1. فيه نقطة اخرى لاحظتها بالبريطانيين اللي هي حبهم للفلوس


2. قالوا لاخوي ادفع 600 ويطلع جوازك بسرعه ونفس الشي قالوه لامي


3. والحين خلوني اختصر لكم الموضوع بنقاط


4. نقاط مهمة

السلام عليكم ورحمة الله وبركاته
في الشهر الماضي (مايو) جربت اصدار تأشيرتين بريطانيتين للوالدة ولأخوي
وبعدهم ب4 ايام جربت أصدر تأشيرة امريكية لي
وستجدون في هذا الموضوع مقارنة بين اجراءات اصدار التأشيرتين بدأ من تعبئة الأبلكيشن وصولا الى انتظار اصدار الفيزا
أولا تعبئة النموذج
طبعا انا عبيت كل النماذج الثلاث (ثنتين بريطانية لامي واخوي ووحده امريكية لي)
طبعا سمعت كثير بصعوبة نموذج التأشيرة الأمريكية وانه قلق ومادري ايش لكن للامانه بعد التجربة وجدت العكس,
تقريبا نفس الطلبات لكن فيه فرقين لاحظتهم بين الامريكية والبريطانية الأول هو انه البريطانية تطلب جميع بيانات والدي المسافر يعني رقم جواز امه وابوه وتاريخ ميلادهم و
اما النموذج الامريكي يطلب فقط اسماءهم
في نموذج التأشيرة البريطانية طلبوا جميع التفاصيل لسفراتك آخر 5 سنين
اسم الدولة وتاريخ الدخول وتاريخ الخروج ((هنا قعدت ساعه اقلب بذالجواز واسجل التواريخ قلق)
اما التأشيرة الامريكية يطلب اسماء فقط وحتى ماتكتبها تختارها اختيار
الامريكية لازم ترفق صورتك اون لاين بعد ماتعبي النموذج اما السفارة البريطانية مايحتاج بس تاخذ الصور معك بالموعد
الامريكية تسدد عن طريق سامبا سواء بالنت او بالبنك اما البريطانيه اي فيزا تمشي
هذي الفروق اللي لاحظتها بالنسبه لتعبئة الابلكيشن والدفع واي اجراء قبل حجز الموعد
نجي الان لحجز الموعد نفسه
البريطانية لما عبيت النموذج وجيت بحجز موعد مالقيت موعد الا بعد اسبوع
الامريكية لما عبيت النموذج وجيت بحجز موعد لقيت موعد من بكرا
والان نروح لوقت المقابلة نفسها
وديت اخوي وامي لموعد مقابلتهم ماطولوا داخل للامانه ربع الى ثلث ساعه بالكثير وهم طالعين
بينما الامريكية طولت جلست حول ساعه الى ساعه ونصف وذلك لأن فيه اجراء اضافي وهو المقابلة الشخصية

فيه نقطة اخرى لاحظتها بالبريطانيين اللي هي حبهم للفلوس

قالوا لاخوي ادفع 600 ويطلع جوازك بسرعه ونفس الشي قالوه لامي

بينما الامريكيين حرصونا وقالوا لنا وعادوها اكثر من مره (تستلمون جوازاتكم من ارامكس ومجانا ولافيه اي رسوم اضافية) ولا طروا لي ادفع زياده ولا شي بالعكس قال لي الي سوا لي المقابله انها خلال اسبوع تطلع ان شاء الله وهذي تحتسب نقطة ايجابية لصالح السفارة الامريكية.
آخر شي المدة التي تستغرقها السفارة لاصدار التأشيرة
السفارة الامريكية مثل ماقلت لكم قالوا لي اسبوع وتطلع تأشيرتك
اما السفارة البريطانية قالوا لاهلي اسبوعين الى ثلاثه ولو تبي اسرع ادفع 600 لكل جواز

والحين خلوني اختصر لكم الموضوع بنقاط

• بالنسبة لتعبئة النماذج الاحظ ان نموذج السفارة الامريكية اسهل واسرع من نموذج السفارة البريطانية
• المواعيد بالسفارة الامريكية تحصل موعد للمقابله من بكره, اما البريطانية اقرب موعد بعد اسبوع
• الاجراءات في السفارة البريطانية اسرع من الاجراءات في السفارة الامريكية وذلك لان السفارة الامريكية عندهم مقابلة شخصية وهذا غير موجود باجراءات التأشيرة البريطانية.
• البريطانيين يحبون الدراهم ويقردنونك تدفع 600 للجواز عشان تصدر تأشيرتك خلال اسبوع عدا ذلك بتاخذ تاشيرتك اسبوعين الى ثلاثه اما الامريكيين خلال اسبوع وبدون ماتدفع ولا ريال زياده

نقاط مهمة

• الكلام السابق كله ناتج عن تجربة شخصية وقد تختلف تجاربكم عن تجربتي التي مررت بها باختلاف الظروف الشخصية او الزمانية او المكانية وبالتالي ستختلف اراءنا ولكن هذا لايعني ابدا ان احدنا يكذب.
• جميع المعلومات السابقه كانت في تاريخ مايو (25 و26 مواعيد اهلي بالبريطانية و29 موعدي بالامريكية) لعام 2014.
• الى الان لم تصدر أيا من التأشيرات الامريكية او البريطانية .
• جميع التأشيرات المذكورة بالموضوع تمت في مكتب التأشيرات في أم الحمام بالرياض (للبريطانية) وفي السفارة الامريكية في حي السفارات بالرياض (للتأشيرة الأمريكية).

وختاما ان كان بالموضوع خطا فسامحوني وصححوا لي لأن طبيعي ابن آدم خطاء
وارجو ان يكون موضوعي يفيد الجميع