1. لقد تعرضت إلى عملية نصب في مطار كوالا العالمي


2. بقي أن تعرفوا أني بلبل أنقيزي والله من النصب يالحوطي ما عاد الإ هي.


3. بس تصدقون أني امشي حالي يعني وت يور نيم انت زي كذا وانت جاي .

بسم الله الرحمن الرحيم
السلام عليكم ورحمة الله وبركاته
في الحقيقة انا في شوق لكم جميعا ً فلكم الفضل بعد الله في ترتيب جدولي وتنظيم رحلتي حتى أنني أصطحب معي في حقيبتي كل التقارير الموضوعة في المنتدى حتى أرجع إليها وتكون قريبة لي هناك .

لقد تعرضت إلى عملية نصب في مطار كوالا العالمي

يبدوا أن الماليزيين عرفوا من سحنة خشتي أن حوطي وأرادوا أن يلعبوا علي عموماً بأحكي لكم القصة من البداية .
في صباح يوم الأحد التاسع من شهر مارس غرة شهر بيع الأول 1/3/1429ه استيقضت وبعد تناول الفطور في فندق التايم سكوير في كوالا طلبت من الفندق تصفية حساب غرفتي لكي اسلمها لهم وحجزت سيارة من عندهم فان ليس لأن عدد اسرتي كثير لا والله .
لأن عفشي عشر شنط غير الشنط الصغيرة الي مدخلها معي للطيارة علماً أنني أنا وزوجتي ولمى والتي هي الناتج القومي للأسرة وعمرها 3سنوات ونصف .
عموماً أنتطلقت من الفندق 11:40صباحا ً ورحلتنا الساعة 5:10 مساء هذا طبعا ً من زود الحرص واستجابة لتوصية الكثير من الأعضاء فيذا .
وصلت المطار وأخذت عربيتين وحده أدزها (( بالعربي أدفها أو أدفعها أو ...خلنا ساكتين )) أنا والثانية تدزها أم لمى سألت عن موقع كاونتر الخطوط السعودية فقالت موظفة السنترال كونتر k هو للخطوط السعودية لكن وش جابك من الأن ترى مو فاتح الكونتر إلا الساعة الثالثة طبعاً أنا جالس أترجم كلامها لكم لأني عارف أنكم ما راح تفهمون أنقليزي . خ

بقي أن تعرفوا أني بلبل أنقيزي والله من النصب يالحوطي ما عاد الإ هي.

بس تصدقون أني امشي حالي يعني وت يور نيم انت زي كذا وانت جاي .

