطة مهمة
احب اذكر شي مهم السفر لمثل هالدول يبيلك جزم خاصة بالمشي مثل

لان أي جزمة ثانية ترى رجولك بتتقطع (خلو عنكم التكشخ بالسفر...هذا الكلام لاينطبق على المعاريس )لانهم لازم يصيرون:kashkhah:
المهم ثالث يوم خلاص قفلت شنطي وبعد ماسكرتهم الا وسمع صوت طرق وإلآ وحدة من الشنط مفتوحة وش السالفة .. انقطعت الشنطة اوة . :112::112:
قلت يله أغير الشنطة بس ماعندي الا كبيرة لاني استخدمت الحجم الصغير والوسط ..قلت مالي الا اشتري غيرها ..طلعنا ندور مالقينا احد فاتح تعرفون ثالث العيد مافيه احد فاتيح قلت ان شاءالله بلقى قزاز فاتح مريت ماعندك احد قلت مالي الا لجار الله.. بعد مسكر قلت خلاص ماراح القى الا بالعويس مرينا كلهم مسكرين .. وش نسوي وش نسوي؟؟
شوي وانا ندور لقيت محل صغير فاتح قلت والله مايجيبها الا ابو هنود وندخل عنده قلت ابي شنطة صغيرة لونها بني قالي عندي طقم 850 ريال وطلعة لي. قلت: نونو والله ما اخذها ولو بريال اقبح منه ماشفت
الا وشوف عنده شنطة حليوة لونها رمادي قلت له مافيه من هذي بني
قالي : لا..هازا بس لون ..قلنا الشكوى على الله هاتها.العوض ولا القطيعة
يوم السفر :
توجهنا للمطار الساعة 6.45 المساء وكان ودي اروح الساعة 6 ماحب التأخير .وعشان نشتري اليورو
المهم رفيق دربي كان يقول يمدينا وصلنا الساعة 7.30 للمطار
صورة اول ماوصلنا مطار الملك خالد

توجهنا للخطوط الإماراتية وكانت الساعة 7.40 صفينا عشان نحط الشنط ونقص البوردنق .
فجأة قال لنا خلاص قفلنا اكتفينا ..قلنا وشلون تو الناس قال لنا هذي تعاليم الخطوط الإماراتية
من هنا من هنا مافية فايدة .متنح ..بالاخير قال روحو كلموا اللي هناك
راح له زوجي ومعه كم واحد وكلمه. قالة من يقول تونا ؟؟!!
باقي على الرحلة ساعة .
ولا يهمك هات الشنط .
المهم الرجال طلع محترم واخذ شنطتا وشنط اللي ورانا >--- بس الحركة مالها داعي
حطينا شنطنا وقصينا البوردنق على فينا على طول .
ورحنا بنشتري العملة إلا ذاك الطابور الله لايوريكم >--الله لايلومهم مافيه إلامصرف واحد
يعني كذا يبي لنا حوالي نص ساعة قال زوجي والله منيب واقف بطابور هالعمال
أبصرف بدبي ..قلت لا مايصلح هناك بتبدل من عملة لعملة هنا احسن
قال: كيفها.. قلت : تيب
رجعنا ودخلنا للصالة وركبنا الطيارة وكانت كبيرة ومليانة ماشاء الله وكان معنا بالطيارة فهد الحيان يا حليله هو وبنياته
ركبنا بالمقاعد الوسطى وكنا ثلاثة , الكرسي الرابع كان جلس فيه واحد آسيوي
وكان جنب ولدي جالس ,
ولدي يحارش فيه يبيه يكلمه الرجال حبيب وهذا طبع كل شرق اسيا
صار يلعب معه ويقوله اربط الحزام
وولدي والله لو تحلم مايربطه من هنا من هنا مابي اربطه حتى المضيفة ما سمع كلامها
نرجع للرجال الأسيوي .
ولدي بهذله السبع بهاذيل الله يعين اللي يقعد جنبه
صارو يلعبون ويسويله حركات .و قبل مانوصل بشوي عطاه وليدي بوكس
تأسفنا منه ثم قلنا لوليدي تأسف منه وتصالحوا الحمد الله
المهم راحت الرحلة ماحسينا فيها >---- هذا من تأثير دعاء السفر
وصلنا مطار دبي الساعة12.10 ونزلنا مع الناس اللي تنتهي رحلتهم بدبي لان رحلتنا الثانية من بكرة الساعة 9.5 صباحاً .
طلعنا من المطار وسألنا صاحب التاكسي فيه سينما الحين
قال لا خلاص قفلوا
قلنا اجل اقرب مطعم نتعشى ونزلنا عند مطعم عراقي تعشينا فيه وبعدين رحنا للفندق وكان قريب للمطار
اخترناه قريب عشان زحمة الدوامات الصباح وكان سعر الغرفة 900 درهم وعلى ما اعتقد أسمة مليليوم .
وكانت الساعة تشير إلى الثانية بتوقيت دبي .بعدها :thumb_ico:thumb_ico:thumb_ico
الساعة 7.30 رن منبه الجوال صحينا وسوينا تشيك أوت وسيدا على المطار
الساعة 8.15 صباحا دخلنا المطار ويازين لما تجي المطار من دون شنط واحنا رايحين للصالة الا هذاك اللي يمر من عندنا يمشي على المسار الثاني من تتوقعون ...؟؟؟
رفيقنا الأسيوي ياحليله والله شافنا وسلم علينا من بعيد وهو يضحك بس تمنيت الكاميرا تشتغل عشان اصوره
صورة قبل الدخول للطيارة

