اختي سنفوره
راح نبدا معاك من الصفر
اول شي تروحين التعاونية للتأمين بالخبر وتأمنين المده اللي تبغين ، وبعدين تروحين للخطوط القطرية ( مادري إذا عندكم بالخبر أو بالبحرين )
انا اخذتها من الكويت بسهر 3000 ريال ( كويت -دوحة -ميلانو - جنيف - دوحه - كويت)
وإذا قصيتي التذاكر طيري طيران للسفاره الايطالية ونزلي جوازاتك هناك
إذا عملتي هالثلاث خطوات تعالي ونقعد على روقان ونخطط رحلتك صح
بس نصيحه شيلي روما من البلان حقك
تحياتي / مستر ماس

Mr.Mas ليش تروح التعاونيه للتامين ؟ اول مره اسمع كذا
معليش داخله عرض

يا اختي انا سويت الفيزا من مكتب سياحي طلعها لي من سفارة فرنسا في جدة بدون حجوزات فنادق او طيران و بدون تأمين و لا تعقيد و تقريبا السعر يفرق فرق بسيط تقريبا 30 ريال يعني ما تسوى بس اهم شي ارتاحي من التعقيد
و المكتب هو : الفيفا

دلوعتي
لاعادي حتى لو طول
اللي اعرفه ان صديقي السعودي اللي بيسافر معاي طلعها من التعاونية للتأمين 125 ريال قبل اسبوع
حتى يومها اضحك معاه واقوله دايم شغلكم معقد حنا نطلعها من مكتب السفريات أو البنوك عندنا
تحياتي يادلوعت....

مكتب الفيفا الموجود عند عمارة عبد الله فؤاد او عند الجوازات اللي بالخبر
هو اللي يطلع التأشيرات والتأمين في فترة لاتتجاوز العشرة ايام الى اسبوعين
لو اطلعوها من الرياض اسرع واوفر واختصارا للوقت
وانا نفس الشي ان شاء الله مسافر لايطاليا على نهاية جولاي
لكن المشكلة الفكر مشوش ولا اعرف اي المناطق الافضل
فكل عضو او عضوة له رأي
بالنسبة للمكاتب هو في اثنين واحد بالخبر والاخر بالدمام
واسعارهم معقولة واغسلي ايدك عن بقية المكاتب الثانية
والمعذرة لاني قريت الموضوع على عجل ولي عودة ان شاء الله

معليش اخوي Loyal to you ولا يهون الاخوة والاخوات
ممكن تحددوا لي موقع مكتب الفيفا بجدة وعنوانه ,,,,,,,
بارك الله فيكم

اعذرني اخوي lion 123 انا من سكان الشرقية ما عندي علم عن اللي في جدة اذا تبي اي شي من الشرقية من عيوني انت بس امرني

تسلم أخوي Loyal to you على الرد ،،،
وما نستغني عن خدماتك جعلك سالم ،،،،،،،،

1. بالنسبه لسفرتنا احنا نبغى نبتدي بروما اول شي


2. مو من اختصاصي ولا اختصاص القسم فما اقدر اجاوبك ...


3. * وش اسهل وسائل التنقل بين المدن بالنسبه للعائله ؟؟

اهلا وسهلا اختي سوسو ...
ياهلا والله بابناء الخبر ...
اسمحيلي اجاوب على اسئلتك بالتفصيل الممل ...
بدخل بالموضوع علطول ...احنا عائله من 9 اشخاص === ادري كثار مرره :112:
هذه المعلومه مهمه جدآ وبتغير عليك كثير من الترتيبات وبتفرق معك كثير من الامور عن العائله الصغيره او مجموعة الشباب العزاب ...
وبعد تشاورات عديده اخترنا انا نسافر لاوربا
ونعم الاختيار ، بلا مصر بلا سوريا بلا بطيخ ، سافروا اوروبا وشوفوا الناس الحلوين والانظمه المتطوره ...
انا استفدت مره من المنتدى بشكل كبير وصراحه الله يعطيكم العافيه على المجهود الاكثر من رائع صراحه ماتوقعت انه يكون فيه منتدى عربي بهالمستوى ... فما قصرتو والله ..
جميعنا استفاد من تجارب الاخرين ، وانا لولا الله ثم مواضيع الاخوان والاخوات الكبار اللي هنا ما قدرت اخطط لرحلتي السابقه لايطاليا فلهم جزيل الشكر ...