المهم وصلت للكونتر لقيت فيه واحد سعودي حاط شنطته عند أول كاونتر من الحرف k يعني k1 بس هذا الإنسان دايم اشوفه شكله واحد منكم مأخذ جدول رحلته مني لأني قابلته أكثر من مره في الفنادق جاي معي من نفس الطيارة ورجع معي في نفس الطيارة والله النشبه بس تصدقون إنسان محترم سألته أنت متأكد أن هذا كونتر حقنا ؟ قال أيه هذا كاونتر الدرجة الأولى قلت طيب يالغالي وين كاوتر آل بو نعيله (( الطفارى )) فأخذ يضحك حتى بدت نواجذه (( مدري تكتب كذا أو لا)) جلست اسولف معه إنسان جنتل.
فصففت عربتي بعد ما بدا الناس تتجمع وحينما فتحوا الكاونتر الساعة الثانية وعشر تقريباً وجاء دوري كان حضي عند رجل ماليزي وليس أمراة عطيته جوازي والتذاكر وحملت العفش على الميزان طبعاً هناء مربط الحمار تكرمون .
بعدما حملت عفشي كله على الميزان قال العفش عندك زايد وأخذ الآلة الحاسبة وقال أن تكفلة العفش الزايد 1290 رنجت مالزي طبعاً انا طارت عيوني من الروعة وقلت اخصم لي وعلى مجيء المشرف من خلفه فأخذ يتكلم معه وقال خلاص خصمنا لك وصار المجموع 1020 رنجت طبعاً لا زال المبلغ مرتفع جداً فأخذ المشرف وموظف الكونتر يحدثوا بالماليزي حتى لا أعرف وش يقولون طبعاً لو تكلموا بالإجليزي والله ما راح أجيب خبرهم .
قالي موظف الكاونتر ( بصوت منخفض ) عشانك انت أخوي عطني كم رجنت وأخليها لك 800 رنجت فقلت لا خلاص بأعطيك بس خلاها ب500 فقلت وين الصراف بروح اصرف وأجيك .
فوصف لي مكان الصرفات وتركت عنده عفشي وجوازي وتذاكري ورحت للصراف قابلتني ام لمى وحست أني مره متنكد قالت وش فيك حكيت لها القصة فما كان منها إلا إن لهجت بالدعاء لي وهذا ما تملكه حبت عيني.
المهم رحت للصراف وسحبت 700 رنجت ورجعت للكاونتر فوجدت أن الموظف أخذ الي بعدي وعفشي راح على السير فأنتظرته ينتهي من الركاب حتى اعطيه قيمة الفلوس ؟
أنا في هذه اللحضة أخذت أحلل بعض التصرفات وعرفت أنه يطلب 800 رنجت له وليس للخطوط وأن عفشي راح للطائرة وأنه رضي بال500 له وستكون مناصفه بينه وبين المشرف الذي دار بينهم كلام بالماليزي . (( طبعاً ترى الحواطى أذكياء يعرفونها وهي طايره )) :m9: أمحق وهي طايرة .
المهم أنا في هذا الوقت دخلت ال700 في جيب وطلعت 110 رنجت ولفيت العشرة داخل المية يعني هو يشوف الميه بس .
هذا كله وانا انتظر ينتهي من إجراء الركاب وهي يرمقني بنظراته بخوف ، يخشى أن ينكشف أمره للناس طلب مني أن أخذ عربية بنتي اركبه مع سير ثاني مخصص لمثل هذه الأمتعة وعطاني جوازي وقال رح للكوانت ذاك وتعالي لي . يتوقع أنني سأعود له بعد إنتهاء الركاب الي هو شغال فيهم .
المهم أنا رحت وركبت عربية بنتي في اليسر المخصص وعدت له ويدي اليسرى فيها الفلوس وقربت من الكاونتر فمد يده للفلوس وقلت أنا وين البودنق انا ممسك بالفلوس فهو مد لي ورقة الركاب الصينيين الي شغال فيهم وأخذتها وتركت الفلوس معه وقال ترى هذه الورقة تبع هؤلاء أرجعتها وطلبت من البوردنق بصوت عالي فقال أنا أعطيتك أيها وأخذ يستهبل كأنه يدور وقلت شفها هذه تحت الكيبورد قاله أه اسف .
وأعطانيها وذهبت للقبو حتى أركب الباصات التي تذهب بنا للباب المخصص C1 وبعد ما تغديت وصليت الظهر والعصر رحت للبوابة وبعد ما فتشونا شفت المشرف الي كان يتكلم ماليزي مع الموظف حاولت أتوزز ودخلت للصالة قبل الخرطوم وجلسنا فيها وجلست أخرها
جلست اتكلم مع أم لمى عن هذا التصرف القذر وكيف يحصل في مطار مثل هذا بعد عشر دقايق نادوا على اسمي !!!!!!!!!!!!!!!!!!!!!!
خير وش يبون ؟ تعرفون الطالب الكسول الي جالس في أخر الفصل ويناديه المدير أو الوكيل وكل الفصل يشوفه وهو يطلع من الفصل هذا هو شكلي وانا طالع من الصالة خ
قابلتني موظفة وسألتني هو أنت فلان ؟ قلت نعم وتاج راسس وش تبين جلست تتكلم إنقليزي برهة من الزمن ( حلوه برهة من الزمن ) وانا اقول ييس ييس ما أبي الناس تعرف أن مافي راسي ثم عرفت انها تسأل أنتم ثلاثة أو اربعة قلت لا نحن أربعة يعني داخلين ماليزيا ثلاثة بيمدي أم لمى تحمل وتولد في 12 يوم ؟ إلا إذا كنتم توزعون عيالكم خ
طلبت مني البوردنق وخذته مني وقالت خلك هناء أنا اشوفه من خلف الزجاج واتحسر أني أعطيتها البوردنق لأني الأن تحت رحمتها الله حسيبي وحسيبها .
في هذا الوقت بداء الناس يدخلون الخرطوم حق الطيارة قلت لأم لمى تعالي هناء قربت من الباب وخليتها تجلس قلت اصبري هناء .
أنا اشوف المشرف مع الوظفة الي خذت مني البوردنق رحت سألتها وش المشكلة قلت لحضة شوي أنا حاولت أنني استغفلها وأخذ البوردنق كأني بتأكد لكن كان المشرف اسرع مني وسحب البوردنق منها وسألني ليش ما عطيتني الفلوس كاملة ؟؟
صار كل هذه تمثلية حتى يسحبني للمواجهة معه !! انا طشت غضباً من هذا التصرف :120: ورفعت عن اكمامي ثم تذكرت أنني في موقف الضعيف حيث البوردنق معه حاولت اسايس الأمرو وأقرب منه حتى دخلت عليه من داخل الكاونتر وهو يسأل ليش ما أعطيتني الفولس كاملة الخاصة بالعفش ؟
أنا اتجاهل هذا السؤال قلت له أنا ما تكلم إنقليزي فقربت منه وسحبت البودنق من يده وهو يحاول يبعدها عني حتى التصق بالزجاج وهو يقول حرام عليك هذا.
فبعدما كان البوردنق معي رفعت بصوتي وقت أنا الي حرام علي وكان هذا كله بعد أن توقف لمشاهدة هذا التدافع بالأيدي فأخذت بنتي وزوجتي ودخلنا للطائرة .
قابلت مساعد الكابتني وحيكت له القصة وقال أنا بشوفه لك . جلست على كرسيي بعدها جاء موظف من المطار يبدو أنه صيني وأرسله المساعد لي وحيكت له القصة وطلب رقم الكاونتر وقلت له K5 هو الكاونتر الي قصيت منه وقال خلاص برد عليك لحضرة بس .
فإغلقت الطائرة بيبانها ولم يصلني رد !!!
لكنني نسيت أقول له أن المشرف هو الي لحقني هناء وضايقني أنا وعائلتي ويطالبني بالباقي .
فهل ترون أنني أتابع القضية ورسلها لمكتب الخطوط في ماليزيا أو مع إدارة المطار ؟