.شوي ودخلنا الطيارة وكانت اغلب اللي فيها اجانب
جلسنا في مقاعدنا بالوسط وكان الرابع فاضي وليدي رفع التكاية وحط راسه وكمل نومته
قعدنا نسولف شوي حتى مرت ساعتين على الرحلة قنلنا ننام شوي راح زوجي ولقى مكان بالوسط فاضي ونام فيه وانا قعدت اتفرج على فلم
بعد تقريباً ساعتين وشوي الا زوجي يقولي قومي قومي .قلت وش فيه ؟؟
قال تعالي شوفي ...رحت معاه إلا ذاك المنظر من الشباك يرد الروح
يالله يارب الجنة .
جلسنا نطالع بالمنظر حتى قربنا من مطار فيينا
ورجعنا الى مقاعدنا استعداد للهبوط
بعد الهبوط اعلن كابتن الطيارة الوصول لمطار فينا الدولي وأن درجة الحرارة الخارجية 16 درجة مئوية
قلت شكلنا بنموت برد
بس قلنا جوا المطار مو مشكلة وأذا استلمنا شنطنا ناخذ ملابس ثقيلة
الوصول لفيينا
نزلنا ومشينا مع العلامة اللي مرسوم عليها شنط حتى وصلنا لتختيم الجوازات
ختمنا من دون أي أسأله ومشاكل بعدها استلمنا الشنط .حتى قطار الكات كان واضح جداً .
وطلعت جاكيت لوليدي خفت عليه من برودة الجو
وفجأة طب علينا واحد مدري من وين طلع يقول تبون تكسي قلنا ايه تونا واصلين
قلنا التكسي اريح
مشينا مع صاحب التاكسي حتى طلعنا من المطار .
اول ما طلعنا استقبلنا الجو..
الله الله الله وش هالجو المنعش الجو حلو والشمس طالعه والبرودة منعشة
(بيني وبينكم ماكنت مقتنعة ان البرد عندهم مو مثل بردنا بس لازم تلبس اكمام طويلة .بس اذا غيمت الله لايوريك ذاك البرد)
بعدها توجهنا للفندق وكان اسمه بوسي (تذكرت نور الشريف ) وكانت قيمة الليلة 470 ريال سوينا تشيك ان
وطلعولنا خرايط وبروشورات الدنيا
طلعنا للغرفة وكانت حليوة غرفة وصالة وسرير للطفل
حطينا الشنط وسيدة على الأندرقراوند كان بيننا وبينه مشي خمس دقايق
انتظروا قريبا يوميات هولستن خلال أربع أيام في عاصمة السحر فيينا