هذه القصيده للشاعر الشاب المبدع: سلطان بن عبدالله الجذع
وجدي على اللي سافرت يم لبنان
في ليله الجمعه سرت طايرتها
فرقاء بلتني وابتلتني بالاحزان
وحدت عيوني للسهر وجبرتها
ماباقي(ن)لي غير دمع بالاعيان
واسرار حب والصدر مقبرتها
ذكرئ لشوق(ن)شانه بخافقي شان
تبي تؤبد صورته مامحتها
صوادف الاقدار وظروف الازمان
لو القلوب سنيننا فرقتها
الله واكبر كن ماكاين كان
فرصه عمر سود الليال اهدرتها
مالي جدى الا ابدع جديدات الالحان
واذكر ليال مع جنابي قضتها
يوم الصدور لفرحه الوقت ميدان
ويوم الليال اضفت علي ابركتها
عايشت معها عام والبال طربان
ومشاعري تجاهها بادلتها
كان الوفاء في صفحه العشق عنوان
مسيره(ن)صدق العواطف بنتها
واليوم دار الوقت والمنتظر حان
سود الليالي من يديني خذتها
والوقت كم فرق حبايب وخلان
يجرح مشاعرها ويظلم بختها