- اهم السلبيات :
بأختصار ذهبت الى لبنان لمدة 4 ايام في رحله سريعه لزيارة احد المعرف بسبب مرضه وهذا ما حدث لي من ناحية الايجابيات :
1- الجو ممتاز في هذ الفتره من السنه
2- قلة اعداد السياح وخصوصا من الخليجيين والسبب هذا يقلل الاستغلال ضدنا كسعوديين
3-تواجد امني بشكل كبير ومريح في اغلب الشوارع
4-نظافة الاكل بشكل عام ..بصراحه لبنان من انظف البلاد العربيه مع الاردن في موضوع الاكل
5-اهمية شرطة السياحه ودورها الايجابي في حل المشاكل (ساذكر الموقف الذي حصل في قسم السلبيات )
اهم السلبيات :
علما بأن هذه المره ال 4 التي ازور فيها البلد ولكن في كل مره اتنكد واتكدر لسبب او لاخر وهذه اهم المواقف السلبيه التي حصلت لي :
1- في المطار اول ما نزلنا جاك حق الشنط وشال الشطنه وحطها في العربيه قمت انا عصبت عليه وقلت نزلها والا ابهدلك ..قام خاف ونزلها وطلب مني اعطيه اكراميه حق شيلته للجنطه ولمين ردها على الارض وقلت له كم تبي قال شو ما بيجي ..قمت اعطيته دولار ..قام طالع فيني ورجعه لي وقال شكرا ما بدي شي !!!!
انا قمت اصارخ عليه ومسحت فيه البلاط (وهذا الموقف خلالني اطلع من المطار متوتر ومشحون )
2- التاكسي الي خذاني من المطار لين سبلين( المنطقه الي يوجد فيها صديقي المريض ) قلتله على كم ياالحبيب قال 40 دولار .. وفي طريق الاوتوستراد حق صيدا صار حادث وتعطلنا حوالي 50 دقيقه لانه الطريق كان واقف ويوم وصلنا الاخ يبي 60 دولار ويقول لانه تأخر على طلبيه ثانيه ..وهنا تهاوشت للمره الثانيه خلال ساعه وصارخت عليه ونزل اخو صديقي المريض وجالس يتفاهم مع السواق لكن معند الاخ وسمتعه يصارخ ويقول (يحرق حريشهن شو معهم مصاري هالكرانيب (ماني عارف معتاها ) ومو قادر يدفع 20 دولار زياده ) المهم اخر شي اعطيته ال 60 دولار وانا متكدر حيل
3- ثاني يوم ذهبت اتعشى في مانويلا وكل شي كان تمام لين وقت الحساب ..كنا 5 اشخاص وقامو نزلو لحالهم 3 مويه كبير و5 مكسرات وانا ما طلبت منهم شي ..وقلت لهم ما ني دافع للمكسرات ..وجا مدير المطعم وبكل وقاحه قال انه سعر الضيافه الي حطوها بعد الاكل يعادل 10 اضعاف المكسرات ..المهم دفعت سعر صحن مكسرات واحد لكن بعد هواش ومنظرنا كلش مو زين قدام الناس ..وحتى الجرسون قام يطالع فينا من فوق لتحت ومو مهتم بوجودنا ..وكأنه يخدم على اهل بلده في الطاولات الثانيه بكل صدر رحب ..وحتى لما اعطيته 5 دولار بأيده اكراميه ما قال شكرا .
4- الموقف الاسوء كان في السوليدير وكان مع احد محلات الشيشه ...المهم الحساب طلع مظبوط ولكن ابن صديقي طيح الشيشه وحنا نحاسب وانكسرت ..وانا قلت لراعي المحل انا ادفع سعرها جديده ..وسألني انت من وين قلت سعودي وقال من وين بالسعوديه قلتله الحفر ..قال احسن والذ ناس والله انا اخوي بالسعوديه بالخبر وكرمالك بدون مصاري ..انا قلت لاء كم قال ماشي عشانك 100 دولار بس !!!!!!!!!!!!!!!!!!
انا اذكر انه الشيشه ب 120 ريال لين 200 يعني مو ذاك الزود ..المهم قلتله مستحيل وصارخت عليه والناس تجمعت علينا ..واخر شي بان على حقيقته وقال ما بتطلع من هون الا لما تدفع حقا !! اتصلت بالشرطه السياحيه وعرفت بنفسي وهددت اني اتصل بالسفاره لان المحل حاجزني عندهم ..المهم جت الشركه ورحنا المركز وتم تقييم الشيشه ب 50 دولار ودفعتهم ...شفتوأ النصب عيني عينك
5- الشوارع زحمه جدا والنفسيات خايسه ومافي احد طايق الثاني فكيف بالغريب
6- كل ما ادخل مكان اشوف نظرات غريبه وتحفز لل استغلال لاني سعودي والله اني شعرت بهالشي في كل مكان تقريبا وحتى الي يجامل مو حبا فيك لكن يبي يستغل اكبر قدر ممكن
7- لم ارتح نفسيا بسبب اني احسست اني مجرد بنك متنقل والكل يبي ياخذ منه وما حد درا عن الحال .
8- خلال 4 ايام حصلت لي 3 مشاكل والله مو مبالغه مني ولكن تروح هناك وكل شي يوترك
ارجو التعليق على كل ما ذكر بكل موضوعيه وبدون تجريح
يَوْم قَالِّك هَالكَرَّانيب لِيَه عَطِيَّتَه مَصَارِي!! حَسِّيِت انَّك تَاكَّد لَه انَّنَا هَالكَرَّانيب بِصَرَاحَه مِثْلُك وَالْلَّه مَااعْرّف وَش مَعْنَاهَا
فِي الْمَغْرِب يُسَمَّوْن الْخليجَين الْحَوْلِي يَعْنِي الْخِرْفَان يُمْكِن كَلِمَة كَرَّانيب تَعْنِي ارَانِب ،،، يَارَجْل عَلَى الْاقَل ارْحَم مِن حَوْلِي
مَا اقُوْل غَيْر حَمْدُللَّه عَلَى الْسَّلامَة وَمَثَل مَايَقُوْلُوْن الرِجاجِيل لَا سَلْم الْعَوْد الْحَال يَعُوْد وَجَزَّاك الْلَّه خَيْر انَّك زُرْت صَدِيْقَك الْمَرِيْض وَيَعِلُّه مَايَشُوْف شِر