فهد الأحمد
28-04-2022 - 10:10 am
يا هلا فيك يا اخوان
اليوم وبعد انقطاع مدة من الزمن بسبب المشاغل الكثيرة
نكمل معكم سلسلة المطاعم المتميزة المختارة
واليوم راح نتكلم عن مطعم إيطالي حلو (خاصة بعد ما لمست من المشاركات السابقة حب الكثيرين للمطاعم الإيطالية)
المطعم إسمه بيانو بيانو بالدور الثاني بجمعية المنصورية
وهو معرور لقاطني هذه المنطقة والمناطق اللي حواليها (عبدالله السالم -الدعية -الشعب -القادسية)
وهو من المطاعم اللي تعجبني وسعرها جميل
يصلح للشباب والعوائل ايضا وديكوره بسيط وجميل
نترككم مع الصور والتعليقات
وهذه جمعية المنصورية
الحقيقة كان التصوير صعب جدا فالمطعم كان فل على الآخر والواحد يخاف يقع بحرج من التصوير فنطرت الكثير من الطاولات تفضى عشان آخذ راحتي وطبعا كلمت المدير عشان يعطيني الأوكي
(قعد يسألني ليش وإشحقه وحق شنو؟؟):112:
المهم هذه صور المطعم من الداخل
شعار المطعم
شوفوا الديكورات الحلوة
وهذا الركن الخاص بالعائلات
صور السقف
وهذه صورة للمطعم كان مليان وإضطريت إني أصور وطلعوا هالشباب معانا
صور أخرى
وهذا ركن الحلويات
وهذا بوفيه السلطات
وزين حصلنا مكان ماشالله فل
كنت حدي يوعان جان أقولهم هلموا بالمنيو
صور من المنيو
انا كنت وجبي باستا مع الدجاج (فيوتشيني) مع الكريم صوص
والمدام الروبيان بالطريقة الإيطالية (الصوص زبدة وليمون)
وأكيد شوربة البروكلي (طلبي المفضل هناك)
مع العصائر المشكلة
هم دايما يقدمون الخبز مع الزبدة والزيتون (المبشور) - طريقة موجودة بأغلب المطاعم الإيطالية
وانا إخترت بوفه السلطات
وهذه الشوربة
وهذا طبقي انا
بصراحة وايد لذيذ (بس ثقيل شوي ) يعني يبيلك تلعب رياضة بعد العشا عشان تهضم
وهذا طبق المدام
طبعا لازم آكل منه لاني احب الروبيان
الاكل مثل ما قلت لكم حلو وأسعار المطعم معقولة جدا
وبعد العشاء اللذيذ لابد من تحلية
و ماكوا غير التيراميسو كيك مع القهوة الفرنسية
ما نطرت أكلت بعدين صورت هاهاها
لكن مثل ماقلت ماكو على كيكة المريديان أروع كيكة بالكويت (من واقع تجربة)
كانت طلعة حلوة (شنسوي كل طلعة لازم نختمها بمطعم)
والفاتورة كانت 14 دينار سعر جدا معقول .
جربوه وإنشالله يعجبكم
ومنتظرين تعليقاتكم