بالنسبه لسفرتنا احنا نبغى نبتدي بروما اول شي

بدايه موفقه واختيار صائب على اعتبار ان روما بوسط ايطاليا تقريبآ واقرب الى الجنوب ولا يوجد اسفلها مدن مثيره للسياحه باستثناء جزيرة صقليه ذات الآثار الاسلاميه والتي لا انصح بزيارتها للعائلات الكبيره فهي لا تناسبهم كما انها ليست بذات القيمه السياحيه الكبيره ، ومن روما تستطيعين اختي ان تتوجهين شمالآ مرورآ بكل المدن التي ترغبين بزيارتها ...
اما بالنسبه للمدن الي نبي نروح لها أهم شي روما و ميلان و فينس و وبيزا و نيس
وقرأت كثير عن ريموني ورتيشني و فلورنس فما ادري هل تستحق الزياره وهل فيها ترفيه؟
روما اكيد لابد من زيارتها وهي نقطة البدايه كما اتفقنا وميلانو مدينه مهمه للتسوق ولانها ستكون محطة العبور الى سويسرا وفرنسا وفينيسيا لابد من زيارتها لمن يزور ايطاليا وهذا امر مسلم به ، بالنسبه لبيزا فهي ليست مدينه كبيره انما بلده صغيره يقع بها البرج المائل الشهير وزيارة بيزا مع برجها المائل لا تستحق اكثر من نصف يوم فقط فلا يوجد في بلدة بيزا اي شي مثير للاهتمام سوى البرج المائل ، بالنسبه لفورنسا فارى ان من المهم زيارتها وستكون نقطة انطلاقك لزيارة بيزا من خلال فلورنسا وكما ذكرت لنصف يوم ليس اكثر باستخدام القطار بين فلورنسا وبيزا ، اما عن ريموني ورتشيني فلست خبير بهما ولكن يقال الكثير عن شواطىء ريموني فهل لدى عائلتك استعداد للتمشى على شواطىء ايطاليه اوروبيه بمناظر ؟؟؟؟
وطبعا نبغى نروح نسير على سويسرا ونختمها باسبوع في باريس ..

مو من اختصاصي ولا اختصاص القسم فما اقدر اجاوبك ...

• *يعني وش افضل خطوط علما اننا بالخبر ولكن نفضل السفر عن طريق البحرين .. عملت بحث في موقع خطوط الامارات ولقيت حجز على اخر جولاي فهل تنصحون بهذه الخطوط؟؟

افضل خطوط تسافر بك الى ايطاليا هي الخطوط القطريه ومكتبها موجود بواجهة مجمع ابراج الدوسري على شارع الظهران بجوار مكتب داناتا للسفريات واسعارهم طيبه جدآ وخط سيرهم مباشر الى ميلانو او روما وخدماتهم ممتازه ، ونصيحتي لا تسافرين عن طريق البحرين حتى لو كانت الاسعار ارخص بقليل فالمطار سيء والتنقل من والى المطار متعب قليلآ ...

• * بالنسبة للفيزا والتأشيرة والتأمين .. من فين اقدر اطلعهم ؟؟ هل لازم نروح الرياض او عادي لو رحنا للسفاره الايطاليه بالبحرين ؟؟ووين مكتب التأمين بالخبر ؟؟

