وعليكم السلام ورحمة الله وبركاته
هلا وغلا الغالي
وان شاءالله توصلون بالسلامه
بالنسبه للمواصلات فأفضل شي وارخص شي هو شركة الميني كاب ..
تاخذكم من المطار لين الفندق ..
بالنسبه للفندق بكم ناوي تحجز ..يعني أقل من 100 باوند ولا أكثر !!
أما الأماكن السياحيه فأتمنى اتشوف هالموضوع وان شاءالله بتلاقي فيه الي خاطرك فيه
https://artravelers.com/p/re/257584
واي خدمه احنا تحت امرك الغالي

كفو والله يالقطري
تسلم على ردك ياوخيي
موضوعك حلو وايد بس 14 يوم تو متش كلها 3 نهارات بالنسبة لي بسing:
طيب نجي وياك حبة حبة عزيزي القطري.
راح أوصل لندن شي الساعة 8 الصباح من يوم 14 جون
تنصح تقول الميني كاب هي أفضل وسيلة للذهاب من المطار إلى الفندق
طيب، بالنسبة للفنادق، نعم حدود ال 100 باوند مو مشكلة
أخوي القطري ماراح أفكك من قالك توهق عمرك وترد على موضوعي:8888:
==============
بالبداية، موضوعك بالرابط حلو كثير لكن فيه محلات كثيرة أكيد ثلاثة أرباعها
ما أحتاجها كون السفرة كلها 3 أيام بس
بودي إقتراحات لأهم هذه المعالم في لندن واللي تستحق الزيارة في المدة القصيرة هاذي (3 أيام)
إذا اخترنا المحلات اللي تستحق الزيارة.
نجي لإختيار الفنادق
أخوي القطري عندك لمحة عامة عن فندق محترم بحيث يكون من ضمن الميزانية 100 باوند
وأيضاً يكون قريب للمحلات اللي بنذكرها واللي تستحق الزيارة في لندن،ياليت بمعيتك يكون جدول مبدئي للثلاثة أيام هاذي أول يوم شنو وثاني يوم وثالث يوم
،،، للتذكير، المسافرين ثلاثة بالغين يعني مانبي سوالف ألعاب ومادري شنو
الوالد وأخوه (العم) برضو ما يجذبهم أمور التسوق أعتقد يصلح لهم شي تاريخي شي قلاع شي
متاحف يعني من هالأمور.
وكيف أمور الصلاة يعني الشعب اللندني ماعنده فضول لمن يشوفو 3 يصفطون بزاوية للصلاة
أحدهم يقولي أهم شي بلندن لاتنسى تاخذ وياك علبة موية تكرمون للطهارة خبركم لندن حماماتهم مناديل وأنت ماشي:tongue:
لنا رجعة

تروحون و ترجعون بالسلامه
اهم الاماكن السياحيه ::::::
لندن اي
جنبها الاكواريوم
جنبهم : لندن داك تاور : و هو عباره عن سياره تمشي توريك أهم معالم المنطقه و تدخل تمشي بالماي
و الاحسن منها : البيق باص لكنه ما يدخل بالماي ... البيق باص يوريك كل الاماكن السياحيه بلندن من غير ماتنزل ... تشوفها و انت قاعد و أنصحك تقعد بالدور اللي فوق عشان تشوف عدل
البيق باص له محطات كثيره تقدر تركب فيه .. منها عند بوابة الماربل ارش و الهايد بارك كورنر
و فيه سجن القلعه السري ... رعب ... بس ما اعتقد انه يعجب الوالد و عمك
تخيل تدخلهم و هم ما يدرون انه رعب ههه
و فيه متحف الطبيعه روعه و جنبه المتحف العلمي فيه سينما ثري دي تجنن : في منطقة كرومويل : بالانجليزي : ناشيونال ميوزيام و ساينتيست ميوزيام
و مدام توسو او متحف الشمع ... فيه مشاهير من شمع ... مدري يعجب الوالاد ولا لا !!!!
الصراحه الشياب تحتار بذوقهم انت قول له و ان عجبه روحوا شوفوه
و للتمشي ... الهايد بارك و الرجنت بارك و بكادلي و ترافلجار
و فيه حديقة جرنتش و كيو جاردن .... بس بعيد و يمكن ما يمديكم الوقت !!
هذي هي اهم الاماكن
أنصحك تخلي كتاب باي باي لندن معاك ... فيه كل الاماكن السياحيه و طريقة الوصول لها
اما بالنسبه لفندق ... دام انكم اول مره تجون لندن ... الاحسن خليكم في الاجورود .. كله عرب و قريب من الاماكن السياحيه و من الهايد بارك
انت قلت ما تبي تتسوق ... بس احتياطي اعرف اماكن التسوق عشان لو حبيت تشتري هدايا للاهل :
شبر بوش ماركيت : سوق شعبي و رخيص
شارع الاكسفورد و الاجورود : جنب بعض
و احنا تحت امرك بأي استفسار

