1. السلام عليكم ورحمة الله وبركاته

السلام عليكم ورحمة الله وبركاته

مساكم الله بالخير جميعا ، حبيت انقل لكم حادثة حصلت معي الليلة قبل قليل في لندن لن انساها ما دمت حيا.
القصة باختصار انا كنت في وسط لندن اتمشى بعدين رحت الى مسجد الريجنت وصليت فيه المغرب ، طلعت وانا راجع الى بيتي في اكتون تذكرت ان فيه اغراض لازم اجيبها من سوق اسدا لاني عازم اثنين من الاصدقاء بريطانيين في بيتي بكره السبت والاغراض هذه ضروريه للطبخ ، المهم كان معاي في السيارة ام العيال وطفلين وفي الطريق الى اسدا رحت مع شارع مهجور شوي قريب من منطقة صناعية ما فيها احد في الليل ، المهم وانا في الطريق وصلت الى دوار وما شفت احد جاي من اليمين فمشيت شوي على جيت دباب من اليمين مسرع والله ما شفته بعدين وقفت له حتى مشى من قدامي ، مشيت انا والاقي على اليسار مجموعه اكثر من ثلاثين دباب متجمعين وواقفين ما ادري وش عندهم لكن اشكالهم ما تطمن ولابسين اسود كامل كلهم ، المهم اطالع يميني إللا الدباب اللي دخلت عليها ما شي بجمبي ويبيني اوقف فتحت الطاقة وقلتله سوري ما شفتك لكن كان مصر يوقفني . مشى قدامي توقعت يبي يخوفني بالدباب شوي ويمشي لكن المصيبة حدني في وسط الشارع ونزل من الدباب وجاي جهتي، انا في هذه اللحظه فكرت الف تفكير هل انزل له واشوف وش يبي او انفذ بجلدي , طالعت وراي واشوف اخوياه قاعدين يناظرون وش بيسوي خويهم في هذه اللحظه عرفت ان قرار النزول انتحار خاصة معاي زوجتي واطفالي ، رجعت على الوراء شوي لكن المجرم جاي يمشي لعندي وما ادري وش اللي في يده لانه حاطها وراء ظهره وخمنت انه ممكن معاه سلاح او اي شيء ياذيني بيه ، انتظرت حتى قرب مني ودعست بالسيارة من جنبه وبغيت ادعسه لكن مشيت ، ركب هو الدباب ولحق وراي ويجي واحد من اخوياه بدباب ثاني ويلحقون وراي مطاردة في الشارع والمشكلة الشارع طويل حتى توصل اسدا وما فيه حتى البيوت فقط ورش ومخازن، المهم يحاولون يحدوني يمين ولا شمال يبوني أوقف وانا ما اعطيتهم فرصة والاهل بجمبي واطفالي ماتو من الخوف وانا اهديهم واطمنهم ، استمرينا في المطاردة لمسافة طويله لكن انا لم اسرع بالسيارة لسببين الاول ان الدباب اسرع مني بكثير وثانيا في السرعة العالية يكون التحكم في السيارة صعب جدا وأي غلطة ممكن تكلفك حياتك. المهم قعدنا على هذا الحال يحدوني واحدهم حتى جات سيارة من قدام وحاولو الدبابات يحدوني عليها عشان اتصادم وجها لوجه لكن عكست الطارة عليه وخليته هو من جهت السيارة القادمة وبغى يصدم فيها لكن تدارك الوضع وابعد عنه، اشتد غضبهم علي واشوف في المرايه مجموعة من الدبابات من اخوياهم جايين من بعيد يبون يساعدون خويهم ، عاد لما شفتهم عرفت ان المساله فيها موت ولا حياة وكملت طريقي متجه الى اسدا لانها منطقه مزدحمة واقدر اتصرف هناك. قبل ما نوصل اسدا بقليل كان فيه اشارة حمرا وواقفه سيارة عندها وانا من السرعة وما ابي اوقف اللا في اسدا مشيت وعكست الطريق وهم وراي حتى وبجمبي يحوالون اوقف أو اصدم في اي شيء حتى وصلت اسدا وخليته حتى يوصل بجمبي وافتح النافذه واقوله انا اكلم البوليس الحين وهم جايين في الطريق ، لما سمعني قلت البوليس وشافنا وصلنا عند الزحمة ومع ذلك ما وقفت له ولازلت اقطع الاشارات بحذر قاموا راحو يمين ورجعو لاخوياهم بعد ان عشنا لحضات مرعبة وفلم اكشن لن انساه.
الفائدة من القصة
1- الحذر ثم الحذر المشي في الليل في أماكن منزوية وفاضية خاصة اذا معاك اهلك وفي نهاية الاسبوع.
2- عدم الوقوف لاي احد والنزول من السيارة حتى ولو كنت تعتقد انك سوف تغلبه لانك لا تعلم ما يحمله معاه من سلاح ابيض ولا ملون. لا تتحدا من ليس عنده شيء يخسره (مثل)
3- عدم الارتباك والقيادة بسرعة عاليه لان ذلك هو اللي يريده لارباكك وافقادك السيطرة على السيارة.
4- المحافظة على الصلوات في المسجد خاصة الفجر والمغرب لانك تكون في حفظ الله.
5- اخذ رقم اللوحات وهذا الذي راح عن بالي حقيقتا وما تذكرت اللا بعدين.
اسال الله لكم العافية والستر وان يحفظكم من كل مكروه