- اول شي السلام عليكم ورحمة الله
اول شي السلام عليكم ورحمة الله
اخوكم زواجه على شهر 10 يعني بعد العيد وطبعا اكيد افكر اروح شهر العسل طبعا في البداية كنت افكر اروح النمسا طبعا اكيد اول مره والنمسا طبعا اكيد مافيه اي مقارنه بينها وبين ماليزيا من ناحية الجو والطبيعه والصور خير برهان
بس طبعا الي افكر فيه هو غير .... يعني النمسا هي سياحه اوربيه يعني الساعه 6 او 7 الدنيا مقفله .. المطاعم اوف ... لازم تطلع من الساعه 8 الصباح عشان تحس انك روحت اوربا ... طبعا ما عندي اعتراض على هذي الفكره بس انها تصير في شهر العسل احسها شوي صعبة ... خاصه اذا كان السفر بعد الزواج مباشرة .. يعني لو السفر بعدها بشهرين خلاص طاحت الميانه بين الاثنين وعارفين بعض ويصير يسافروا النمسا وجهة نظري انه الواحد راح ينام متأخر طبعا عارفين ليه ... ! سعوديين ومتعودين على السهر يعني صعب يتغير النظام في يوم وليله ...
اون ذا اذر هاند ( في الجهه المقابلة ) ماليزيا ما تقول الا انك بالسعوديه فيه شبه كبير في الطبع اكيد عشان كلنا من ( اسيا ) تنام الين الظهر تصح وتفطر وتطلع وانت ماعندك مشاكل الين الساعه 12 اليل الدنيا اخر حلاوه طبعا كل الكلام دا بس للي رايحين شهر العسل يعني الي راحت عليه ماعنده مشاكل خلاص يروح النمسا والا يروح حتى الهنولولو ما ادري وينها ..!
طبعا العرسان في شهر العسل لازم يكونو متكشخين ووناسه وروحات ورجعات ( ممكن تصير في اروبا ) بس لازم تستكشفها وفيها قلق شويه انه ما تعجبك او تعجبك وتحس انها ارتباط بأوقات الطلعه والرجعه يعني ما تحس انك على راحتك عارفين العرسان ما يصحون بدري طبعا لو السفر بعد الزواج بفتره ممكن بس بما انه بعدها على طول ماذا تفضل هل النمسا ؟ او ماليزيا ؟
بنا على ما تقدم ذكره
هل تحليلي صحيح ومنطقي او انه هناك رأي اخر ( المقصود للعرسان ) فقط ونستأنس برأي المتزوجين ويمتنع استقبال رأي المطلقين ....امزح
اول شيء اخوي احب ابارك لك .. واقول الله يجمعكم على خير ويطرح البركه فيكم... ويرزقكم الذرية الصالحه
بالنسبة لي.. اشوف ان ماليزيا احسن لشهر العسل من النمسا لعدة اسباب ومنها :
مثل ما قلت ان اوروبا تبند بدري في اليل وحتى ماليزيا تبند بدري لكن مب مثل اوروبا .. وبعدين اوروبا بعد ما تبند المحلات ما تحصل حد برى الأ القليل وبعض السكارى (الله يبعدهم عنا وعنكم) اما ماليزيا وحتى لو بندت المحلات فهي بلد اسلامي آمن تقدر تطلع بكل راحةو العالم رايحه يايه ولا كأنه فيه شيء... اما بالنسبة للقومة من الصبح بدري .. فانا اختلف معك .. حتى في ماليزيا لازم تقوم بدري اذا بغيت تزور الأماكن لأنها تفتح بدي وتسكر بدري وبعد عشان تغتنم الجو الأبرد عشان ترجع على فترة الظهر وترتاح..
السبب الثاني اللي يخليني افظل ماليزيا عن النمسا للمعاريس هو الأسعار.. فمثل ما نعرف فرق كبير بين الصرف في ماليزيا وبين دول اوروبا وهذا الشيء بيأثر على ميزانية المعرس وايد لأنه رايح شهر عسل يعني لازم يدفع .. ويحجز افخم الفنادق ويدور ارقى المنتجعات.. في ماليزيا ممكن تحجز في ارقى فندق في المدينه واحسن نوع غرفه في الفندق تاخذها ب 800 درهم أما في النمسا 800 درهم هو سعر الغرفه الستاندرد في فندق 3 أو 4 نجوم..
هذا رأيي .. ممكن الأخوان يتفقون او يختلفون وياي في هالنقطه واتمنى اكون افدتك.
بوسعيد