الفيزا هي نفسها التأشيره واذا حبيتي تطلعين الفيزا مايحتاج تروحين لا الرياض ولا البحرين انتي سلمي اوراقك وجوازاتك الى مكتب الفيفا المتخصص بتخليص اجراءات الفيزا ومكانه موجود عنكم بالخبر في العقربيه على شارع 10 انا ماخاب ظني ( وانا جاي من الدمام بعد ما طلع من نفق تقاطع شارع البيبسي اول اشاره اخذ معها يمين والقى المكتب على يدي اليمين عاشر محل تقريبآ )
بالنسبه للتأمين مو شرط انك تأمنين على السفر اصلا ولكن بعض السفارات تشترط كذا على المتقدميين لتأشيراتها والسفاره الايطاليه واحده من اللي يتشرطون وعمومآ التأمين سهل تروحين لاقرب مكتب لشركة التعاونيه للتأمين وتعملين تامين للسفر ( مهم ) لازم المده اللي تأمنين فيها تكون نفس المده اللي بتسافرين فيها والافضل انك تاخذين تامين طويل والاسعار رخيصه ، انا امنت لشهر ب 150 تقريبآ ...

• * عرفت انه التقديم لازم نعطيهم اوراق الحجز طيب كيف اجيب لهم اوراق وانا لسا تاركه الحجز عالخطوه الثانيه ؟؟

صحيح هذا شرط لابد تجيبين لهم اوراق تأكد حجز الذهاب والاياب بالاظافه الى تأكيد حجز الفنادق وازيدك من الشعر بيت انا طلبوا مني كشف حساب بنكي حق 3 شهور باللغه الانجليزيه ...
عمومآ انا ممكن اساعدك بالنقطه هذه اذا كنتي ماحددتي خطة سفرك والوقت مايساعدك على الانتظار فهنا لابد تعملين لك حجز وهمي لتذاكر السفر وحجز للفنادق في نفس الوقت اللي انتي اصلا بتسافرين فيه وهو نفس الوقت اللي يتعملي التأمين عليه وطبعآ المكتب اللي بيعمل لك الخدمه هذه بياخذ منك مبلغ مالي رمزي نتيجة اتعابه
المهم اذا كنتي بتسافرين اخر يوليو فلابد تقدمين اوراقك لمكتب الفيفا من بكره لان التأشيره تاخذ وقت 10 ايام عمل يعني اسبوعين
والاوراق المطلوبه هي :
جوازت سفر سعوديه صالحه للاستعمال لمده لا تقل عن سنه وتحتوي على شريط ممغنط وتاريخ الميلاد يكون واضح بالميلادي وباللغه الانجليزيه
تأمين سفر شامل يغطي المده المقترحه للسفر ويشمل جميع افراد العائله
كشف حساب بنكي لرب الاسره العامل لمدة 3 شهور على الاقل وباللغه الانجليزيه وعلى اوراق رسميه
( ياخذها ويطبعها من الفرع اللي يتعامل معه مباشره يدآ بيد بدون انتظار البريد )
حجز تذاكر السفر ذهاب وعوده وحجز الفنادق
تعريف بجهة العمل لرب الاسره يشمل الراتب والوضع الوظيفي
عدد 4 صور شمسيه حديثه مكشوفة الرأس لجميع المسافرين مقاس 4,5 × 6

• * بالنسبه للجوازات هل صحيح انه لازم لكل واحد جواز يعني مثلا واحد من الاطفال الي مع الماما هل لازم ينعمل له جواز لحاله او عادي؟؟

لابد من جواز سفر لكل فرد من افراد العائله الا اذا كان الطفل رضيع لم يكمل 6 شهور فالوضع هنا يختلف وانا لا املك اجابة محدده في هذه الموضوع

• * تقريبا احنا نبغى نسافر اخر جولاي فهل يمدينا نطلع فيزا ؟؟

يمديكم ان شاء الله بس لازم تقدمين اوراقكم قبل نهاية الاسبوع هذا عشان ترتاحين وما تشيلين هم ان الجواز يتأخر عليك

• *بالنسبه لحجز السكن وش افضل مكتب يكون عنده مصداقيه ممكن نتفق معاه على كامل الرحله وتكون اسعاره جيدا ؟؟

