السلام عليكم
مساؤكم بهجه و امل جديد بعام جديد مليء بكل ما هو جميل بإذن الله
من كم اسبوع و انا اتصفح المواضيع و اراء الأعضاء عن قطر
السنه الماضيه مامتي كانت في زياره لقطر بعد غيبة سنوات عنها و لاحظت التغييرات الكبيره فيها و قالت انها اصبحت شي ثاني و حتكون قريبا من المدن المنافسه لدبي حبيبتي
و عشان كذا قررنا تكون وجهتنا هذا العام في اجازتنا في يناير
بصراحه اخويا ما شجعني كثير على الروحه و قال لسه بدري على ما تكتمل المشاريع و تصير البلد ممتعه بالفعل
بس اللي انا شفته من خلال التقارير انو في اماكن حلوه للزياره
طيب نجي الان لسؤالي
هل يوجد فندق متصل بمركز تسوق زي بعض المدن الاخرى
يعني زي كمبنسكي و بوللمان متصلين بمول الامارات او فندق العنوان متصل مع دبي مول مثلا
او غيره و غيره من الامثله
و اذا مافي احتاج تقترحوا عليا فنادق حلوه
من الاماكن اللي مخططه لزيارتها طبعا و اكيد اللؤلؤه ، سوق واقف ،كتارا ، سيتي سنتر ، فيلاجيو، طبعا الكورنيش
و على سيرة البحر حابين نعمل جولة في البحر هل يوجد رحلات و فيها عشاء
اكيد في اماكن اكثر من اللي ذكرتها
و اكيد راح تذكروها لي
لأنو بصراحه كلامكم و اقتراحاتكم هي راح تحدد ذهابي الى الدوحه او الى غيرها
و انا من جد حابه ازورها بس متردده و خايفه ما ننبسط و بقول بيني و بين نفسي اللي تعرفه احسن من اللي ما تعرفوش
مع انو احلى شي في السفر الاكتشاف
عارفه اني طولت الهرجه عليكم بس ما عليه
سؤالي الأخير هل سبعة ايام كثيره على الدوحه و لا الوقت حيعدي بسرعه و اتمنى اطول فيها اكثر
انتظر ردودكم