من أدب أهل الحجاز
لما أحد يسألك كيف حال العيال ؟ تقول له : "يقبلوا يدك"
يرد عليك : "يقبلوا توب الكعبة"
من أدب أهل الحجاز
نادرا جدا يكون فيه بنت ما تعرف تطبخ من أهل الحجاز
وإذا ما تعرفي عيب تقولي ما أعرف قدّام الناس لأنها فشلة لأهلك
من أدب أهل الحجاز
في الزواجات والعزاء .. العشاء والتجهيزات كلها على الأهل أو الأرحام والأقارب أو أهل الحيّ والمعارف
وأصحاب المناسبة هم الضيوف
من أدب أهل الحجاز
لمن أحد يجي يخطب بنتهم ما يقولوا نبغى مهر كدا ويتشرطوا
من أدب أهل الحجاز
حين يقال لك : "تعبناك معانا" أو "أزعجناك"
فقل : "خدَّامينك" .. أي إنما أنا خادمٌ لك
من أدب أهل الحجاز
يقال للأخ الكبير : سيدي ، وللأخت الكبيرة : ستيتة
من أدب أهل الحجاز
لما تدخل الأم وبناتها في أي سهرة يدخلوا بترتيب
يبدأوا بالكبيرة وبعدين اللي بعدها واللي بعدها وكدا
من أدب أهل الحجاز
بعد العزيمة يتصلوا المعازيم تاني يوم على صاحبة الحفلة ويقولوا لها : كيفكم بعد التعب ؟
وترد هي : لا تعب ولا حاجة والله آنَسْتونا
من أدب أهل الحجاز
لما يوجهوا الكلام لأكبر منهم يكلموهم بصيغة الجمع كنوع من الإحترام والتقدير زي :
إتفضلوا .. إرتاحوا
من أدب أهل الحجاز
لما تقول لأحد فيهم : ( يا سِيدي )
يرد عليك ويقولك : سيدي وسيدك مولاك
ولما يقدم لك حلاوة يقولك : حَلِّي وعلى النبي صَلِّي
من أدب أهل الحجاز
لما أحد يعزم الناس محد يجي وإيدو فاضية .. لازم يكون جايب معاه حاجة
من أدب أهل الحجاز
إذا أحد من الكبار جالس على الأرض ما يصير تجلس على كرسي أو مكان أعلى منه
لازم تنزل تجلس مثله على الأرض
من أدب أهل الحجاز
لما يكون عندهم ضيف وراجع بيته .. ما يقفلوا الباب وراه ويدخلو بيتهم حتى يركب الضيف سيارته ويمشي
ما أجمل وأروع أخلاق وعادات أهل الحجاز أيام زمان