السلام عليكم ورحمة الله وبركاته
يعني ماتبون جزيره اشوف تحطون بينانق مكان جينتنق و يصير الجدول
ليلتين سيلانقور -- ثلاث بينانق -- خمس ليال كوالالمبور
عموما بالنسبه للأطفال معكم في نفس الغرفه عادي مافيه اي إشكال
بالنسبه لنوع الغرف في البيراميد الأفضل تاخذون استوديو لأن السوبيريور صغيره
في الفيرست ورلد احلي غرفه الكلوب روم وممكن تكتبون في الملاحظات انكم تبونها
في المبني الجديد مع ان غرف الكلوب حتي في المبني القديم ممتازه كلها ممتازه
بالنسبه للتريدرز والقراند ملينيوم غرف ديلوكس تكفي بس الأفضل اكيد سويت او إكزكيتف اوسع وفي ادوار علويه
وللمعلوميه لا التريدرز ولا القراند ملينيوم فيهم شطاف كلهم بدون شطاف شوفيهم بتوقيعي
اما البيراميد والفيرست ورلد فيهم شطافات
بالنسبه للذهاب من البيراميد لجينتنق افضل واريح شي التاكسي بحدود 130 الي 150 رنقت ذهاب فقط
لكن ممكن تروحون بالباص من محطة الكي إل سنترال فيه باصات قو جينتنق الشخص ب 47 رنقت
ذهاب وعوده وتلفريك و تذكرة العاب خارجيه او باص وتلفريك ذهاب وعوده الواحد ب 19 رنقت
وتاخذون تاكسي من البيراميد للكي إل سنترال بحدود 35 رنقت تقريبا
بالنسبه لأفضل الأماكن
شوفي الرابط وموجود فيه جميع المواقع و الأماكن اللي تستحق الزياره
وانا بأقولك أهم الأماكن وأكيد فيه غيرها الكثير
في سيلانقور
ملاهي الصن واي لاقون المائيه وسوق البيراميد هذي أهم مافي سيلانقور
ولو عندك وقت ممكن تمرون الماينز ويندر لاند مع انها عاديه وممكن بعد تزور مدينة الأضواء
او المسجد الأزرق بعلم شاه
بالنسبه لجينتنق بس التلفريك والألعاب والجو الجميل و في الطريق مزرعة فراوله صغيره
وبالنسبه لكوالالمبور
الأماكن كثير عندك اهم شي البرجين ومجمع سواريا وحديقة البرجين بعد العصر جميله جدا جدا
وفي نفس منطقة البرجين عالم تحت البحار لو مارحت للي بلنكاوي تروح له وهو افضل
وفي كوالالمبور شارع العرب في الليل أسواق ومطاعم ومقاهي وحركه ووناسه
وتخصص يوم لجينتنق من الصبح للمساء وعندك مجمع التايم سكوير يستحق الزياره سوق والعاب وفندق وعندك برج المناره
وبالنسبه للحدائق لو تحبها عندك حدائق الفراشات والطيور والزهو تروح لهم بنفس الوقت مع حديقة بردانا
وفيه ياطويل العمر حديقة الحيوان حلوه مش كبيره ولو بتروح لها تروح لشلالات تمبلر بارك مو بعيد مره منها
وهي شلالات مريحه الطلوع لها سهل مو متعب
وعندك منطقة بوتراجايا منطقة الحكومه الجديده لو عندك وقت فاضي ممكن تروح لها منطقه جميله وهادئه اغلبها مباني
حديثه حكوميه وفي الرجعه ممكن تنزل بمجمع الميدفالي ميقامول من اكبر المجمعات في آسيا
وعندك أفاموسا انا والله ماحبها ولكن ممكن تعجبك فيها عروض كابوي وسفاري وحديقه بسيطه وحاجات ثانيه
يبي لها يوم كامل وهي خارج كوالالمبور بحدود ساعه ونص
وفيه اماكن كثيره اكيد اني ناسيها ولكن انا ذكرت الأهم
https://artravelers.com/p/re/452938

