نشر في امريكا US

كل من سافر لوس انجلس يتفضل

abo deema

12-12-2022 - 02:09 am

او تنصحوني اسكن بنيويورك يوم او يومين

السلام عليكم
اشكر جميع العاملين والاعضاء على هذي البوابه
ان شاء الله انا وصديقي رايحين بتاريخ 5-7الى 26-7 على الخطوط الكويتيه ولكن للاسف وجهتها فقط نيويورك
واحنا نبي لوس انجلس ولاس فيغاس وسبب اختيار الكويتيه (لي سفره بالسنه بلاش عليها)
كم تستغرق انهاء التفتيش والاجراءات بمطار نيويورك لاختيار الوقت المناسب للرحله الداخليه الى لوس انجلس

او تنصحوني اسكن بنيويورك يوم او يومين

احنا ودنا ناجر سياره ونتجول مابين لوس انجلس ولاس فيغاس ونختار الفندق بنفس اليوم يعني ما ودنا نحجز فنادق من الان واذا رحنا هناك نتحسف لان في مكان افضل ودنا نسكن فيه ان شاءالله فهمتو علي(ملاحظه انا وصديقي لغتنا ضعيفه واول مره نروح امريكا) بس نعيش ) خوفي اذا اجرنا السياره بندفع فلوس السفره كلها على المخالفات
المهم يا اخوان عادي نروح من غير حجز فنادق ولا ما بنحصل فنادق فاضيه او اسعارهم بترتفع
ونبي تخطيط الرحله 5ايام هوليود وين افضل مكان نسكن للشباب يعني ما نبي هدوء!
وبعدين لاس فيغاس 10 ايام 5ايام فندق بلانت هليود و5ايام فندق باريس
وبعدين بنرجع لوس انجلس نقضي المده بفندق او منتجع على البحر (ماهو افضل شاطىء فيه زحمه وحياه)مثل افلامهم )ياليت تفيدوني بمنتجع حلو وكبير ورخيص
هل تكفي 12 الف دولار شامله الفنادق والطيران الداخلي والمصرف ولاس فيغاس والسياره ولو ان شايل هم الباركينق من الحين هل تكفي!
واشكر مشرف البوابه وخبير لوس انجلس استفدت الكثير من مواضيعهم وردودهم على الاعضاء

التعليقات (9)

Impact

12-12-2022 - 04:37 am

نصيحتي لك انك تجلس فس نيويوك 3 ليالي تشوفوها بالفعل تستاهل !!
لاس فيقاس كثير عليها 10 ليالي !! 4او 5 بالكثير !! وخلوها في فندق واحد !!
الفنادق المفروض تحجزوها من بدري لان كل ما تحجز بدري تلاقي اسعار ارخص وهناك يمكن ما تلاقي وتناحسوا ويضيع عليكم الوقت في البحث !!
وغير كذا اذا لقيتوا تكون الاسعار اغلى بكثير !!
السيارة ضرورية للتنقل في كاليفورنيا وتدوديكم لاس فيقاس !!
12000$ شاملة ايش بالضبط وللشخص او الاثنين ؟
اتمنى لكم التوفيق

cooool

12-12-2022 - 05:38 am

هلا اخوي
انة سكنت في
Hollywood roosevelt hotel
على شارع هوليود انة الصراحة عجبني و راح يعجبك
و فيقاس نفس ماقال اخوي امباكت خلوها فندق واحد
و اي شي تحب تعرفا عن الفندق انة حاضر

abo deema

12-12-2022 - 06:39 am

[
هلا مشرفنا يشرفني مرورك
12الف مصروفنا الاثنين شامله كل شي ما عدا الطيران الدولي يعني شامله طيران داخلي وفنادق ورحلات ...الخ قابله للزياده الفين او 3
ومن ناحية الفنادق يعني قلنا لاس فيغاس كل واحد غرفه بس لوس انجلس اثنينا بغرفه لانه اسعار فنادقهم غاليه على عكس فيغاس الغرف من 50 الى 100 دولار
ونيويورك والله ودي اقعد فيها بس صاحبي ما يبيها يبي يقعد اكثر وقته بلاس فيغاس لكن بقنعه نقعد فيها يومين على الاقل
وياريت تفيدونا بشاطىء حلو وسياحي نحجز فيه 4 ايام

Impact

12-12-2022 - 07:40 am

المبلغ ان شاء الله بيكفيكم ,,
لاكن لاحضوا ان فنادق فيقس تختلف من يوم للثاني واذا ودكم بفنادق على الاسترايب وتكون في القمة لازم تزودوا المبلغ مو 100$ !!
اتمنى لكم التوفيق

abo deema

12-12-2022 - 08:41 am

cooool
هلا اخوي كول شفت الفندق بموقع hotels وشكل الغرف نظيفه وراقيه وبموقع حلو
وعطوني Superior Room Double/Double Bed
Breakfast not included لاربع ليالي 844دولار بدون افطار شاريك بالسعر حلو وتنصح ناخذ كل واحد غرفه او اثنينا بالغرفه ودامك كنت هناك يالريت تفيدنا بفنادق ثانيه بنفس الشارع او شارع السن سيت وكم يوم تنصحنا نقعد بهوليود والله ما رحنا قبل(مطيحين ببوكيت وبتايا) وما ندري وين افضل مناطق نقعد فيها صارلي اسبوع اجمع معلومات من المنتدى يعني احنا مو مال تسوق والعاب!
واذا كنت رايح فيغاس ياليت تفيدنا بافضل فندق انا لاحظت من ملاحظات الي يحجزون بمواقع الحجوزات افضل فنادق
Planet Hollywood Resort & Casino The Mirage
Paris Las Vegas The Venetian Resort-Hotel-Casino
شرايك بالفنادق وياريت ترشحون لنا افضلهم من حيث الموقع والخدمات ومرافق الفندق
ويعطيك العافيه

