أكتشف العالم بين يديك
المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة.
artravelers.com ..
السلام عليكم ورحمة الله وبركاته .
أرجو التكرم بإعطائي فكرة عن الشقق المفروشة في بون وأسعارها التقريبية . وكذلك أفضل الفنادق في بون ذوات الأسعر المعقولة .
مرحبا اخوي الوفي.....
بالنسبة لي اخوي انا سبق ورحت لبون من حوالي 3 سنوات
بالحقيقه هي مدينة صحية علاجية بالدرجه الاولى....
وهادئة جدا وتجنن كثير كثير
لانني من النوع اللي يحب الهدوء والبعد عن الضجيج....
بخصوص الشقق في الحقيقه ما سبق لي خذت شقه هناك
ولكنني كنت اسكن في فندق هناك اسمه ( ماريتيم )... اعتقد انه 5 نجوم.....
وهو اعتقد لا يبعد الا 10 دقايق عن وسط البلد ( إن لم تخونني ذاكرتي)...
والعرب فيه أشكال وألوان.....
أعتقد ان ما خاب ظني ان سعر الغرفه هناك كان في حدود 120 دولار....
شامل الافطار.....والذي يميز الفندق أنه مطل على حديقة الزهور المشهورة في بون مباشرة.. يعني تطلع من الباب الرئيسي للفندق وتمشي طوالي في حدود ال300 متر الا وانت بوسط الحديقة....
ولكن إن أحببت المعرفة أكثر وأكثر يمكنني مساعدتك بإعطائك رقم السائق العربي الذي كنت أتجول معه ....
إنسان محترم جدا.... وخلوق ..... ومرح..... نكتي .... كبير بالسن بحدود ال45 سنه ولكن قلبه قلب شاب ماشاءالله عليه
سوري الاصل..... ان احببت ان اعطيك رقمه او ماشابه ذلك فأنا حاضر وممنون..........
(( على فكره.... انت رايح لأحلى وأهدى بلد ))...................
السلام عليكم ورحمة الله وبركاته
أخوي انتعاش .. صحيح إنك أجودي أخيراً جاءني رد !!
ألف شكر ، وإذا تكرمت ودي أعرف شوية معلومات منك .
1/ رقم السائق العربي
2/ شرايك في السكن في باد جودسبرج
.. وعليكم السلام ورحمة الله وبركاته.... لا أبدا أخوي الوفي وش دعوى ما سويت الا اقل من الواجب لانني بيني وبينك اخوي انا منيب راعي سفرات واجد.... وكانت تقريبا آخر سفره لي لبون مثل ما قلت لك حوالي 3 سنوات كنت مودي الوالدة الله يطول بعمرها وبعمر من يعز عليكم والمسلمين أجمعين... اقولك شي خلني شوي اسولف وبعدين اجاوبك على أسئلتك... رحت انا لبون ياخوي وانا منيب هاوي السفر لأوروبا عموما..... ز لكن رحت مرغما عشان الوالدة كانت تعاني من آلام بالركبه وبالرقبه ولكن نظرتي تغيرت تماما لما شفت بون..... لأنها مدينة عائلية درجه اولى..... أهلها طيبين ولا لهم بالمشاكل هادية جدا...... كثرة الخليجيين والعرب عموما بحيث انك ما تحس بالغربه أبدا.... طبعا هذا غير الجو الحلو والمناظر الاحلى...... نرجع لسؤالك بخصوص بادجودسبيرغ>>>> تصدق اني كنت ابي اتذكر الاسم عشان اقولك ان فندق الماريتيم يبعد 10 دقايق بالسياره عن بادجودسبيرغ ! ههه لكن الحمدلله انك ذكرتني بالاسم بادجودسبيرغ ان صح التعبير انا اشوفها منطقه حيوية يعني كلش فيها ... تعتبر في اعتقادي وسط بون... وحنا القطريين عموما نسميها بمصطلح دارج عندنا كثير الا وهو (( براحة الجفيري )).... طبعا نسبة لمنطقه قديمة كانت موجودة بقطر سابقا تجد فيها المطاعم والمقاهي والمحلات التجارية المتنوعه يعني عادي جدا تجد رجل قطري كبير بالسن جالس بثوبه وبغترته وعقاله يرتشف كوبا من الشاي على احدى مقاعد المقاهي عادي جدا تجد عيال صغار يلعبون بوسط الساحه كورة ومسوين إزعاج وتكتشف انهم من ربعنا ههه عادي جدا تجد امرأة عجوز ببساطتها الخليجية وعفويتها الحلوه فارشه لها جريده ومتربعه على الارض.... جو حلو حلو حلو جدا جدا..... اللي شفته من الشعب الالماني الشعب الالماني اللي شفته هو صحيح يمكن يكون قليل الضحك او الابتسام (( جدي شوي )).. ولكن ميزته انهم كافين خيرهم شرهم يعني لا يؤذي ولا شي................................................ .. بالنسبة لفنادق البادجودسبيرغ والله مادري عنها ولكنني ملاحظ ان اغلبية الخليجيين يسكنونها وذلك لميزات منها انها على الشارع الحيوي على طول اللي فيه كل شي ..ثانيا : السعر المعقول نوعا ما...... اما بالنسبة لي رحت على اساس نصيحة لفندق ماريتيم وبالفعل اعتقد انه افضل فنادق بون ويتميز باللوبي الواسع ليجتمع به الاخوان من شتى البلدان الخليجية ليتبادلوا الحديث والسوالف والضحكات بجو مليء بالانتماء والود بالنسبة للسواقين تلقاهم باللوبي للفندق ( هذا الي شفته بالماريتيم ).... يعني انا تعرفت على اللي قلت لك عنه عن طريق اللوبي... لقيته جاي لأحد الاخوه الاماراتيين وتعرفت عليه وتعاقدت معه لكن والله ناسي اليومية بكم..... اللي قلت لك عنه اسمه ( محمد حيلاني ) واسم الشهره أبوزكريا .... رجل سوري من حلب .... اللي حببني فيه طيبة القلب والنية الصافيه يعني مسيكين على نيته مره يعني أمن وأمان رافقته قرابه الشهر ونعم الرجل.... .. حتى انه كان يأتي بالاغراض التي نحتاجها الى الغرفه...... من ماء وغيره ( التموين يعني بدل الثلاجه حقت الفندق واسعارها العاليه مثلك عارف )..... والحمدلله وجدت كرته عندي بأكتب لك الكرت بيدي ولكن وفق الاخراج الموجود بالكرت هههدليلكم في ألمانيا محمد حيلاني ( أبوزكريا ) للسياحة والعلاج والخدمات العامة ألمانيا - بون - من داخل ألمانيا 9431631 - 0228 من خارج ألمانيا 9431631 -228 - 0049أتمنى اني قدمت كل اللي أقدر عليه اخوي الوفي وان كانت اعتذر لقلة معلوماتي ولبساطتها.... ولكن لا أنسى أن اقدم لك نصيحة اخويه لا تنساها اخوي الوفي: انتبه تخلي شنطة فيها فلوس مفتوحه بالغرفه لان سبق وانسرق بالفندق اللي كنا ساكنينه اخ عماني ... طبعا ذلك يرجع لإهماله لأنه يخلي الشنطه فاتحتن ثمها ويدخلون حقين التنظيف ويسرقون ما خف وزنه وغلى ثمنه يعني لا تخاف بس اقصد خل كلش مقفل لا تخلي ساعه مرميه ولا شي ثمين قفل الشنطه واطلع او الافضل من ذلك خل الاشياء الثمينة فلوس او مجوهرات او جوازات السفر في صناديق الأمانات اللي بالفندق وهذا احسن واحسن وان شاءالله تروح وترجع بالسلامه .............. لا تنسى تشرب عصير غازي عندهم عبارة عن ليمون اسمه ( بيتَر ليمون ).... ياويلي ويلالالالالالالالالالاه عليه ههه
أخوي الغالي .. إنتعاش
السلام عليكم ورحمة الله وبركاته ..
لو إني ألبس قبعة لكان قلت أرفع قبعتي تقديراً وعرفاناً مني لك .. لكن مثلك عارف ما عندنا إلا هالخيام ناصبينها فوق روسنا .. لكن أبشر لو شفتك في بون بسويها لك ، مثلك عارف حنا يالخليجيين ، ما نصدق على الله نطلع من الديرة عشان نفصخ هالغتر والثياب تقول كنا مربطين ، مادري ليش ، شفتلك مرة خليجين شيبان فوق الخمسين رايحين لماليزيا ومن أول ما وصلوا الفندق كل واحد طق الشورت ونزل يدربي بذيك الكرشة والصلعة يظن روحه بيكام وإلا راوؤل....
المهم لما راحوا لجنتنغ وهي منطقة باردة جدا مقارنة بماليزيا ، الله وكيلك ، قاموا يرجفون تقول كانهم قطو راش عليه ماي ...ورجعوا للفندق يتسترون ..
ما علينا أشكرك جزيل الشكر ..وودي لو تكرمت تكتب لي اسم الفندق بالانجليزي عشان أحجز من الانترنت .....وسلامي للجميع ..
