MZF7777777
16-04-2022 - 04:44 pm
:السلام عليكم ورحمة الله وبركاته
دايما أول ما أفتح النت على طول أدخل هالمنتدى
صج مواضيعه مفيدة وتفتح النفس ع السفر
وبما إني من محبي السفر والتجوال والطلعة والمغامرات وايد وايد ومن زمان وخاطري بالنمسا........حابة إنكم تساعدوني ويزاكم الله خير
أبا برنامج مقترح للسفرة ( الطيران ، المناطق، الفنادق والمطاعم) علما إني أحب الطبيعة والريف بس في نفس الوقت أبا المكان حيوي في نص البلاد وحواليه كل شي. مش لازم خمس نجوم، أربع أو ثلاث كفاية بس الموقع و الإطلالة ونظافة المكان مهمة
المدة 12 يوم بالكثير والميزانية تقريبا 20 ألف درهم وإذا ما تكفي كم لازم نحط في بالنا؟؟
والسموحة
اولا .. حياج الله اختي في المنتدى ويانا
ثانياً.. دام انتي دوم تترددين على هالبوابه .. اكيد كونتي فكره عن اهم المناطق فيها .. وين انتي حابه تسافرين؟؟؟
بالنسبة لي اقترح لج ان رحلتج تكون عبر طيران الاتحاد دامج من الامارت لنه سعره ارخص من الاماراتيه وانا بصراحه اشوفه فنفس المستوى.. تبدأ في فينا ( فندق الماريوت أو الهيلتون) لمدة ليلتين وعقبها تروحون لسالزبرج وتسكنين في فندق ( الشيراتون او الكراون بلازا) لمدة ثلاث ليالي، بعدين على زيلامسي والسكن في فندق (جراند او سي هوتيل فيلا) لمدة خمسة ليالي وثم العوده إلى فينا مره ثانيه لمدة ليلتين والسكن في نفس الفندق المذكور سابقاً.
بالنسبة لأهم الأماكن السياحيه صعب انه تنكتب في رد واحد.. ولكن نصيحه مني خذيلج لفه عالتقارير المصوره للأعضاء وسجلي اهم الأماكن اللي تعيبج.
الميزانيه؟؟؟ 20 الف درهم تتضمن شو؟؟ وانتوا كم عددكم .. اذا كنتي تقصدين ان الميزانيه للمعيشه والتنقلات فانا اشوفها انه ان شاء الله بتكفي.. بس بدون مشتريات وتسوق لنه السوق اروحه ميزانيه.. وعموما الصرف اليومي يختلف من شخص لآخر..
إن شاء الله تكونين كونتي فكره عامه عن الرحله .. اذا انتوا عايله او اكثر من 4 اشخص والميزانيه وسط.. انصحكم تستأجرون سياره لنها بتوفر عليكم وايد وخلوا السكن في شقق بدل فنادق.
بالتوفيق...
بوسعيد