السلام عليكم هلا حبايبي كيفكم ان شاء الله تمام انا توني راجع من القاهره والحمدلله انبسطت بسطه ماكنت متوقعها كنت متخوف من الكلام الكثير عن القاهره وعندي مجموعة نقاط حبيت اذكركم فيها يمكن احد يستفيد منها وان شاء الله تدعون لي
- موضوع البخشيش في مصر يبالغ فيه الأعضاء ، انا رحت قلت الله يعيني على بثارتهم عادي لاتشيل هم فيه بخشيش عندهم لكن مو التصور للي حاطينه الناس انت خلك ذيب لاتحاول تبخشش الا اللي تحس انك تبي تسفيد منه زي يوم رحنا مكان والله لو تموت ماتلقى لك طاوله فاضيه نشبت في واحد قلت لك بكرمك وضبطني اشوى ماقصر وترا البخشيش خمسه جنيه كثيره عليهم عاد حسب المكان اللي انت فيه المهم لاتزيد عن عشره واللي بالشوارع طنشهم مره لاتعطيهم ولا شي نصيحه
- التكاسي برضو كنت شايل همهم قالوا لي بتكره نفسك لما تفاصل معاهم كنت ناوي اخذ واحد باليوميه والله محترم هو بس قلت بينشب لي وبيربطني وما احب الربطه اليوميه حلوه للعوايل لكن شباب اتوقع مالها سنع انت اذا كنت ساكن في الماريوت او الكونراد او القراند حياة او الفنادق هذي او القريبه منها كل المشاوير اللي حولك بالكثير 5 او 7 جنيه وابعد شي ترا مدينة نصر هالايام ياخذون يعني 10 او 15 لاتزيد عنها انت خذها قاعده اكثر الاماكن قريبه الا قرية فلفه والملاهي والقناطر والاهرامات هذي في حدود 15 او 20
- افضل ملاهي كما ذكروا الاخوان دريم لاند وعلى فكره دريم لاند هي نفسها دريم بارك لها اسمين مادريت الا هناك وافضل وقت لزيارتها يوم الجمعه يعني خلص من قرية فلفله واطلع للملاهي وعلى فكره الملاهي ماتسكر الا 12 بالليل .
- شارع الهرم نصيحه لاتعطي احد هناك اي وجه وزلبهم على طول لان كلهم هناك عصابات وبلاوي يبون بس يصدون فيك ويطلعون كل اللي معك مره سو نفسك ماتسمع ولا تعطيهم ادنى وجه
- الماريوت سكنت فيه وكنت متوقع غرفه احسن من كذا اعتبر نفسي خذت فيه مقلب تبون نصيحتي لسكن محترم وسعره حلو الكونراد واحد من اخوياي ساكن فيه ووراني الغرفه فعلا مستوى خمس نجوم لكن الماريوت والله غرفه اقل من مستوى خمس نجوم صح جوه القاردن فله بس اتوقع انه حد غرفه ثلاث نجوم جدا قديم
- قرية فلفه لاتفوتكم روعه وموقعها ترعة المريوطيه ونصيحه احجز قبل بيوم وافضل وقت للذهاب اليها هو يوم الجمعه لانها تكون زحمه بها اليوم طبعا هي تقدم وجبه غداء وهالايام مره زحمه اللي بيروح لها نصيحه يحجز قبلها بيوم ويجي وهو مبسوط روح لها على الساعه وحده ونص او ثنتين الظهر لين الساعه 6 او سبع جوها مره رايق ويقدمون عروض وسعة صدر بصراحه
- مقاهي الحسين لاتفوتونها هذي روحوا لها على الساعه وحده في الليل انواع العوائل الخليجيه والاستهبال وانتبهوا منهم تراهم نصابين مره يقول لك الحساب مره100 مره خمسين يعني على مزاجهم بس حاول دايم تحجر لهم ولاتدفع كثير ذاك اليوم جلسنا في قهوة الزهراء حنا ثلاثه المهم يوم قضينا قال الحساب 70 ضحكنا عليه وجلسنا نستهبل قال خلصونا ادفعوا قلنا بكم الشاهي قال 10 وحنا ماخذين ثلاثه شاهي ونشبنا له وطلع حسابنا اخر شي 20 جنيه والجلسه اللي قدامنا هم خمسه اسمعه يقول حسابكم 350 جنيه والزلايب صدقوا على اساس كذا يلعبون علينا دايم لاقين ناس ماتدقق وراهم انتبهوا منهم ، لكن جوها مره حلو بسطه واستهبال وسعة صدر روحوا للجهه اللي فيها مقاهي ليالي الحسين والزهراء والمالكي هذي اروق جهه
- فيه مطعم اسمه البيت بيتك رايق مره هذا سهره ويقدم عشاء وقته من الساعه وحده بالليل لين الساعه 7 ونص الصبح فيه ناس يغنون بس لازم ذا تحجز قبلها بيوم لانه مره زحمه وعلى الشخص ياخذون 400 جنيه هو صحيح مغلينه هالسنه لكن جوه لايفوتكم للعوايل اللي مايحبون اجواء الاغاني ترا كله غناء بغناء على اساس كذا حبيت اذكركم
