مرحبا اخواني و اخواتي الكرام و الاعزاء اهل المملكة العربية السعودية الشقيقة ,, اليوم ذهبت مع اصدقائي الى السعودية ,, و انا بصراحة كل مرة اروح السعودية ,, اروح الخبر ,, سواء مع الاهل او الاصدقاء ,, لان الخبر قريبة و شوارعها سهلة و ماتضيع , و ما ابعد ,, و اذا كلش مريت مجمع الظهران مع الاهل ,, او الثقبة مع الاصدقاء لتناول العشاء احيانا ,, و اكثر الاحيان افضل تناول العشاء في الواجهة البحرية في الخبر , يعجبني هذا المكان و ارتاح فيه . لانه مكان جميل و رائع .
لكن اليوم قلت لازم اروح الدمام ,, و اكتشف اللي فيها ,, و الدمام حلوة لكني اخاف اضيع فيها فما كنت اروحها وايد الا اذا مع قرايبي و مو انا اللي اسوق ,,
المهم اليوم رحنا و انطلقنا للدمام ,, مرينا بمدينة رياضية او استاد رياضي اعتقد ستاد الامير محمد بن فهد الرياضي ,, مو متاكد من الاسم ,, المهم واصلنا طريقنا و اكتشفت ان سيارتي يلزمها (بترول) ,, و ماكنت (تارسها فل) في البحرين ,, فقررت اعبي و اترس بترول عند اقرب محطة بترول و هذا ماكان ,, شفنا محطة بس ماعرفنا ندخل لها ,, و شفنا محطة اخرى في الطريق المقابل ,, و قمت ب (اليو تيرن) بالسيارة ,, و عدت لها , و طبعا في البحرين البترول عندنا (ممتاز) و (جيد) ,, فكنت اريد اترس ممتاز ,, و سألت العامل الهندي شنو افضل نوع للبترول شنو الافضل و قعد يقولي فيه 95 و 91 ,, و انت سيارتك لاند روفر و قالي جنه 95 مناسب ,, لاني ماكنت عارف الفرق من بينهم و الهندي ماشرح لي عدل بس قالي مناسب لسيارتك ,, المهم طبعا البترول بالسعودية يمتاز بانه الارخص اعتقد في دول الخليج ,, المهم ترسنا بترول و واصلنا المسير ..
بعد ذلك مرينا بمكان يبدو انه سوق ,, و كان مزدحم بالمحلات و السيارات و الناس ,, و لكن للزحمة الشديده لم نشأ التوقف به ,, وواصلنا الطريق بحثا عن مراكز تسوق ,, و ايضا عن مطاعم متميزة قد نجدها في مسيرنا ,, ووصلنا لمجمع تجاري ,, اوه اكتشاف جديد رائع !!
كان المجمع اسمه (المارينا مول) ,, المهم كان فيه زحمة نسبيا في المواقف ,, بحثنا عن موقف او (بارك) ,, و اوقفنا السيارة و نزلت مع اصدقائي البحرينيين و عددنا اربعة , المهم بالخط العريض تفاجئنا بانه مكتوب على باب الدخول (للعوائل فقط) !! والله امر غريب مجمع للتسوق للعوائل فقط ؟! يعني الشباب مايتسوقون ولا شسالفة ؟! لازم ايي مع حرمة اذا ابي اتسوق !! المهم كنت اسمع بمثل هذه الامور موجودة بالسعودية بس اول مرة تصادفني ,, لان مجمع الراشد مسموح به الدخول عادي ,, لكن كنا نريد الدخول لمجمع اخر للتغيير !! و في البحرين عادي ندخل اي مجمع نبيه بدون اي مشكلة ,,المهم كان الامن عند الباب و مادري من لهجته ماكان سعودي لهجته تميل للهجة الاخوة اليمنيين و كان التفاهم معاه صعب اشوي ,, يقولنا ممنوع للعوائل !! قلنا له طيب كل يوم جذي ؟! او كل المراكز جذي ؟! يقول والله مادري لكن مركزنا للعوائل !!
المهم ماطولناها معاه و مشينا ,, و واصلنا المسير و اكتشفنا مجمع اخر ,, و كان تصميمه الصراحة رائع و جميل ,, كان مجمع (الشاطئ مول) ,, القينا نظرة من الباب الخلفي ,, ماكان مكتوب للعوايل ,, قلنا جميل ,, هذا المجمع الظاهر عادي , لان مو معقول كل المجمعات تكون للعوائل !! و العوائل بطبيعة الحال المقصود انك تدخل و معاك بنت !! اي بنت كانت المهم يكون معاك بنت !!
المهم دخلنا الباركات (المواقف) ,, ووقفنا السيارة و نزلنا ,, و بينما هممنا بالدخول , اذ بالامن يوقفنا ,, كان شاب اسمراني ,, وين شباب ؟! يقول للعوائل !!
اصدقائي هنا قرروا يمشون و استاؤوا حقيقة من هذا الوضع ,, يعني جايين من البحرين و فرحانين و نبي نتسوق و كل مكان نروح يقولون لنا عوائل !! وضع حقيقة لا تعليق عليه و الله يعيين الشباب السعودي على هذه القوانين الغريبة .
المهم انا قلت لازم اكلم الامن ,, و اقوله انه احنا من البحرين ,, و فعلا قلت له و كلمته بانه احنا من البحرين و مايصير يعني نرجع الحين ,, كل مركز نروح يقولون عوائل !! و احنا بحرينيين و نبي نتسوق ,, و قلت له مافي مسؤول اكلمه ؟! ناد لي مسؤول اكلمه ,, و قعد يقولي انتوا من البحرين ؟! قلت له ايه تبي تشوف الجوازات ؟! جوازاتنا في السيارة نجيبهم ؟! يقولي لا مصدقك .. مسكين حسيت انه انحرج و مابيده شي لانه يطبق القوانين ,, و المسكين اتصل بالبرقية لاحد المسؤولين و قاله الظاهر تاكد انهم بحرينيين ..
المهم راويناه البطايق ,, قال حق مسؤوله بالبرقية كلهم بحرينيين ,, قالنا الامن طيب بنخليكم تدخلون بس تقعدون و تاكلون باحترام ,, قاله رفيجي نبي نتسوق , قاله المحلات حق الحريم !! معقول مركز بحاله المحلات كلها للحريم شي غريب ,, المهم الامن ماقصر معانا في حدود امكانياته ساعدنا ,, و شكرناه لانه مانبي نتعشى بالمجمع كنا نبي نتسوق ,, و طلعنا ..
و بعدين توجهنا لمحل ملابس (ماكس) و اشوه بعد ماطلع للعوائل ,, والله حالة كل شي للعوائل في الدمام ,, المهم تسوقنا و بعدين كنا ندور مطعم ,, و مرينا على كورنيش الدمام ,, و ايضا كان جميل المنظر ,, المهم افترينا بالسيارة لين شفنا عدة مطاعم و اخترنا مطعم هندي ماتذكر اسمه عدل (كوبر شندر) اعتقد جذي اسمه ,, المهم فيه قسم للافراد و قسم للعوائل ,, المهم نحاول ندخل قسم الافراد الباب مقفل !!
جانا المسؤول المصري اعتقد يقول السموحة شباب للعوايل اليوم فقط !!
قاله صديقي من البحرين احنا جايين , قاله من البحرين ,, اها بس تفضلوا دخلوا ,, و دخلنا المطعم ..
و راح اتابع لكم القصة بعدين ,, هي بنهايتها تقريبا
ننتظر تعليقاتكم ..