السلام عليكم ورحمة الله وبركاته ..
عندي استفسار بسيط يا اخوان واتمنى تتابعوا الموضوع معاي..
رحلتي كانت بين فرنسا والنمسا والمانيا
4 ايام باريس
3 ايام فيينا
يومين سالسزبورغ
5 زيلامسي
والعودة من ميونخ لباريس وبعدها عالسعودية
كل التنقلات كانت بالقطارات الا مابين باريس وفيينا بالطائرة
طبعا لظروف تعب زوجتي الشديد ليلة رحلتنا لفيينا .. كنسلت كل شئ
وحاليا انا ما تحركت من باريس ابدا وبظل فيها لوقت سفري للسعودية بعد 9 ايام
والحمدلله زوجتي حاليا بخير وصحة وتعافت من اليوم الثاني
حجوزاتي اللي بالنمسا الغيتها كان من ضمنها فنادق غير مسترجعه لكن قدر الله وما شاء فعل
وايضا تذكرة باريس فيينا غير مسترجعه والحمدلله على كل حال
لكن يوجد تذاكر للتنقلات بالنمسا عالقطار الاوروبي وابغى الغيها عشان استرجع اللي اقدر استرجعه
كيف الطريقه يا اخوان .. انا راسلت القطار الاوروبي عن طريق الموقع حقهم وعن طريق الايميل حق التأكيد اللي وصلني عن طريقه لكن محد يرد
ابغى مكتب لهم بباريس اقدر اروح له واسترجع عالاقل جزء من المبالغ اللي خسرتها < تقريبا 7 الاف ريال ..
فاتمنى اذا احد عنده حل لا يبخل علينا
طبعا ماراح انسى اني اكتب اسم المستشفى اللي عالج زوجتي بهالموضوع
لكن مايحضرني اسمه الحين ولا اسم محطة المترو القريبه منه
لكن تابعوني بالموضوع وسأضعها
لأنو وللحقيقه هالمستشفى ماقصر ابدا وابغى الكل يستفيد من تجربتي لأنه ورغم انه سووا عملية تعتبر بسيطة جدا لزوجتي الا انهم ما اخذوا يورو واحد عاللي سووه وكانوا جدا متعاونين
رحنا لهم اول مره بعد وصولنا لفرنسا بيومين واعطونا موعد قبل سفرنا للنمسا تقديرا منهم لظروف سفرنا
يعني رحنا لهم مرتين ولا دفعنا شئ رغم اننا سألناهم اكثر من مره لدرجه اننا ذهبنا للسنتر حق المستشفى عشان لانسوي شئ غلط ويوقفونا بالمطار بالعودة لكن كل شئ كان سليم
قالوا لنا اي شئ في الطوارئ بلاش .. حتى العمليات .. بس اتوقع داخل المستشفى بفلوس < للسياح طبعا
لأن المستشفى حكومي
استطردت بالكلام لكن حبيت افيدكم بالموضوع اللي صار علي
وبرضو ملاحظه اخيره .. بالمستشفى محد يتكلم انقليزي ابدا وعانينا وربي سخر لنا اخوات عرب ساعدوا زوجتي بالشرح
لكن الدكاتره يفهموا انقليزي
حاليا احنا بنكمل سفرتنا بباريس اللي ماشفنا منها بالاربع الايام اللي راحت الا برج ايفل ودزني لاند وساحة الكونكورد ومتحف اللوفر
بنكتشف باريس من جديد .. لأني ما اتوقع احد قد اضطر يجلس 15 يوم بباريس زينا خ
وبنروح ديزني مره ثانيه .. تعبنا وما خلصناها ولا دخلنا الا الالعاب وبرضو ما خلصناها ههه
بالاخير
اتمنى اذا احد عنده حل لاسترجاع تذاكر القطار ..
ودعواتكم تكون ايامنا كلها عسل