تسلمين ياوخيتي المرام :8888:
يعطيك ألف عافية ماقصرتي
شباب،،، من الموضوع الرائع للعضو Sniper.ksa تحت هذا الرابط:
https://artravelers.com
يمديه الواحد يقلص خياراته
بالموضوع أعلاه، راح أقلص خيارات الأماكن حسب اطلاعي على الموضوع إلى التالي:
عين لندن

حديقة الهايدبارك

المتحف البريطاني

متحف الشمع - Madam Tussade

ساعة Big Bin

متحف الطبيعة التاريخي - Natural History Museum

الأماكن فوق هي فقط خطة مبدئية أقصد أماكن محتملة فقط...
اقتراحكم ضروري ياشباب في الأماكن المذكورة أو بالتعديل عليها
الأهم، أخواني أحتاج أسماء فنادق محترمة تكون في حدود 100 باوند في اليوم
طبعاً يستحسن تكون في السنتر مع الاماكن المذكورة فوق لو تم اعتمادها
وتكون قريبة من محطات الأندرقراوند أو الباصات
باقي ع السفر شي أسبوعين ضروري جداً أختار هاليومين بالكثير الفندق اللي بسكن فيه الليلتين
ولازم أحجزه بهالفترة من النت
ساعدوني أخواني في الفندق ضروري بليز
أشوفكم قريب

شباب كأنكم نسيتوني حبتين
مالكم بالطويلة
خلاص الحجز وقبل شوي بس حجزت عن طريق النت في فندق:
Thistle Marble Arch
http://www.thistle.com
الحجز ل ليتلين فقط.
في لندن بكون يوم 14 - 15 - 16 جون وبعدها طائرة إلى مدينة Aberdeen
تكلفة الفندق ل ليلتين بالضرائب £ 250.70 بالسعودي قريب (1,500 ريال)
الغرفة Triple ثلاثة أسرة لثلاثة أشخاص بالغين والأسرة مفصولة عن بعضها.
كما هو موضح بالحجز إنو الدخول يكون في الساعة 2 ظهراً
طبعاً وصولي لندن بيكون تقربياً 9 الصباح يوم 14 جون
تم التفاهم مع الفندق إذا كان فيه إمكانية أعمل شيك إن بكير شوي وأبدوا موافقتهم
في حال توفر الغرفة، طبعاً قلت لهم لو نحط احتمال إنو ماكو غرفة في فترة الصبحية هاذي
فيه إشكالية لو خليت أغراضي وشنطي عندكم ورحت تسوحت وجيت لكم 2 الظهر؟
طبعاً البريطانيين شحليلهم، قالي إزهلها يالخوي
شنو إنطباعاتكم يا شباب عن هذا الفندق؟
من ناحية موقعه وقربه من الأماكن اللي ذكرتها فوق ومن ناحية غرفه هل هي أوكي للي سكن فيه بالذات؟
===========
شي ثاني، شباب الحين كيف حجوزات الطيران الداخلي من لندن إلى مدينة أبردين في شمال إيرلندا؟
تنصحوني أحجز من الحين ولا باليوم الثالث 16 جون أحجز مرة وحدة وأسافر أو هناك وأنا في بريطانيا أحجز؟
=======
الأماكن السياحية المذكورة فوق، نصيحتكم الأفضل حجز تذاكرها من النت قبل سفري ولا أفضل
في مكاتب معينة هناك في بريطانيا بحيث تخفيض أكثر يكون فيها؟؟؟
راجعين لكم وطنشوني ها:112:

1. حياك عزيزي ..


2. بالنسبة لخطة الثلاث أيام أنا عندي خطة لك :


3. اليوم الأول :


4. اليوم الثاني :


5. اليوم الثالث :


6. ملاحظات :

حياك عزيزي ..

أفضل إختيار صراحة للفندق .. يعني أتوفقت الصراحة لو إنك من فترة بتدور ما شاء الله عليك كنت راح تختار نفس الفندق .. الفندق موقعه جدا حلو قريب من الهايد بارك جداً وعند شارع أكسفورد الحيوي , وقريب مرة من شارع الأجواررود ( شارع العرب ) يعني إختيار موفق - طبعاً في شارع الأجووررود في بقالات تشتري منها بأسعار حلوة الإحتياجات اليومية لكن للزنقات في بقالة قريبة من الفندق يعني ما راح تتعب

بالنسبة لخطة الثلاث أيام أنا عندي خطة لك :

اليوم الأول :

• مدام توسو : ( متحف الشمع ) : في شارع بيكر ستريت بقبته الخضراء الشهيرة تلاقيها في خريطة المترو على الخط البني محطة مارليبون , رسوم الدخول 27 باوند للفاست تيكيت , وقريب منه المركز الإسلامي الثقافي عند المسجد المركزي .
• شارع أكسفورد : ( جنب فندقك ) شارع حيوي مليان محلات تجارية معروفة وماركات عالمية .