- لاتنسى عند الوصول للقاهره من بكرا او بعده تروح لمكتب الخطوط اللي انت جايه على متنها لتأكيد حجز العوده هذا اهم خطوه ارجو انكم ماتنسونها ولا ترا بتاكلون هوا لان الرحلات مرره زحمه رح لهم بعد وصولك بيوم او يومين اكد حجز العوده بتقول لي انا اصلا حجزي اوكيه شلون ااكده بقول لك رح اكده ولا بيطير عليك الاوكيه
- القناطر لاتفوتكم والله حليوه كنت متخوف منها يقولون خايسه لا حلوه ماعليها والله لكن انتبهوا هناك اول ماتوصلون وتسأل عن السعر بيجيب لك كتلوج يقال لك شغل مرتب بيقول لك فيه جوله صغيره وكبيره ومدري ايش وبنمر على جزر ودك تسمع بها الجزر ولاتشوفها عاديه ترا المهم قل له ابي اكبر رحله رحله مفتوحه حول اربع ساعات تدرون كم قالنا قال المفتوحه 412 يقال لك دقيق يعني المهم والله انا ماخذينها ب 100 جنيه وطلعنا من 5 العصر ومارجعنا الا 9 وربع تقريبا ترا نصابين بالاسعار كسروا روسهم ونصيحه اللي بيروح بها المراكب يجيب عدته الكامله معه حنا غلطنا جب معك بساط وترمس فيه شاهي وحب وبساكيت ووسع ابو صدرك لان المقاهي اللي يمرونها على الجزر يصلحون الشاهي من موية النيل يعني بربسه على كيف كيفك انتبه تشرب شاهي عندهم جب عدتك كامله شاهي مويه بساكيت بساط على اساس تطلع الدور الثاني اللي بالمركب تتقهوى وتنبسط والله فله واحلى وقت لزيارتها الساعه 5 او 6 العصر لين 9 او عشر الليل
- الاهرامات ينصح بزيارتها على الصباح اول الصبح رح لها وزلب اللي يجونك اول شي قل للسواق ابيك تدخلني جوا مره عند اماكن تجمع الخليجيين لان الفله وسعة الصدر كلها هناك اذا قال لك وين بالضبط قال له خششني جو مره مواعد اصدقاي عند اماكن تجمع الخليجين وماعليك اي احد يجيك زلبه لين توصل للزحمه واماكن الكافتريات هناك زحمه وهبال وفيه خيول يأجرونها ودبابات وجمال بس اكثر شي الخيول طبعا يقول لك لفه صغيره وكبيره قال ياحبيبي ابي اكبر لفه وكسر روسهم قال لنا ب 300 حنا ثلاثه قال ب 300 ويطلع معكم واحد ورا الخيول خبرك حنا خياله المهم كسرنا راسه والله انا ماخذين الثلاث خيول بالمرشد اللي يحلقك اذا جبت العيد بالخيل ب 70 جنيه انا اشوفها جدا معقوله من 300 الى 70 على جميع الخيول هناك بالذات نصب في الاسعار كسروا روسهم باللي تقدرون عليه ولاترحم اخفس في السعر اذا قال 300 قل 70 وفيه غيره مليون ترا لاتفوتنها والله هبال على الصبح تشوف الخليجين انواع الاستهبال
- افخم سوق عندهم هو سيتي ستارز موقعه بمدينة نصر سوق من جد قوي كنه الستي سنتر اللي بدبي متعوب عليه اما بالنسبه لجنينه مول والله ماتوقعته بها المستوى خايس بصراحه كنه سوق الشعله (سكان الرياض هم اللي يعرفون سوق الشعله ) بصراحه ستار سيتي قوي مره لايفوتكم وعندهم سوق مشكلته صغير لكن فخم ولافيه سينما اسمه فيرست مول في الفندق الفورسيزونز اللي عند جنينة الحيوانات
- فيه كافيين جوها حلو الفرايديز رح له بعد المغرب مباشره على النيل هو وفيه كافي المندره اللي في الهيلتون رمسيس هذا رح له على 12 بالليل رايق
- اشين شي بمصر هاليومين المينيم تشارج يعني كل مكان تروح له يقول لك هالجمله ومعناتها الحد الادنى للطلبات وانت اذا دخلت اي مكان تأكد بكم المنينم تشارج وحاول دايم انك تحلله يعني ااذا كان المينيم 150 جنيه مثلا تطلب طلبات ب 150 جنيه لاتطلب شاهي وبس حللها وكل شوي اسأله كم باقي ويخلص المينمم حللها بالعربي ودايم دقق بالفواتير ترا يحطون لك اشياء ماطلبتها كل فاتوره تجيك دقق اللي مكتوب فيها
- عاد الاماكن السياحيه في القاهره انا كتبت بعضها والباقي الشباب ماقصروا فيها انا حبيت اعلق على الاشياء المهمه اللي رحت لها
