1. اولا الحمدالله على سلامتنا رجعنا من السفر ولله الحمد

اولا الحمدالله على سلامتنا رجعنا من السفر ولله الحمد

كانت رحله غايه في الروعه صراحه تركيا ماتوقعتها كذا بلد جميل راقي طبيعه وجو وكل شي حلو فيها حتى شعبها يجنون ماتشوف الا ابتسامه ويحاولون يساعدونك بكل شي
وزياده اذا قلتلهم اني من السعوديه اووف يطيروون من الفرح ودهم يساعدونك باي شي والله ياناس تركيا عجبتني اكثر من اوروبا جامعه كل شي طبيعه +جو+ناس طيبين+دوله مسلمه المساجد بكل مكان+دوله راقيه بمعنى الكلمه+سكن مريح ونظيف +اكل من كل ماتشتهي نفسك تلاقيه
بس مستغربه من الناس اللي يقولون تعاملهم شين بالعكس والله ماشفنا منهم الا كل خيير
اول ماصولنا لمطار اسطنبول الحمدالله كانت رحله مريحه على الخطوط السعوديه وصلنا وخلصنا اجرائات وكل شي وطلعنا وحنا نشيل الشنط جا واحد وعطا الوالد كرته بعد كذا دق الوالد عليه واتفق معه ناخذ سواق يتكلم عربي وباص حلو حجمه مناسب مكيف فيه تلفزيون وحركات يعني مو اي باص كنك راكب طياره خ يكفي 12 شخص لأننا عائلتين ماشاءالله وسعره باليوم 150 دولار والسواق كان عسل اخلاق وتعامل وطيبه قلب وماعمره زعل ولاتنرفز ولاشي وكل مكان حلو ياخذك عليه ومثقف هو من اصوول عربيه
بعد ماوصلنا السكن كان منتجع روعه مره خطير بعيد عن اسطنبول يمكن 70 كيلو بس المنتجع شي مو طبيعي وبالمووت لقينا شاليه واحد
على مااظن اسمه كلاسيز يوم جلسنا وجت الوالده بتطلع للبلكونه صار شاليهنا الله يسلمكم على المسابح على طول والله لايوريكم المناظر كله روسيين قالت امي والله مانجلس ولادقيقه :112:
يابنت الناس وين نروح قالت انام بالشارع ولاانام هنا
جتني الصيحه مابي اروح المنتجع خرشه وفيه جتسكي وبنانا وبولنق ومطاعم واوتيل كبير وكل مايجي في بالك
قلنا مصممه قالت اببد والله مااجلس بين هالمفاصيخ يشوفونهم هالبزران ويجينا غضب
اصلا كلها غير على ابوي ماتبيه يشوفهم ياحبيله
بعد ودعناه رحنا لشقق فندقيه حلووات للعوائل وراقيات ماعليها وفي مكان هادي مره
الشقه فيها 3 غرف صاله كبيره ومطبخ و3 حمامات الله يكرمكم وفيه غساله وحلووه الشقه مرره بس عيبها الغرفه الرئيسيه فيها مكيف والصاله بس اما باقي الغرف لا
انا واخواني مانبي شقق وهجده
نبي ازعاج وعالم ووناسه
بعد كذا تمشينا في اسطنبول ورحنا للمتاحف والقصر وايا صوفيا طبعا عندهم اثار عظيمه
بس تعبت تعب وانا ادور وعطش
ورحنا لمطاعم مطاعمهم رايقه وحلوه واكلهم لذيذ خاصه مطاعم ترابيا
بس غاليه مره اكلنا في مطعم مشهور هناك اسمه mavi balik خاص بالاسماك روعه هالمطعم واطلاله على المضيق وتشوف السفن والجبال الخضرا يووه رومنسي هالمطعم تخش جو فيه
بس 5 اشخاص 1500 ريال
ايه نسيت اقولكم رحنا رحله بحريه قالو فيه سفينه فيها غدا وعروض وناس الخ قلنا مانبي ناس
يع الواحد ماياخذ راحته المهم استئجرنا يخت ساعتين ب 400 دولار وقالو هاذا اجدد يخت عندهم كانت رحله مافيه اروع منها برضو كانت رحله رومانسيه خ
خلاص تعبت الحين اذا ودكم اكمل علمووني
وعذررا على اللخبطه ماكتبت الموضوع بترتيب وتنسيق