بعد ما ابسطنا في الجبل يومين, سلمنا السكن وكلمنا الحارس يشوف لنا سيارة تودينا باندونق.
ما نطول عليكم, جات السيارة, واتفقنا مع السواق على السعر وتوكلنا على الله
في الطريق مرينا على بحيرة ,طلبت من السواق يجنب 5 دقايق على ان التصوير.اثنا ما انا صور التفت الا صديقي واقف جنبي وما خذ راحته .
اشلون جيت وراي وخليت السواق لحاله مع الاغراض؟؟؟
رجعنا نركض ما شفنا اي اثر للسواق ولا السيارة.
تصوروا الشنط والملابس والجوازات والفلوس, لدرجة ان ما معانا قيمة قارورة ماي نشرب (حلوة قارورة ماء)
بصراحة يبس ريجي في طريجي وحسيت بالعطش وشوي اشوي صرت احس ان موقفنا خطر,
لا نعرف السواق ولا خذنا رقم سيارته
واللي كاسر خاطري صديقي شكله يكسر الخاطر لانه بفانيلة نص كم وشورت ومعصقل كنه من البؤساء.
واول مرة يطب اندونيسيا.
هالكلام حصل تقريبا بعد العصر,ونبقى الى اذان المغرب حايرين والعالم تجمعت علينا
الله وكيلكم صرنا فرجة للي يسوى واللي ما يسوى
كل واحد يقول call the police ,بس شنقول للشرطة؟
انا كان عندي امل بسيط اذا كان حارس السكن في الجبل يعرف السواق .لانه هو اللي جايبه.
بس الورطة لو قال ما يعرفه
وبصراحة في هالمواقف ابليس شاطر يلعب على الواحد
جلست اتصور التحقيق في الشرطة وفي السفارة وذا رجعنا
واحضر الاجوبة.
وزميلي يغلي كنه قدر على نار
وفجاة الا السواق جاي
بصراحة ما صدقنا من الفرحة
سالناه وين رحت يا غبر؟
قال كان عنده الاسبير امبنجر وحب يروح يصلحه على ما نتفرج على البحيرة على شان يوفر وقت
ما درى ان احنا متنا وحيينا
رفيجي من القهر ما خلا مسبة ما قالها له بس بالعربي وبالحساوي وبالخليجي
ما ينلام,,والله من القهر
بيني وبينكم طلع السواق بن حلال و ما فقدنا شئ.
بس الله لا يعيد ذاك الموقف وخلوه درس لي ولكم