- مطار القاهره نصيحه اذا كنت ناوي ترجع لديرتك رح قبل الرحله بثلاث او اربع ساعات والله يافيه زحمه غير طبيعيه وشغل انواع البربسه رح وروق ولاتزنق نفسك لان شغلهم بربسه وزحمه بشكل ماتتوقعه
- لاتفوتكم الجلسات اللي على النيل عند القراند حياة مره رايق وفيه جلسات على كبري قصر النيل حلوه برضو اسمه كازينو قصر النيل مره حلو
- خذوا لكم عربه خيل على كبري قصر النيل سعة صدر واستهبال الخليجين هناك بشكل غير طبيعي
- مصر ياجماعة الخير والله فله ماتوقعت اني انبسط لها الدرجه لكن فيها عيوب وهالعيوب انت بنفسك تخليها عيوب سهله يعني النصب في الاسعار دايم حاول تكسر روسهم ولاتثق هناك باي احد انتبه والعن ناس سواويق التكاسي اي مكان يمدحه لك زلبه لانه ياخذ عموله عليك خلك انت ومزاجك ولايهمك اي سواق انا بسهرك انا بوديك اماكن زينه زلبهم مره ولاتستشيرهم بشي
- رقم الخطوط السعوديه بمصر للي يبيه 025741200 ومن خارج مصر 002025741200
- افلام السينما احلاها سيد العاطفي ( وفيه اغنيه شابين فيها في كل انحاء القاهره كل مره اشوفك فيها اه ) حلو الفيلم والله وعندك بوحه حليو لكن كنت متوقعه احلى من هالمستوى والسفاره في العماره وسط مو حلو مره بس لابد لك من شوفة هالافلام
- عند مسرحية عادل امام (بودي جارد ) يعرضها في مسرح الهرم كل الايام في الصيفيه ماعدا يوم الثلاثاء راحه لاتفوتكم روح لها مره انبسطنا فيها ونصيحه لاتقص تذاكر قدام اغلى ولاتستاهل خذ لك في النص او ورا بشوي وبيجيك المصري اللي جوا القاعه اذا انت تبي قدام تقدر تدفه ب 30 او 40 جنيه ويجلسك قدام لكن نصيحه خلوكم في النص او ورا شوي والله اوسع صدر
- شرايح الجوال نصيحه مجرب لاتشتري الشرايح الا من امااكنها الرسميه يعني موزع لموبينيل او المحلات اللي في الاسواق لعبوا علي بالفندق حسبي الله عليهم عطوني الشريحه ب 150 جنيه ويوم سألت عنها بالستار سنتر صارت الشريحه ب 25 جنيه انقهرت لكن يالله السفر تجارب وحبيت اوضح لكم هالنقطه لاتشترون الشرايح وايضا كروت الشحن الا من اماكن او موزعين معروفين وينصح تشترونها بالموزعين اللي في الاسواق لايلعبون عليكم مثلي وشحنهم مافيه بركه على طول يقضي اذا سفرتك عشره ايام تقريبا خذي لك الكرت ابو 115 جنيه او اكثر لان الشحن يقضي بسرعه مدري وش قصته
- نصيحه لايفوتكم بيتزا هت بمصر والله ياعليها طعم يفرق عن اللي عندنا بكثير والمطاعم حاول انك ماتحرص الا علي الفاست فود احسن لك وانتبه تاخذ لحم لحمهم مضروب حتى لو من مطعم مشهور وابتعد كل البعد عن السلطات
هذي بعض الملاحظات اللي حبيت اوضحها لكم وان شاء الله تستفيدون منها وسفره موفقه ان شاء الله
بالنسبه للمنيم شارج حتى الرصيف مسوين له منيمشارج والحسين ولا مره طلعنا ببدون هوشه على الفاتوره
اما بالنسبه للهرم في خيول تاخذها من برا اللفه الطويله ب20 جنيه
والفرست مول بصراحه كان ارقى شي السنه بمصر
اما ستارز راقي وكبير لكن متعب جدا جدا ومن ناحية البضاعه دون مستوى المجمع يمكن لانه لسا مااكتمل
بتزا هت بصراحه صادق طعم ولا احلى شي غريب وحتى كنتاكي بعد احلى من عندنا ههه
ماريوت معروف فندق مش ولا بد لا تعليق
اما البيت بيتك سهره حلوه لكن مكان مكتوم بالشيشه والعواميد اللي مخربته والاسعار نار
جراند حلو مره ورايق ويصلح للعوايل
الحفلات حلوه بس محمد عبدو صراحه مصخها اربع حفلات بالصيف كل اسبوع حفلتين وبعد وفاة الملك فهد الله يرحمه بيومين من جد رجل طماع
الحجز كنا على مصر الطيران وبهدلونا بهدله وعشان نأكد الحجز دفعونا عن كل تذكره 300 جنيه ولا بعد حولونا من درجة البزنس الى السياحي انواع العصابات والفساد الاداريي بمصر الطيران
بصراحه احنا نسافر لمصر من زمان ونحبها بشكل جنوني لكن الي صار السنه نتمنى انه مايتكرر من ناحية سوء المعامله والنصب