أقرب محطة مترو للشارع : محطة ماربل أرتش على الخط الأحمر , وهذه المحطة أعتقد أقرب محطة لفندقك .

• حديقة الهايد بارك : جوار فندقك , ممكن تركب القوارب الزرقاء في البحيرة في الهايد بارك نص ساعه ب 6 باوند وممكن تجلس على كراسي التشمس ههه ب 2 يورو للساعه أعتقد , لو تاخد خبز من أي مكان قبل ما تروح الهايد بارك عشان تأكل البط في البحيرة برضو حلو لأنه شعور جيد يوم يتجمع عليك البط ههه

اليوم الثاني :

لندن بريدج وساعة البيج بين وقصر الباكينجهام كلها قريبة من بعض , لازم تروح للباكينجهام على الساعه 11 الصبح عشان تشوف تبديل الحراس أمام القصر , والحديقة اللي جنب القصر إسمها القرين بارك بعض الأعضاء يقولوا نحسها مرتبة ومنسقة أحلى من الهايد بارك

• لندن آي : طبعاً غنية عن التعريف أيضاً تطلع لها وتشوف منها لندن من الأعلى صدقني راح تنبسطوا فيها .

اليوم الثالث :

• دام إنكم شباب فقط يعني لا مكان للعوائل أنصحكم تزوروا إما نادي أرسنال أو تشيلسي والإثنين بلندن .
• تاخذ جولة بالباص المكشوف عشان تكون وداعية جميلة للندن الرائعة ..طبعاً تحجز للباص المكشوف من عند الهايد بارك سعر التذكرة 20 باوند لمدة يومين وتمر من عند كل معلم سياحي كل 10 دقائق وتشمل رحلة نهرية في التايمز مدتها 20 دقيقة .

ملاحظات :

• لا تفوتك ساحة البيكاديللي مكان روعه فيه جلسات كافيات والسينمات ومرّ على الهارودز : مول الفايد , جونان .
• في ستار بكس قريب من فندقك وفيه كافي آخر حق النقنقة إن كان حجزك لفندقك غير شامل الإفطار .

أخوي هذا بإختصار ولا كنت أحط لك الصور و أشرحلك كل شي بالتفصيل .

أفتكرت : منطقة النايتس بريدج قريبة من فندقك وروعه ممكن نهاية اليوم لمن تقفل المحلات الساعه 6 أو 7 تروحوا تجلسوا في الهايد بارك وبعد التعب تتعشوا في النايتس بريدج يومياً وهوب ع المخدة قصدي نوم يا حلو و أنا رايح أنام الآن بالتوفيق تروحوا وترجعوا بالسلامة ولو أفتركت شي بأكتبه وما يردني غير كيبوردي .

أفتكرت شي .. يوم تروح من فندقك على الهايد بارك أول ما تدخل الهايد بارك بشوية يوم الأحد .. راح تحصل السبيكرز كورنر هذا مكان تلاقي فيه ناس يجوا ويلقوا كلام عن أي موضوع في راسهم ومحد يقاطعهم وتلاقي ناس جالسة تسمع لهم كثير طبعاً في ناس ترمي أنواع المحشّات والجمل الفكاهية عليهم بس في ناس تسمع تلاقي هناك ناس تلقي كلام عن النصرانية وناس عن الإسلام ممكن تشوف أي شي .
طبعاً فندقك ع الهايد بارك من ناحية الشمال , و في ناحية الجنوب ( عكسها ) تلاقي في الهايد بارك البحيرة اللي فيها البط ( أصحابي ) وهناك الكوفي اللي مطل ع البحيرة لا تجلسوا داخل الكوفي خذوا الطلب و أجلسوا في الجلسات الخارجية عشان تشوفوا البحيرة والناس اللي رايحة جاية براحتكم .
شوف الكلمة ذي عجبتني :
قال احدهم لقد وصلت من لندن ليلة البارحه
فسأله زميله ان كان مر على شارع اكسفورد
فقال هذه اول مره اسمع عنه
فرد عليه اذاً انت لم تزر لندن
تحياتي لك يا غالي

اخوي ... الفندق حلو ... موجود في شارع الاكسفورد
بس ما انصحك تحط الشنط عند ادارة الفندق .... الاحسن تحطهم في الغرفه ...
ان ما سويت شيك ان مبجر ... خلي جناطك معاك و استريحوا بأي مكان .... و انت على راحتك