اخي العزيزي
ابوعبدالله الودعاني
أولاً : الله يخليلك عيالك ويصلحهم وعقبال ما تفرح فيهم
وثانياً : صراحه من وجهة نظري السفر بدون الاطفال ماله طعم
والاطفال زينة الحياة الدنيا ( مع العلم إني عازب )
فراح تجدهم فرحانين بسفره وانت راح تكون مرتاح وفرحان لفرحهم
انا أقول ... أخذهم وتوكل على إلي ماتنام عينة ( سبحانه )
وانشالله ترودون سالمين و غانمين
تحياتي

هلا اخوي
يعتمد على نوعية الاطفال هل هم مزعجين او لا وهل تقدرون تصبرون على مفارقتهم مدة الرحلة؟
بالنسبة للكبير اعتقد انه يفهم وحرام تخلونه اما الصغير سنه ما يفهم فالافضل انكم تخلونه
والخيار في الاخير لكم طبعا ...

انا في رايي خذوهم حرام تخلونهم وعلى الاقل ال20يوم تحللون قيمة التذاكر وغير كذا طول منت هناك بتقعد قلقان وامهم ماراح تنبسط بتقعد تحاتيهم يعني نفسيا ماراح تنبسطون رايي خذوهم احسن لكم

انصحك انكم تأخذوا اطفالكم معاكم والسعادة اللي حتشوفوها في عيونهم تسوى الدنيا ومافيها وتهون عليكم اي تعب
وبالعكس لو ما اخذتوهم حتفكروا فيهم طول الوقت وكل ماتشوفوا هناك طفل مبسوط تقولوا ياليت جبناهم معانا
خذوهم ومارح تندموا ان شاء الله .... رحلة سعيدة وموفقة يارب

خذ الأطفال معاك نصيحة ..
فيينا هادية و فيها أشيا كثيرة للأطفال .. و الميترو مريح و سهل لعربات الاطفال ..
مستحيل تلقى محطة ميترو بدون لفتات ..
و السفرة مالها حلاة بدون الاطفال .. على طول راح يكونون في بالك ...

والله من رأئي انك ماتأخذهم !! خاصة اذا كانت الاجازة قصيرة و الاطفال يبيلهم عناية و تضحيه !! بصراحة انا اسافر بدون الاطفال و اروح اماكن كثيرة و بعض زملائي يرحون نفس البلد و المدة مضاعفة و يرحون اماكن اقل بكثير و أسألهم السبب يقولون طوالي الاطفال هم السبب يعني يخربون الطلعاتو يحوسون البرنامج في اغلب الاحيان خاصة الطلعات كلها مشي طويل و تنقلات ولعب و الاطفال يخافون من بعض الاشياء مثل التلفريكات و السفن و الاصوات العالية و غيرها و غيرها ( بعض الزملاء يقول انا اخذ اجازة بعد اجازة السفر مع الاطفال علشان اريح !! )

انا وزوجي نترك ولدنا عند اهلي والاجازه قصيره نسبيا لذلك نحاول نلاقي لأنفسنا متنفس بعيد عن كل مايشغلنا عن بعض ^_^
ونصيحه من زوجه
خل اطفالك في البيت عند الاهل واذا على وناستهم تقدر اتونسهم بمناطق قريبه بعد السفر اما فترة سفرك انت وزوجتك من الافضل تخليها فتره تجدد فيها ايام شهر العسل ..تقدر اتضيف على الرحله نكهه رومنسيه مثلا احجز سويت الهاني مون (شهر العسل ) اتفنن في الشموع والمفاجآت وهدايا بسيطه غير مكلفه ..بالاضافه الى رحلاتكم الاستكشافيه هناك خل كفك في كفها وانتم تتفرجون ودلعها تراها تستاهل وقارن هالموقف مع لو معاك اطفال (انواع الصراخ وانت ماسك واحد وهي تلاحق الثانيين وهذا يريد وهذا يبكي وباي باي رومنسيه )
ابدا لا تاخذ العيال معك ..حرام تلزمها برعايتهم هناك ..عطها فرصه تتفرغلك انت وبس ^_^
رح ابدونهم واضمنلك رحله ماتنساها زوجتك ابدا وكل يوم رح تذكرك فيها

أخي العزيز الأمر يعود إليك
هل تريد أن تفرح أولادك أو لا تستطيع أن تتركهم خلفك ، إذا خذهم معك.
إذا كنت لا تستطيع تحمل مشاكلهم في حال التعب أو أخذهم إلى دورات مياه أو أخذهم إلى ملاعب
الأطفال فتركهم أفضل.
كما قلت لك الأمر يعود إليك وحدك و الطريقة التي تنظر فيها للأمور.
بالنسبة لي السفر العائلي دائما يكون من أجل أولادي و ابنتي .

اخوي بو عبدالله انا مع الاخوان اللي نصحوك انك تاخذهم وياك وخاصة شموخ الجبال قال كلمه (الفرحه اللي فعيونهم تسوى الدنيا وما فيها) والله العظيم انا يوم سرت العام اقعد فترات اراقب حركاتهم واراقب عيونهم والفرحه والدهشه والله ثم والله يعلني ما اسافر يوم واخليهم مع انهم مزعجين بس انا اسافر من اجلهم وتكفيني اشوف الفرحه فعيونهم اي ازعاج ياخوي يهون
فنصيحتي خذ عيالك وياك واسعدهم وخلهم قريب منك بيذكرون هذي الرحله وبيذكرك فيها فكل لحظه يشوفك فيها لأنك بكل بساطه اسعدته واحنا نشتغل ونتعب حق منوه مب حقهم حق انخليهم مرتاحين بالنسبه للي 5 سنوات وبتنام مرتاح البال صدقني...وما عليك من اللي قال لا تاخذهم ورومانسيه الرومانسيه تجي فوقتها وانا اخوك...
انا سافرت 20 يوم وخذتهم معاي واعمارهم 8 سنوات و7 سنوات و5 سنوات وصغنونه 8 شهور..
وطلعت بيهم بسيارة من فيننا الى زيلامسي ال ميونخ ومره ثانية فيينا صح شوية ازعاج بس احس اني متعتهم وهذا يكفيني والله تراهم زينة الحياة الدنيا...