ألف شكر أخ zazaz على الرد السريع الوافي
أنا رحت بينانغ من قبل ماحبيتها ذاك الزود والحين معاي يهال مابي أشحططهم مشاوير بعيدة ماتسوى
جنتنغ مدينة السحاب والبراد والأحلام وايد أحبها ومابي أستغني عنها لابد من ليلتين مبيت
ومشكلة الشطاف مالها حل سهل غير تغيير الفنادق؟!
أنا وايد حابة هالفنادق ومالقيت بديل أفضل منهم
بالنسبة للأماكن المقترحة كلها حاطتها في بالي عدا حدائق الطيور والزهور والفراشات
أحسهم مقلب وتعب ومضيعة وقت من وجهة نظري كلش ماحبيتهم
أفاموسا ماتنحب بس تصلح لليهال عروض السفاري والكاوبوي والهنود الحمر
بس بوتراجايا غير واردة في البرنامج ماعتقد اليهال بيستمتعون فيها ولا المسجد الأزرق بعد

كرستالة
بلعكس العروض الملونه بالاحمر ماتصلح للأطفال فيها مناظر خادشه للحياء.

kgprussia
أخي الكريم أنا حضرت عروض الهنود الحمر ماجفت مناظر خادشة للحياء!!
صحيح لبسهم ملون ومبهرج لكني ماجفت عري وإسفاف!!

صباح الخير جميعاً
شدعوة 80 زيارة ومافي إلا ردين!!
ماكانش العشم بصراحة
وين خبراء ماليزيا وينكم كلكم؟!

1. أهلآ أختي الكريمة ( كرستالة )

أهلآ أختي الكريمة ( كرستالة )

• شهر فبراير من أفضل الأوقات لزيارة ماليزيا ( أجواء أحلى + أسعار أرخص + سياح أقل )
• تقسيم الجدول مريح بصراحة ... وأنصحكم بأعتماده
• في ( الفيرست وورلد ) أطلبي السكن في البرج ( B ) وهو الجديد ... وتفضلي تقريري

https://artravelers.com/p/re/548096

• الشطافات في ( الفيرست وورلد والصن واي لاقون ) والتريدرز بعض الغرف فيه شطافات
• أي طفل تحت ( 12 سنة ) يسمح له بالسكن في نفس الغرفة ... يعني مافي مشكلة بأذن الله
• من الصن واي لاقون إلى جنتنغ ... تاكسي بسعر ( 140 رنقت ) والمسافة ( ساعة فقط )
• من جنتنغ إلى كوالا ... تاكسي بسعر ( 90 رنقت ) والمسافة 45 دقيقة فقط

وبالنسبة لأهم الأماكن السياحية في سلانجور :
1) بحيرة بوتراجايا ... ساحرة جدآ ومميزة وتستحق الزيارة
2) المسجد الأزرق الشهير ( مسجد صلاح الدين ) من أجمل المساجد الإسلامية في العالم ...
3) حديقة الحيوانات ( أعزكم الله ) وأسمها ( زوو نيجارا )
4) مبنى رئيس الوزراء ... مبنى رائع وجميل وتستطيعون زيارته والتصوير
5) منتزة وملاهي ( ماينز وندر لاند ) ... وأسألوا أي تاكسي راح يوصلكم لها بأذن الله .
بالنسبة لأهم الأماكن في كوالالمبور :
1)زيارة البرجين ... يجب الحضور قبل الساعة ( 8 صباحآ ) للحصول على التذاكر المجانية وهي توزع لأول ( 1000 زائر فقط )
2) برج المنارة ... بجوار البرجين ومن خلاله تستطيعون رؤية ( كوالا ) من الأعلى في منظر بديع ورائع
3) شلالات كوالالمبور ... وهي تبعد عن العاصمة ( ساعة بالسيارة )
4) مجمع حدائق ( بردانه ) ... رائعة جدآ هذه الحدائق لاتفوتكم ...
5) عالم تحت البحار ( أكواريا ) ... كأنك في قاع البحر ... ترون سمك القرش على الطبيعة أمامك
6) زيارة المجمعات الكبرى مثل ( التايم اسكوير - البافليون - البي بي بلازا )
7) زيارة أفاموسا ... وتبعد عن العاصمة ( ساعتين ) وفيها عروض رائعة مثل الكاوبوي ومغامرات الحيوانات ( أعزكم الله )
8) زيارة المسجد الرائع ( نيجارا ) ... وهو مسجد جميل ومن أبرز المعالم في كوالالمبور

مادري شلون أشكرك أخوي
بصراحة إجابة كافية ووافية بإذن الله
وهالصفحة باحفظها في الفيفوريت عشان تفيدني
يهمني تنجح الرحلة بجميع المقاييس لأنها لخاطر عيالي الله يحفظهم