الله ييسر لك هذي الرحله يا أخوي
وبنسبه لحجزك أنا الآن في الهند ونفس القصه اللي تكلمت عنها هي قصتنا بالضبط وحصل معنا نفس الكلام
والحمد لله تيسرت الامور والتوقف في كلكت تقريبا ساعه واحده فقط ثم مباشره إلى كوتشن وهي جدا قريباه من كوتشن
توكل على الله ولا تشيل هم المساله جدا بسيطه
صح انه مطلوب الصدق في الحجز بحيث يقولون لك قبل ما تمشي أنه ما هي مباشره لكوتشن لكن ما هي مشكله
الله يوفقك وتوصل بالسلامه

الله يبشرك بالخير يابو رايد
وسفره سعيده بأذن الله

لا عادي جدا اخوي لا تعدل حجز ولا غيرة
انا رايح على نفس الرحلة وجاي والوقوف فعلا 45 دقيقة ولا تشغل نفسك
بس ماشاء الله عليك ب1500
انا اخذها ب2300 ريال ذهاب وعودة الله لا يخسر الرياض كلكيت كوتشي
ابد رح الله يستر عليك واستمتع

احمد ربك انك دريت الحين
انا مادريت الا بالمطار لما لقيت كل الركاب الى كلكيت استغربت قلت خاف اني راكب طيارة غلط
وما خليت احد ما سالتهم كلهم كلكيت
ولما سالت موظف الخطوط قال كلكيت كوتشي
فوضعك احس انه طيب جدا

مشكور يابو تركي على رفع المعنويات
ممكن تقول لي وش الأجراءات أو ماتوصل ؟!

الله ييسر امورك اخوي

أبو محمد 82
ابو محمد اسمع كلامي زين وياليت تاخذ ورقة وقلم وتسجل اذا انك مثلي نساي
اول ما توصل الجوازات بعدها الجمارك وبعد ما تطلع بتحصل سواق المكتب راز اسمك قدامك
شف نفسك شوي وحس انك مهم وتخيل انك رئيس دولة وهذا رئيس المراسم ينتظرك
المهم ما علينا
اهم شي قبل تركب السيارة فيه على يمينك كوشكات يبيعون شرايح جوال خذ لك شريحتين واشحن كل شريحة ب600 روبية
اهم شي لان جوالك السعودي لا تستخدمة ابد ابد
الشرايح خذها حسب عدد الاشخاص
ترا الشريحة ب150 روبية
بيوديك الفندق السواق ريح ونم لانك طبعا بتوصل حوالي الساعة ثمان بتوقيتهم حسب تاخر الرحلة
ريح نم
الصباح يجيك السواق وتروح المكتب تسدد وتاخذ معك العقد او صورة وحاول حاول حاول بكل ما تقدر انك فقط تسدد نصف القيمة وقل الباقي بعد ما ارجع كوتشي لتضمن ان يخدمك المكتب
اذا ما عجبك السائق قرشعه وخلهم يعطونك غيرة ولا تسوي مثلي عطيتهم الفلوس كامله وندمت
اياني واياك تستحي من المكتب وتقول ما قصرو معي وخدموني
تراهم خادمينك بفلوسك وزيادة
لا تعطي السواق وجه ترا تبلش
بعد يوم ترا بتحس انك من اهل الديرة ودلولة لا وبتقعد توصف الطريق اذا لقيت احد ضايع
اتمنى لك التوفيق ورحلة ممتعة والله يردك سالم غانم
بس قبل تروح اطبع مواضيع المعالم السياحية في كيرلا تراها في احد المواضيع هنا
حاول انك ما تصرف روبيات كثير اول ما توصل اصرف الفين ريال روبيات والباقي خله ريال ولا تاخذ دولار خذ سعودي ترا في كل مكان تجد صرف
الصرف ب12.20 اة 12.10
كاسرهم ترا المكاسر يمشي معهم بقوه
والله مدري وش بقى بس هذا اهم شي
اي خذ معك علاج الغثيان والدوار بتحتاجة بطريق مونار خاصة لاخواتنا المواطنات
وربي يستر عليك ويرجعك بالسلامة

ياخي فيه واحد قابلته عنده دهن عود ندمت اني ما كثرت منه مسلم مشتغل بالرياض 20 سنة
راعي ذمه ويقدر السعوديين
جيته فيي المحل وكل شوي يقول هذا محل من الله ثم السعودية
اسمه عبدالسلامة
عنده عود ودهن عود وزعفران غير التحف والهدايا ومجوهرات وسجاد وكل شي
محل يستاهل من يزورة
عطاني اسعار ما لقيتها في كيرلا كلها
لدرجة انه يقولي اذا ما معك فلوس خذ وبعدين ترسلي
من جد نادم اني ما كثرت دهن عود
باحاول ادور رقمه واحطه هنا اسمه عبدالسلام ودعن العود اسمه عزام
لا اوصيك عليه

الله يبيض وجهك يابو تركي ماقصرت على المعلومات المفيدة
لما توقع العقد يعطيك فيوتشرات الفنادق ولا تروح للفندق وتحصل حجزك بأسمك ولا شلون الطريقة ؟
الشىء الثاني هل أقدر أصرف من المطار بالصرافه العاديه ماهي فيزا ؟
يعني معي بطاقة سامبا أو الراجحي هل تصرف من صرافاتهم ؟
الله لايهينك ممكن رقم صاحب دهن العود وفي أي مدينة ساكن
ومشكور على تجاوبك