بما انكم عائله كبيره وانتي اللي دقيتي على صدرك وتكفلتي بمهام ترتيب السفره ودام انه ماعندك خبره فالافضل انك تروحين لاحدى المكاتب السياحيه المتخصصه وانا انصحك بمكتب المعجل فهو ممتاز وخبير وهو موجود عندكم بالخبر على شارع الملك عبدالعزيز على ماعتقد ، ولكن الله يعينك على العموله الكبيره اللي تاخذها اغلب المكاتب السياحيه ، وهذه بتكون الخطوه الثانيه بعد الخطوه الاولى المهمه اللي لازم تعملينها الاسبوع هذا وهي تقديم طلبات التأشيره وانصحك انك تستفيدين من تجارب الاخوان في افضل الفنادق في كل مدينه في ايطاليا ترغبين بزيارتها
علما اننا مشتركين بشركة الانترفال (( انترناشونال هوليديز )) الي بالبحرين لكن ماقد سافرنا معاهم من يوم ما اشتركنا ولا مره فالي عنده معلومات عن هالشركه و هل هي كويسه نسافر معها ونتوكل على الله والا نشوف غيرها..
اول مره اسمع بهذه الشركه ولكن اغلب هذا النوع من الشركات والذي يأتي عن طريق مكاتب فرعيه محليه تكون خدماتهم غير حقيقيه يعني شغل نصب في نصب
الخطوه الثانيه انا كنت ابغاكم تساعدوني في اننا نعمل جدول للمدن الي راح نروح لها يعني البدايه راح تكون روما وبعدين مادري اي مدينه لاني ماعرف المسافات بالضبط وايش اسهل ؟؟
هذه سهله ومثل ماقلتلك انتي تبدين من روما وتتجهين شمال وكل المدن السياحيه بتكون على طريقك ان شاء الله
واقترح ان تكون الخطه كالتالي
روما ( 5 ليال )
فلورنسا ( 3 ليال ) > بيزا ( الذهاب لبيزا عن طريق فلورنسا ومن ثم العوده الى فلورنسا مره اخرى ) يعني اعتبري بيزا مشوار من مشاوريك في فلورنسا
ريموني ( 2 ليال )
فينيسيا ( 3 ليال )
ميلانو ( 2 ليال )
ومن ميلانو اذا اردتي ان تكملي المشوار الى نيس بفرنسا فانصحك بان تسافري بالطائره من مطار لاتينا الخاص بالرحلات داخل الاتحاد الاوروبي .

* وش اسهل وسائل التنقل بين المدن بالنسبه للعائله ؟؟

بما انكم عائله كبيره فوضعكم بالتنقل صعب جدآ جدآ وهذا الفرق اللي تكلمت عنه في البدايه ، شخصيآ انا افضل التنقل بالقطار الاوروبي الممتع والسريع والمريح واسعاره متوسطه ومناسبه للفرد الواحد وولكن كعائله كبيره ومحافظه فالسفر بالقطار ربما لا يعطي خصوصيه كبيره وربما سيكون متعب مع حمل الشنط والحقائب الكثيره والكبيره خاصة ان اغلب محطات القطار هناك وخاصة الصغيره منها لا يوجد بها سلالم متحركه او مزحلقات لتسيير الحقائب عليها ، والسفر بالطائره بيكون مكلف جدآ والمدن بايطاليا متقاربه جدآ ولا داعي للسفر بالطائره ، اما الوسيله الافضل لكم فهو السفر بالسياره مع سائق مؤجر يطلع فيكم من الفندق من روما ويوصلكم الى الفندق في قلورنسا وهكذا ...
وهذا مالدي الى الآن ..
ادري اسئله كثيره بس انا ماعندي احد يساعدني وماشاء الله شايفتكم خبيرين فاتمنى انكم تساعدوني
علشان لو عرفت اجوبتي اقدر احمس النايمين الي عندي ويبون كل شي جاهز
ان شاء الله نقدر نساعدك ومانقصر معك وحنا في الخدمه اي وقت يا سوسو ...
تحياتي لك وان شاء الله اكون افدتك ...