1. بس على فكرة القصبة تسكر الساعة 8


2. 3- الموقف الثالث: حصل لي في مدينة بلاسنثيا وهي ايضا في استريمادورا

السلام عليكم
أنا هنا بذكر بعض المواقف اللي حصلت لي في اسبانيا,
1- يشتهر سكان إستريمادورا extremadura بالحكي الواجد,
ومن اهم مدن استيرمادورا (بطليوس - قاصرش - ماردة)
مجرد ماتسئله وين المكان الفلاني يرد عليك ويرد على اسئلة بعدك ماسئلتها
مثلا: كنت امشي في شارع في مدينة ماردة , وكنت ابي اروح للقصبة وباقي شوي وتسكر, فما كنت ابي اضيع وقت ابي اوصل بأسرع وقت ممكن, شفت وحدة وسئلتها وين القصبة ,
قالت لي : من هنا وبعدها روح يمين
ثم قالت: تعال تعال, شوف روح من هنا ,,,,, ولا أقول لك , تعال من هنا أحسن
ثم قالت : اسمع روح مع هذا الشارع وامش على طول أول لفة اللي فيها مطعم في الزاوية اتركها,
ثاني لفة على اليمين اتركها , ثالث لفة أدخل معها طبعا بيجيك بنك في الزاوية,
بعدها روح يمين وامش على طول لين ماتلاقي محل اسمه ..... ثم لف من عندها يسار , وبتجيك القصبة على يمينك
وعلى فكرة ترى فيه ساحة ممتازة قريبة من القصبة إذا انك حاب تتعشى او تاكل شي,

بس على فكرة القصبة تسكر الساعة 8

بس ترى اقرب لك المسرح الروماني, وعلى فكرة لازم تروح النهر ترى فيه جسر روماني ممتاز, بس القصبة تراها حلوة مرة, ولاتنسى تشوف البير اللي فيها, بس على فكرة إذا انك حاب تشوف آثار إسلامية روح لمدينة بطليوس ترى فيها قلعة إسلامية وبعدين إشبيلية تراها قريبة من عندنا تراها مرة حلوة
( وأنا أقول في نفسي, شوي شوي بتقول لي رح المغرب فيها آثار إسلامية,
وأنا انتظرها تخلص كلامها لأن القصبة بتسكر
قلت لها شكرا شكرا
ثم قالت أكيد عرفت من وين تروح
وعادت علي اللي قالته
وقلت لها شكرا
قالت عفوا
واتمنى انك تستانس
مع السلامة
مع السلامة
...................
2- الموقف الثاني: حصل لي في مدينة البسيط
كنت أسئل عن الساحة الكبرى في المدينة, سئلت واحد قلت له وين الساحة الكبرى
وبالصدفة وحدة مرت من وراها ردت علي قالت من هنا من هنا, تعال وانا امك
وأخذتني وودتني للساحة ثم قالت هذي هي الساحة, ثم قالت بس اذا تبي التمشية رح هناك ترى فيه مطاعم ومقاهي
وترى الكاتدرائية قريبة من هنا إذا انك حاب تصور, لأن كان معي كاميرا شايلها في يدي

3- الموقف الثالث: حصل لي في مدينة بلاسنثيا وهي ايضا في استريمادورا

كنت أسئل عن مكان في هذي المدينة, فسئلت واحد مستعجل مرة كانت معه بنته الصغيرة بيوديها المدرسة
قال لي معليش انا مرة مستعجل بس لحظة خلني اقول لك, المهم جلس 5 دقايق, وانا انتظره يروح يودي بنته, قام يسولف علي ويقول لي( رح وسو واترك و......) ثم شاف واحد مار قال هذا احسن واحد يعرف المدينة, هذا فاضي لك اسئله,
قلت في نفسي الله يستر هذا المستعجل وش سوا , أجل الفاضي وش بيسوي
المهم الفاضي يوم شافني أسئل, شق الإبتسامة وقال لي تعال تعال , ولزم علي ادخل عنده في البيت
جلست 20 دقيقة يالله طلعت من عنده من كثر سواليفه
..............................
4- الموقف الرابع : في مدينة ماردة دخلت مكتب سياحي بسأله عن فندق في مدينة ولبة, جلست ساعة كاملة
طبعا الفندق سوا لي حجز عليه في 5 دقايق والباقي قام يسولف معي عن السعودية وعن اسبانيا وعن قصة حياته وعن حبيبته اللي تركته,,,,,,,,
المهم جت الساعة 8 والمكاتب لازم تقفل , قلت له يالله مع السلامة المكتب بيسكر
قال لي : لا ماعليك , راح قفل الباب وصلح الشاهي وقام يسولف
يالله طلعت من عنده
............................
5- الموقف الخامس: في مدينة بطليوس رحت المتحف الأركيولوجي ولقيته مسكر , فقال لي واحد عند الباب تراه مسكر, قلت له داري بس انا اقرا اللي مكتوب على هذي اللوحة
قال لي وش كنت تبي تشوف هنا
وراحت السواليف
ثم جت زوجته وقامت تسولف عن التاريخ الإسلامي
المهم طلع هذا تخصصها, ولقت واحد مسلم تسولف له
وانا كنت مستعجل ابي ألحق على متحف ثاني لايسكر
لكن هذولا فكوني بعد نص ساعة بس
هذي بعض المواقف اللي في بالي الآن