q8 moon

12-12-2022 - 09:42 am

بالنسبة للخطوط انا مسافره عليها من قبل في ايام بالاسبوع تنزل ترانزيت لندن ساعه و ايام دايركت لي نيويورك وانصحك بالي تنزل ترانزيت لان الدايركت متعبه تحتاج انك تغير جو الطيارة و تحرك ريولك شوي
و لاتحاتي تفتيش المطار سهاله ما راح ياخذ منك اكثر من نص ساعه هذاك اول الي الناس تقعد بالساعات
و بالنسبة لي نيويورك حسافة توصل لي عندها ما تشوفها لانها صج صج حلوه و فيها وايد شغلات حلوه يكفي التايم سكوير و الففث افنوا

نقطه مهمه جدا : لا تنزل من رحلة الكويت وتطير رحله ثانية على طول لا نها جدا متعبه السنه الي فاتت نزلت ليلة بنيويورك و طرت بعدها لي فيغاس ما تتخيل التعب و الارهاق اتحس نفسك تعبان بس ما تدري شنوا فيك هذا غير الجفاف حتى جفونك تحسا تتلصق ابعض من الجفاف ( اسأل مجرب )

بالنسبة حق فيغاس وايد عليها 10 ايام صدقني راح تمل 5 ايام راح تحس انها كافية و زود ال5 ايام الثانية كافية انك تكتشف فيها منطقة ثانية روح فيها سان فرانسيسكوا او اي منطقة قريبه من لوس انجلس
بالنسبة للفنادق انصح بالبيلاجيوا او سيزر او باريس بس هوليود ما انصحك في احلى منه بوايد ، الحجز افضل انك تحجز مبجر لان الوكت الي رايح فيه موسم سياحه و ممكن ما تلاقي حجز او تكون الاسعار ارتفعت كل ما حجزت ابجر كل ما كان ارخص
طولت عليك والله يوفقك بسفرتك و تستانس ان شالله و اي سؤال احنا بالخدمة

abo deema

12-12-2022 - 10:43 am

Impact:
ان شاء الله واكيد بيكون معانا احتياط بس ياليت تفيدنا باسعار الطيران الداخلي من نيويورك الى لوس انجلوس
https://artravelers.com :
هلا اخوي انزين شلون الطيران بصراحه انا خايف من الكويتيه تعرف ميمعين السكاريب بس سمعت انهم اشترو اسطول يديد بوينغ777 مادري صج ولا لا؟
ومن ناحية الترانزيت اتمنى والله خصوصا اتضايق وايد بالقعده بالطياره ومن ناحية التفتيش سمعت انهم مزاجيين
وياليت تفيدونا بفندق بنيويورك نرتاح فيه يومين ويكون بشارع حلو وكل شي قريب علينا
اما هوليود صراحه ملاحظ اكثر الفنادق فيها 2ستار من مواقع الحجوزات
ويعطيك العافيه على الملعلومات القيمه وبالعكس كل ما تطول علي استفيد اكثر

Impact

12-12-2022 - 11:44 am

الطيران يختلف سعره على حسب اليوم والوقت ومتى تاريخ الشراء واذا كان فيه ترانزست في مدينة ولا اثنين ولا دايركت !!
انصحكم تدخلوا على Expedia وتختاروا الوقت واليوم الي يريحكم وتشوفوا خيرات الخطوط وبعدها تختاروا المناسب وتعرفوا سعره !!
بالتوفيق

q8 moon

12-12-2022 - 12:45 pm

بالنسبة للطيران الداخلي انصحك بالجت بلو اذا جربته ما تغيره جدا ممتاز
والكويتيه بالاول كان عندي نفس اعتقادك بس المثل يقول ما تعرف قديري لما تجرب غيري صدقني انها احسن من وايد خطوط خصوصا على هذي الرحله اختار ترانزيت لندن وراح تدعيلي
و التفتيش لما تدخل نيويورك وايد سهاله عندي ارحم من تفتيش لندن
و نيويورك تعتبر غاليه بالفنادق شوي اكثر من الولايات الثاني بس احنا دايما نسكن في paramont اهو بنص التايم سكوير
تطلع منه تروح يسار انت بالتايم سكوير و اذا رحت يمين تدخل بشارع كله سوبرماركتات و مطاعم و لازق فيه مطهم ايطالي عنده بيتزا جبن خيالية و الفندق من تحت في كافية دين اند ديلوكا يعني استمتع بحياتك
و هم اذا عندك اي اسئله لا تستحي انا اختك

امريكا US المسافرون العرب

كل من سافر لوس انجلس يتفضل

او تنصحوني اسكن بنيويورك يوم او يومين